41. परमेश्वरे यीशु बि सिए दोतु बिचंङ ज़ि श्रींङमी लहज़ा

सैनिका तु दोरच़ी यीशु बि क्रूसो टोईच़ी चढ़ाएसिमी थल, यहूदी अगुवा ज़ि पिलातुसो हखा कुईरे, “दू हप्साड़, यीशु ज़ि कुहषी ताहरे कि दू षुमु ध्याड़ो थल सिए दोतु बिचंङ ज़ि श्रीङीं योतो। अपि आ दि हेले शोतो कुहच़ी कब्रो निगरानी लहज़ि जूंशी तोह कि दोऊ च़ला ज़ि दोऊ फुक कुह्ई च़रची माह ज़ूस। अगर दोच़ि झांह लहज़ातोर दंङ दोच़ि कोहर कि दू सिए दोतु बिचंङ ज़ि श्रीङीं इलज़ा।”

पिलातुसे कुई, “रे सैनिका तिंङ रैंज़ा शिलांई, दंङ छना केहच़ी लेह तरपोंई कब्रो निगरानी लंहि।” झांह लेह दोच़ि दू कब्रो तोंखा इबिमी पेतंङ रिंङ मोहर लगाके च़रतिर। दोच़ि दि पक्का लहज़िमी थल्जी दोर्तिंङ सैनिका तिंङ ला बैठाके च़रतिर कि अच़िला दोऊ फुक कुज़ि माह जुंस।

यीशु सिमी ध्याड़ो थल सब्तो ध्याड़ा तोहई। अच़िला सब्तो ध्याड़ा रिंङ कम लेह मरच़ी, झांह लेह यीशु अरिला मित्र कब्रो कछंङ अपि मरति। पर सब्तो थल कि ध्याड़ा रिंङ, मुंजे महस सरके, रेह मेच़िमी रे यीशु कब्रो कछंङ इबिमी थल्जी तयार शुईर। दोरे दोऊ फुका रिंङ ऊई ला जड़ी-बूटी लगाएच़ी जुंज़ातेर।

दू मेच़िमी तु पिपिमी तुहई, कब्रो कछंङ इच्चा मोह्ड़े भूयंल इलि। स्वर्गंङ ज़ि इच्चा स्वर्ग दूत अंजे दू रह्घ ऐखा लेह च़रति। अंऊ कब्रो तोंखा इबिमी ठाहरि तोहई दंङ दू रह्घ तु टोईच़ी बंङज़ा इलि। दि स्वर्गदूत छंङी ओ ठ्रोह चमकेक्पी लेहकी तोहई। कब्रो कछंङ अंऊ सैनिकार तोईरे दोच़ि दू खंईरे। दोरे धोंण बेवा इलिर कि बेहोश शुचि धरतिऊ टोईच़ी दह्च़ी इलिर।

अपेहल दोरे मेच़िमी रे क्रबो कछंङ पिचि इलिर दंङ दू स्वर्गदूते दोतु हखा कुई, “बेईनि था। यीशु देर माह। दू सिए दोतु बिचंङ ज़ि श्रीङीं इलज़ा, छना कि दोई कुहषी ताहरे कि दू सिए दोतु बिचंङ ज़ि श्रीङीं योतो! कब्रो अंदरेग खांई।” दू मेच़िमी ज़ि क्रबो अंदरेग दंङ अंऊर यीशु फुक केहषी ताहरेर दोर्तिंङ खंईर कि दोऊ फुक दोर्तिंङ तोहई ए माह।

दोहपल दू स्वर्गदूते दू मेच़िमी तु हखा कुई, “इलांई दंङ दोऊ चेला तिंङ कंड्रेंई, ‘यीशु सिए दोतु बिचंङ ज़ि श्रीङीं इलज़ा दंङ दू केहतु तुईज़ि-तुईज़ि गलीलो हखा योतो।’”

दू मेच़िमी रे महस हैरान शुचि इलिर दंङ खुश ला शुईरे। दोरे चेला तिंङ दि रूठे खबर रंड्रीमी थल्जी ज़रका रैंईर।

अपेहल दू मेच़िमी रे चेला तिंङ दि रूठे खबर रंड्रीमी थल्जी अमरिंङ तोईरे, दंङ यीशु दोर्तिंङ प्रकट शुचि इलि। दोरे भत्तेर दोऊ कोंज़ारिंङ दह्च़े इलिर। दोहपल यीशु ज़ि कुई, “बेईनि था। इलांई दंङ गिऊ चेलातिंङ गलीलो हखा इबिमी थल्जी कुंई। दोच़ि दोर गेह खमोर।”