30. यीसू पाच हजार माअहाल खायना खावाडहे

येशूय प्रेषिताहाल प्रचार कोरा आने माअहाल हिकाडाहाटी खूब जुदा-जुदा गावामाय दोवाड्या. आने त्या ताने फिरी येना जाअ येशू आतो आने त्याहाल काय कोअया ती आखी देखाड्या. तोवे येशूय त्याहाल तलावा बिजी कानी त्याहा आरी शांत जागावोय जाईन थोडो समय आराम कोराहाटी होद्या. आने त्या उड्याम बोही गोये आने तलावा बिहिरी जागे निगी गोया.

पेन ताअ खूब माअहे आतें ज्याहाय येशूल आने चेलहाल उड्याम जाता देख्या. त्ये माअहे त्याहा आगला तलावा बिजी कानी कोडसा-कोडसावोय धावलेते गोयें. येशू आने चेलाह येयना आगला माअहा योक मोठो टोळो त्याहा वाट जोवे ताअ तो पोयला हीने आतो.

त्या टोळामाय बायहील आने पोहहाल नाय गोनता ५,००० कोअता वोदारी लोक आतां. येशूल त्या लोकहावोय खूब किंव येनी. येशू नोजरी,आय त्या लोक वोगर चाअनारा मेंडहा रोके आतें. याहाटी त्याहाल हिकाड्या आने त्याहामाय ज्या लोक बिमार आतां त्याहाल हारा कोया.

दिही बुडा समये, चेलहाय येशूल आख्या,’’ आमी वाआ लागी गोयही आने जागेजागे शेहर बी नाय हेय. या लोकहाल सोडी दे काहाका त्ये जाईन खायनाहाटी लेय येय.’’

पेन येशूय चेलहाल आख्या, “तुमा ऐलहाल खायनाहाटी कांय तेबी दा!’’ त्याहाय उत्तर देना, “आमा ऐहेके केहेके कोय सोकताहा? आमहावोय फक्त पाच बाख्यो आने बेन मासे हेय.’’

येशूय त्या चेलहाल आख्या का त्या टोळा लोकहाल पन्नास-पन्नास पांगातमाय बोहा आखा.

तोवे येशूय पाच बाख्यो आने बेन मासहाल लेयन होरगा ऐहे ऐया, आने त्या खायनाहाटी पोरमेहेराल धन्यवाद देना.

पासे येशूय बाख्यो आने मासाहाल तुकडा कोया. त्याय लोकहाल दाहाटी चेलहाल तुकडा देय देना. चेला त्या खायनाल वाटता रोया, आने ती पारवाया नाय! त्या बादा लोक खाईन दाराय गोया.

त्यापासे, चेलहाय त्या खायनाल योकठा कोया जी उगरी गोयला आने ती बारा सिबले बोराया! ती बादा खायना त्या पाच बाख्यो आने बेन मासहा हीने येनला आता.