27. दयाळू शोमरोन्या कहानी

योक दिही, यहुदी नियम खूब जाअनारा योक माअहू येशू पाही येना. तो बादहाल ई देखाडा आतो का येशू चुकीके हिकाडी रोयह्यो. याहाटी त्याय आख्या, ओ गुरु, जोलामजुग्या जीवन मिळाहाटी आंय काय कोउ?’’ येशूय उत्तर देना, “देवा नियमाम काय लेखला हेय?’’

त्या माअहाय आख्या, “तो आखहे का तुमे पोरमेहेरावोय तो बादा मन, जीव, गोती, आने बुध्दीकोय मोया थोव. आने तो पोडोस्याव सोवताहा रोका माया थोव.’’ येशूय उत्तर देना, “तू योकदम बोरोबर हेय! जर तू ऐहेके कोहे, ते तुल जोलामजुग्या जीवन मिळी.”

पेन तो नियम जाअनारा माअहाल देखाडना मागे का त्या जीवन जीवना रीत खोरी आती. याहाटी त्याय यीसूल होद्या, “ठीक हेय, ते मा पोडोसी कुउ हेय?’’

येशूय त्या नियम जाअनाराल योक गोठ आखीन उत्तर देना. “योक यहूदी माअहू आता जी योक वाट दोयन यरुशलेममाने यरीहो ऐहे प्रवास कोय.’’

“पेन बांडहाय त्याल देख्यो आने त्यावोय होमलो कोय देनो. त्याहाय त्या बादाज काय लेय लेदा आने त्याल लगबग मोअय जाय ओला ठोक्या. तोवे त्या निंगी गोया.’’

“त्या पासे ताबाडूज, योक यहूदी याजक (देवा सेवक) ती वोरे गोयो. त्या याजकाय (देवा सेवकाय) त्या माअहाल वाटीवोय पोडला देख्या. जोवे त्याय त्याल देख्या तोवे तो वाटी बिजी कानी जायने आगला निंगी गोयो. त्याय त्या माअहाल पूरी रीतीकोय देखीन बी त्या एसने पाठ फेरवी लेदी.’’

थोडा समया पासे, योक लेवी ती वाटीवोय येनो. (लेवी यहूदीयाहा योक जात आती ज्याहाय मंदिराम याजकाहा मदत कोय.) तो लेवी बी वाटी योके कानीने निंगी गोयो. त्याय बी त्या माअहाल देखीन बी त्या एसने पाठ फेरवी लेदी.’’

“त्याहा पासे वाटीवोय येना ती योक शोमरोनी माअहू आता. (शोमरोनी आन यहूदी योक-बिजाल पसंद नाय कोय) त्या शोमरोनीय वाटीवोय त्या माअहाल देख्या. त्याय देख्या का ई यहूदी हे, तेबी बी त्याल त्यावोय खूब कीव येनी. पासे तो त्या पाही गोयो आने त्या जखमावोय पट्टी बांदी.

“पासे त्या शोमरोनीय त्या माअहाल त्या खांदावोय टाक्या आने त्याल ती वाटीवोरे योका धर्मशाळेमाय लेय गोयो. जा त्याय त्या देखरेख चालू थोवी.’’

आगले दिही, त्या शोमरोनील त्या प्रवास चालू थोवना गरज आती. त्याय त्या धर्मशाळेमाय काम कोअनाराल माअहाल पोयसा देना. त्याय त्याल आख्या, “या माअहा देखरेख कोअजे. जर या पोयसाहाल सोडीन तो पोयसा खर्चायी तर पासे फिरी येयन आंय तुल त्या खर्चाला पोयसाहा भोरपाई कोय दीही.’’

पासे यीसूय त्या नियम जाअनारा माअहाल होद्या, “तुमा काय विचार कोअताहा? या तीन माअहा माने कुउ त्या माअहा पोडोसी हेय ज्याल लुटला आन ठोकला गोया आता?’’ त्याय उत्तर देना, “तोज जो त्यावोय दया कोयी. “येशूय त्याल आख्या,” तू जो आन तेहेकेज कोअजे.’’