2. पाप दुनिया माय येनो

आते आदाम आन त्या थेय देवाय त्याहाहाठी बोनाडला त्या खुब हारा बगीचामाय रोयन खूब खुश आते . त्यामायने कादाज फाडके नाय पोवे , तेबू ई गोठी त्यामाय कादालूज शरम नाय कओय ये ,काहका दुनियामाय पाप नाय आतो . त्ये कोवेबी त्या बगीचामाय फिरते आते आन देवाआरे गोठ कोएत.

पेन त्या बगीचामाय योक हाप आतो .तो खूब लबाड आतो त्याय ती बाईल होद्या ,काय हुदलाज देवाय तुमहाल या बगीचामायने ळोहाबी जाअडा फळ खाअ नाय आखह्या .?

त्या बाईल उत्तर देना , देवाय आमहाल आखह्या का आंमा त्या हारा –खोटा जाण कोय देनारा जाअडाल सोडीन कोहाबी जाअडा फळ खाय सकते हे . देवाय आमहाल आखह्या का जर तुमहाय त्या फळाल खाअदा नेते त्याल आथल्याबी ,तेबी मोय जाहा .

त्या हापाय बाईल उत्तर देना ,ई खोअरानाय हेय | तुमा नाय मोअहा .देव जांहे का जेहेके तुमा फळाल खाअहा, तुमा देवा रोके ओय जाहा आन त्या रोके हाराल आन खोटालहोमजा लागहा.

त्या बाई देख्या का ती फळ मोनाल हांरा आन चवदार दाखाया .तील बी जानकार बोननाआंता, त्याहाठी तीय फळाल तोडीन खाय लेदा. पासे तींय त्ये दोनाराल जो तीआरे आतो त्याल ती फळ देना आन त्यांय बी खाय लेदा.

योकदम, त्यांहा डोळा उगडी गोया, आन त्याहाल होमजाय गोया का त्ये उगाडे हेय. त्याहाय पाने योकठे हिवीन त्याहा फाडके बोनावीन त्याकोय आपे आंग डाकते आते.

तोवे माहाय आन त्या दोनारीय त्यां बगीचामाय फिरता देवा आवाज वोनाये. त्ये बेनी देवा हिने दोबी गोये. तोवे देवाय त्या माहाल हात कोया, तू केस हेय? आदामा य उत्तर देना, आंय तुल बगीचामाय फिरता वोनायो, आन आय बिअं गोयो. काहाका आय उगाडे हेय.त्याहाठी आय दोबी गोयो .

पासे देवाय होद्या, तुल कुयें आख्या का तू उगडो हेय? काय तूंअ ती फळ खादहा जी खाहाठी नाय आखला आंता? माहाय उत्तर देना, तूंअये मान जी बाई देनही तीय मान ती फळ देना. तोवे देवाय त्या बाईल होद्या, तूंअ ई काय कोया? ती बाई आख्या, हापाय मान ठोगाडी देनहा.

देवाय हापाल आख्या, तुल ठोकर लागे| तूअ तोअ डेडीके होपलेहे आन कादू चाटहे. तूअ आन ई बाई योकबिजा विरूद कोअहा, आन तोअ पोहे आन त्या पोहेबी योकबिजा विरूद कोरी. ई बाई पिढी तो टोलपाल चेंदी, आन तूअ त्यां पाटलील चावहे.

तोवे देवाय बाईल आख्या, आय तोअ पोहाल जन्म दांअहाठी खूब पिडा दीही. तूं तो दोनारा ऐहे मोन कोअहे, आन तोवोय राज कोरी.

देवाय माहाल आख्या, तूअ आपे दोनारी वोनायहो आन मां गोठ नाय मानही. त्याहाठी दोरतील ठोपको लागह्यो, आन तोअ खायना उदाडाहाठी कोठीन कष्ट कोरा पोडी. आमी तू मोय जाहे, आन तोअ आंग कादूमाय मिळी जाय. त्या माहाय त्याअ दोनारी नाव हवा थोव्या, ज्या अर्थ हेय जीवन देनारी, काहाका तीअ बादी जाती आयहो ओरी.आन देवाय आदम आन हवाल जनावरहा, चाबडा फाडके पोवाढ्ये.

पासे देवाय आख्या, आमी हारा आन खोटा होमजुना माहांल आपे रोका ओय गोयहा, त्याहाठी त्यांहाल त्या जीवना जाअडा फळ नाय खाअ दांअ पोडी का त्येंअ सदा जीवते रोय. त्याहाठी देवाय आदम आन हवाल त्या बगीचामायने बारे काडी देने. आन देवाय कादाल बी त्या जीवना जाअडा फळ खायना रोकाहाठी त्या बगीचा बाअनाही शक्तीवाळा होरगा दूतहाल बोहाडी देना.