29. दया नाय कोयनारा दासा गोठ

योक दिही, पतरसाय येशूल होद्या, “ओ मालका, मान मा बाहाल कोलादा माफ कोरा जोजे जोवे तो मा विरूद पाप कोहे? काय सात हुद?’’ येशूय आख्या, “सातदा नाय, पेन साता सत्तरदा!’’ त्याकोय, येशू आखना हेय का आमहाय कायम माफ कोरा जोजे. तोवे येशूय ई गोठ आखी.

येशूय आख्या, “पोरमेहेरा राज योका राजा रोका हेय जो त्या दासहापाने ईसाब होदे. त्या योक दास २,००,००० वोरहा कामानी बराबोर योक मोठा कर्जा कर्जदार आतो.

पेन तो दास त्या कर्जा चूकाडी नाय सोक्यो, याहाटी राजाय आख्या, “त्या कर्जा चुकाडाहाटी त्या माअहाल आने त्या कुंटूबाल दासा रुपाम वेची दा.’’

“त्या दासाय राजा आगला त्या गुडगाहावोय पोडीन आख्या, दया कोईन माआरी धीर दोअ, आने आंय तो कर्जा पूरा रकम चुकाडी दीही. राजाय दासावोय दया कोयी, याहाटी त्याय त्या बादा कर्जा माफ कोय देना आने त्याल जा देना.’’

“पेन जोवे तो दास राजाहीने बारे गोयो, तोवे त्याल त्या योक आऱ्यो दास मिळ्यो ज्या त्या चार मोयनाहा कामानी कर्जदार आतो. त्या दासाय त्या आऱ्या दासाल दोई लेदा आने आख्या, “जी तोवोय मा कर्जा हेय मान ती चुकाडी दे!’’

त्या आऱ्या दासाय गुडगाहावोय पोडीन आख्या, “दया कोयीन माआरी धीर दो, आने आंय तो कर्जा पूरी रक्कम चुकाडी दीही. “पेन यावोय दया नाय कोअता, त्या दासाय त्या आऱ्या दासाल जेलीमाय टाकी देना जावहुद का तो त्या कर्जाल चुकाडी नाय देय.’’

“जी काय जाअला त्याल बिजा दासाहाय देख्या आने त्या खूब निराश जाया. त्या राजाही गोया आने त्याल बादा आखी देखाडया.’’

“राजाय त्या दासाल हादीन आख्या, “ओ दुष्ट दास! माये तो कर्जाल याहाटी माफ कोअला आता काहाका तूये माअही विनंती कोअली. तुल बी ऐहेकेज कोरा जोजता आता. “राजाल ओली रोग कोय येनी का त्याय त्या दुष्ट दासाल जेलीमाय टाकी देना जावहुद का तो त्या कर्जाल पासे चुकाडी नाय देय.’’

तोवे येशूय आख्या, “मा होरगामाय रोनारो आबहो तुमे योका-योका आरी ई कोरी जर तुमे बाहाल तुमे मनाकोय माफ नाय कोअहा ते.’’