28. धनवान जूवान अधिकारी .

योक दिही, योका जुवान अधिकाऱ्याय येशू पाही येयन त्याल होद्या, “ओ हारा गुरु, जोलामजुग्या जीवन मिळवाहाठी मान काय कोरा पोडी?’’ येशूय त्याल आख्या, “तू मान ‘हारो’ काहा आखतोहो? फक्त योकूज हारो हेय आने तो पोरमेहे हेय. पेन जर तूल जोलामजुग्या जीवन मिळवूना हेय तर देवा नियमा पालन को.’’

‘’मान कोही-कोही आज्ञाहा पालन कोअना गरज हेय?’’ त्याय होद्या. येशूय उत्तर देना, “खून मा कोअहे. सीनाळा मा कोअहे. चोरी मा कोअहे. ठोगहे मा. तो आयही-आबहा मान राखजे, आने तो पोडोशावोय सोवताहा रोकी माया कोअजे.’’

पेन त्या जुवान माअहाय आख्या, “आंय मा हानापोणाहीनेज यी बादी आज्ञेहे पालन कोअतो येनहो. मान कायम जीवता राअहाटी आमी बी काय कोअना गरज हेय?’’ येशूय त्यावोय नजर कोयी आने त्यावोय मोया कोयी.

येशूय उत्तर देना, “जर तू खोरो ऐरा मागतोहो तर जायीन तो बादां वेची दे आने ती धन गरीबाहामाय वाटी दे, आने तुल होरगामाय धन मिळी. तोवे येयन मा पाहाला ओय ले.’’

जी येशूय आख्या जोवे ती जुवान माअहू वोनाया तोवे ती खूब दु:खी ओय गोया, काहाका ती खूब धनवान आता आने त्याल त्या बादी मिळकत देयना नाय आती. ती फिरीन येशू पाहीने निंगी गोया.

तोवे येशूय त्या चेलहाल आख्या, “देवा राज्याम धनवान माअहा जायना खूब कोठीन हेय! हा योक धनवान माअहा देवा राज्यामाय जायना तुलना उंटा हुई नाकामाने निंगी जायना सोपा हेय.’’

जी येशूय आख्या ती चेला वोनाया तोवे त्याहाल नोवाय लागी. त्याहाय आख्या, “जर ई ऐहेके हेय ते पोरमेहेर काल वाचाडी?’’

येशूय चेलहावोय नजर कोयी आने आख्या, “माअहाहाटी सोवताहा तारन कोअना मुश्कील हेय. पेन पोरमेहेराहाटी कायज मुश्कील नाय हेय.’’

पतरसाय येशूल आख्या, “आमा चेला आमे बादाज काय सोडीन तो पाहला येनहा. ते आमे बक्षीश काय ओरी?’’

यीसूय उत्तर देना, “योका-योक माअहाय माहाटी गूअ, बाहा, बोही, आबहो, आयहो, पोहे, ई मिळकत सोडही, तो त्यापाने १०० पट वोदारी मिळवी आन जोलामजुग्या जीवन बी मिळवी. पेन ज्यें खूब पोयले हेय, त्ये पाहला ओरी, आने खूबज ज्ये पाहालाऱ्ये हेय त्ये पोयले ओरी.’’