26. येशू त्या सेवा चालू कोअहे.

सैताना परीक्षाहाल नाकार कोईन पासे, येशू पासे गालीला भागाम येनो. ओ तो जागो हेय जा तो रोय. पवित्र आत्मा त्याल खूब शक्ती देया कोय, आने येशू योका जागावोरे बिजा जागावोय गोयो आने माअहाल हिकाड्या. बादे माअहे त्या बदल हाऱ्यो गोठ्यो आखे.

येशू नासरेथ शेहरामाय गोयो. ती ई गाव हेय जा तो त्या हानापणामाय रोय. सब्त दिह्ये, तो सेवा कोअना जागावोय गोयो. आग्यावाहाय त्याल यशया भविष्यदवक्ता गोठीही योक पुस्तक देनी. त्याहा विचार आतो का तो ती वाचे. पासे येशूय ती पुस्तक उगाडीन त्या योका भागाल माअहाहाटी वाच्या.

येशूय वाच्या, “पोरमेहेराय मान तो आत्मा देनहा काहाका आंय गरीबाहामाय सुसमाचार प्रचार कोय सोकू. त्याय मान याहाटी दोवाड्याहा का बंदिवानाहाल सुटे कोय सोकू, आंदळाहाल पासे नजर दि सोकू, आने त्याहाल सुटकारो दाव ज्याहाल बिजे माअहे ठेची रोयले हेय. ओ तो समय हेय जोवे पोरमेहेर आमहावोय मायाळू ओरी आने आमे मदत कोरी.’’

पासे येशू बोही गोयो. बादे माअहे त्याल खूब ध्यान देयन ऐय रोयले. त्यें जाअते आते का पवित्रशास्त्र जो भाग त्याय आमी वाचह्यो तो मसीहा बदल आतो. येशूय आख्या, “ज्यो गोठ्यो माये आमी तुमेहाटी वाचह्यो, त्यो या समये पुरी ओय रोयल्यो हेय.’’ बादा माअहाल नावाय लागी. त्याहाय आख्या, “काय ओ योसेफा पोहो नाय हेय का?’’

तोवे येशूय आख्या, “ई बोरबर हेय का माअहे कोअहाबी ओहडा भविष्यद्वक्ता स्विकार नाय कोए जो त्याहा सेहरामाय पालन-पोषण ओयन मोठ जायला हेय. एलिशा भविष्यद्वक्ता समयामाय, इस्राएलाम खूब विधवा आत्यो. पेन जोवे साडे तीन वोरहे हुदी पांअय नाय पोडो तोवे पोरमेहेराय एलियाल इस्राएलाम कोअहीबी विधवा मदत कोराहाठी नाय दोवाड्या. याल सोडीन, त्याय एलियाल योका बिजा देशा विधवा पाअही दोवाडया.’’

येशूय आखना चालूज राख्या, “आने एलिशा भविष्यद्वक्ता समयामाय, इस्राएलामाय खूब माअहे चाबडी रोगाके पिडाले आते. पेन एलिशाय त्याहामाने कादाल बी हारा नाय कोया. त्याय फक्त इस्राएला विरोद्या सेनापती नामानालूज हारा कोया.’’ पेन ज्यें माअहे येशू वोनाय रोयले त्यें यहूदी आते. याहाटी जोवे त्याहाय त्याल ई आखता वोनाये तोवे त्याहाल त्यावोय रग कोय येनी.

नासरेथा माअहाय येशूल दोयी लेदा आने त्याल सेवा कोअना जागावोरे गोहलीज बारे ली गोये. त्यें त्याल माई टाकाहाटी निचे टाका योका डोगाला सेंडीवोय लेय गोये. पेन येशू टोळामाने निंगी गोयो आने नासरेथ सेहराल सोडीन निंगी गोयो.

पासे येशू बादा गालीला भागाम गोयो, आन मोठो टोळो त्याही येनो. त्यें ओहडा खूब माअहाल लेय येने ज्यें बिमार आने अपंग आते. यामाने आर्दे ऐयी, चाली, वोनाय नेते बोली नाय सोके, आने येशूय त्याहाल हारा कोया.

पासे, खूब माअहे येशू पाही लेय येने ज्याहामाय खराब आत्मा आतां. येशू त्याहामाने खराब आत्माहाल निंगी जाअहाटी हुकूम देनो. त्यें खराब आत्मे खूब बोंबल्ये, “तू पोरमेहेरा पोहो हेय!’’ टोळा लोक नोवायी पाम्या, त्याहाय पोरमेहेरा स्तुती कोयी.

पासे येशूय बारा आदम्याहाल निवड्या ज्याहाल त्याय त्या प्रेरित आख्या. त्या प्रेरिताहाय त्याआरी प्रवास कोयो आने त्यापाने शिक्षण लेदा.