42. यीशु स्वर्गो हखा यहच़ा इबि

अंऊ ध्याड़ा परमेश्वरे यीशु बि सिए दोतु बिचंङ ज़ि श्रीङंमी लहरी, ओऊ झुह्ट चेलार कछंङों इच्चा नगरंङ यवातेर। इलज़ा मुक्का दोच़ि यीशु रंङ साते छि शुह्ते। दोऊ पाहठी गप्पा लहज़ि लेहकी तोईरे, दोतिंङ उम्मीद तोहई कि दू ए मसीह शुह, तांला दोबि सच़ि च़रचातेर। एंतेग दू मेच़िमी ज़ि कुट्रातोर कि दू यहच़ा श्रीङीं इलज़ि तोह। दोच़ि माह ञेंहच़ातेर कि अंऊ गप्पा तु टोईच़ी विशवास लहज़ि जूंशी तोह।

यीशु ज़ि दोऊ दोयु कछंङ अंज़े दोतंङ साते जोज़ी शुरू लहरी, पर दोच़ि दू सेहच़ी मरतिर। दोई रूहक्ति कि दोच़ि अतु पाहठी गप्पा लहज़ि लेहकी तोतोर। दोच़ि दोबि यीशु रंङ साते छि शुह्ते दोऊ पाहठी भत्ते गप्पा कंङी च़रतिर। दोच़ि झांह सोचेक्तिर कि दोच़ि अरिया परदेशी रंङ साते गप्पा लहज़ातोर अंऊ दोई माह ञेंहच़ाते कि यरूशलेमारिंङ छि शुह्ते

दोहपल यीशु ज़ि दोतिंङ समझाएति कि परमेश्वरो बचने यीशु पाहठी छि कुट्रा। महस तुहई, भविष्यवक्ता ज़ि कुहषी तारेर कि मदम मीहच़ी मसीह बि तंग लोहर दंङ सच़ि च़रपोर। पर भविष्यवक्ता ज़ि दि ला कुहषी तारेर कि षुमु ध्याड़ो थल श्रीङीं योतो।

अपेहल दोरे दू नगरंङ पिचि इलिर अंऊर दोकु झुह्ट रूहमज़िमी तोईरे, दोहपल तचेक योंकोल शुचि इलज़ि तोहई। दोच़ि यीशु बि एनाह तंङ साते बंङज़िमी थल्जी कुईरे, दंङ दू दोतंङ साते इच्चा चुंङ रिंङ अच्चा इलि। दंङ रातो बगतो ज़ेईमी थल्जी बंङज़ा इलि। यीशु ज़ि इच्चा रोटी कुरच़ा परमेश्वरो धन्यवाद लहरी, दंङ दोऊ खंणी लहरी। अचानक ए, दोच़ि ञेंई च़रति कि दू यीशु तोहई। ध्वांए दू दोतु टिरो तुईज़ि रिहप्सा इलि।

दू झुह्ट मीहच़ी एनातु बिचंङ कुईरे, “दू यीशु ए तोहई! झांह लेह अपेहल दोई हेंदिंङ परमेश्वरो बचन समझाएकाते हेनर महस खुश तोईनि!” ध्वांए ए, दोरे दोरच़ी हुंच़ा यहच़ा यरूशलेमा ओ हखा अच़ा इलिर। अपेहल दोरे पिचि इलिर ता दोच़ि चेला तु कुईरे, “यीशु श्रीङीं तोह ञेंहच़ी दू तंङातेंई।”

अपेहल चेलार गप्पा लहज़ि लेहकी तोईरे, यीशु अचानक ए दू कमरा रिंङ दोतु तुईज़ि प्रकट शुचि इलि। दोई कुई, “केतिंङ शांति खोकसी जुंस!” चेला ज़ि सोचेक्तिर कि दू अरिया राकस शुह, पर यीशु ज़ि कुई, “केरे छारिंङ बेवातंई? केहच़ी दि छिल्ले माह सोचेक्च़ातंई कि दि हेले रिंङ शुह गेह, यीशु शुगाह? गिऊ गुह्ड़ ए कोंज़ा खांई। राकसो कछंङ झांह ठ्रोह फुक माह शुहबी छना कि गिऊ तोह।” दि कंड्रीमी थल्जी कि गेह राकस माह शुगाह, दोई ज़ेईमी थल्जी छा पेट्रीरी। दोई दोबि मह्छो इच्चा खंणी रैं च़रति, दंङ दोई दोबि ज़े च़रति।

यीशु ज़ि कुई, “गिऊ पाहठी परमेश्वरो बचने छिल्ला कुट्रा दू शोतो। गेह केतिंङ कंज़े च़रचातग कि दिऊ शुहबी ज़रूरी तोह।” दोहपल यीशु ज़ि दोतिंङ परमेश्वरो बचन रूठे रंङ समझाएति। दोई कुई, “महस तुहई भविष्यवक्ता ज़ि चेहसी तारेर कि गिहबी, मसीह बि दुख उठाएच़ी लेहपोतो, सिए लेहपोतो दंङ षुमु ध्याड़ो थल सिए दोतु बिचंङ ज़ि श्रीङंमी लेहपोतो।”

“दू भविष्यवक्ता ज़ि दि ला चेहसी तारेर कि गिऊ चेला ज़ि परमेश्वरो बचनो घोषणा लोहर। दोच़ि हर इच्चा बि पश्चाताप लहज़िमी पाहठी कमोर। अगर दोच़ि झांह लहज़ातोर दंङ परमेश्वरे दोतु पाप माफ लोहतो। गिऊ चेलार दि रूठे खबरो प्रचार यरूशलेमो दोरच़ी शुरू लोहर। दोहपल दोरे भत्ते ठाहरि ए भत्ते जाति तु बिचंङ योर। केरे मीहरे गिऊ हर इच्चा गप्पा ए कमो गवाह अंऊ गेह कुहषी तातग ए लहसी तातग, दंङ दू ला भत्ते कुंई अंऊ गेरंङ साते शुचि तोह।”

अंज़ा निहज़ा ध्याड़ा तचेक, यीशु एनोह चेलातु तुईज़ि महस फेरा प्रकट शुई। इच्चा फेरा ता दू इच्चा ए टेमारिंङ ङा राह बे महस मीहतु टोईच़ी प्रकट शुचि इलि। दोई एनोह चेला तिंङ महस तरीका रंङ दि साबित लहरी कि दू श्रीङीं तोह, दंङ दोई दोतिंङ परमेश्वरो राजो पाहठी शिक्षा रांई।

यीशु ज़ि एनोह चेला तु हखा कुई, “परमेश्वरे गिहबी स्वर्ग ए धरतिऊ हे इच्चा मीहू टोईच़ी राज लहज़िमी अधिकार रांहषी ततो। झांह लेह एंतेग गेह केतंङ साते कुट्रातग: इलांई दंङ भत्ते जाति तु मीहतिंङ चेला बणाएतंई। झांह लहज़िमी थल्जी, केतिंङ दोति बाह, योह, ए पवित्र आत्मा मिन्दिंङ बपतिस्मा रांई। अंऊ ला गप्पो गेह केतिंङ हुकम रांहषी तातग। दू भत्ते गप्पा तु भाषे लहज़ि ला दोतिंङ कंड्रेंई, गेह हमेशा केतंङ साते बंङज़ोग।”

यीशु सिए दोतु बिचंङ ज़ि श्रीङंमिमी निहज़ा ध्याड़ो थल, दोई एनोह चेला तु कुई, “अपेहल तचेक कि गिऊ बाह ज़ि केतिंङ सामर्थ माह रमतो दोहपल तचेक गेह यरूशलेमा रिंङ रूहम्ज़ा तोंई। दोई केहतु टोईच़ी पवित्र आत्मा च़रच़िमी दोरच़ी झांह लोहतो।” दोहपल यीशु स्वर्गो हखा अच़ा इलि, दंङ इच्चा डूह ज़ि दोबि एनोह दोतु टिरो तुईज़ि प्याके च़रति। स्वर्गा रिंङ यीशु ज़ि भत्ते चीज़ातु टोईच़ी राज लहज़िमी थल्जी परमेश्वरो सुचंङ हासी बंङज़ा इलि।