37. यीसू लाजरसाल मोअलामाने जीवतो कोहे.

लाजरस नावा योक माअहू आता. त्याय बेन बोअहयो आत्या जीही नावे मरिया आन मार्था आता. त्ये बादे यीसू खूब हारे आर्ये आते. योक दिही, कुयें तेबी यीसूल आख्या का लाजरस खूब भिमार आतो. जोवे यीसूय ई वोनायो तोवे त्याय आख्या, ई भिमारी लाजरसाल मोयना आरी पारवाया नाय ओरी. त्याकोयता ई माअहाल देवा मान कोराहाठी कोशीश कोरी.

यीसू आपे आर्या वोय माया कोयतो आतो, पेन जाअ तोअ आतो ताअ त्याहाय बेन दिही हुदी वाट जोवी. त्या बेन दिहया पासे, त्याय आपे चेलहाल आख्या, याअ, पासी यहुदिया माय जाता. चेलहाय उतर देना, पेन ओ गुरु, आमी वायज वेले पोयला ताअने माअहे तुल मायी टाका आते! यीसूय आख्या, आमे आर्यो लाजरस हुवी गोयलो हेय, आन माअन त्त्याल जागाडना हेय.

यीसू चेलहाय उतर देना, ओ प्रभू, जर लाजरस हुवी रोयलो हेय, तर तोअ हारो ओय जाय. तोवे यीसूय त्याहाल खोरां-खोरां आखी देना, लाजरस मोयी गोयलो हेय. आंय खुश हेय का आंय ताअ नाय आतो, काहाका तुमा मावोय बोरसो कोय सकहा.

जोवे यीसू लाजरसा गावाम पोअचो तोवे लाजरसाल मोइ जायीन पोयलाज चार दिही ओय गोयला आता. मार्था यीसूल मिळाहाठी बारे येनी आन आख्या, ओ प्रभू, जर तूअ ईही रोतो तर मा बाहा नाय मोअतो.पेन आंय बोरसो कोहू का जी कायबी तूअ देवावोय मागहे तीअ तुल दिअ.

यीसूय उतर देना, पुनरुत्थान आन जीवन आंय हेतो. जी कादा मावोय बोरसो कोहे जर तीअ मोई बी जाय तेबी जीवी. जी कादा मावोय बोरसो कोहे तीअ कोदहीज नाय मोरी. काय तूअ यावोय बोरसो कोयतीही? मार्थाय उतर देना, ओ प्रभू, आंय बोरसो कोहू का तूअ देवा पोहो मशीहा हेय.

तोवे मरिया येनी. तीअ यीसू पागहामाय पोडीन आख्या,ओ प्रभू, जर तूअ ईही रोतो तर मा बाहा नाय मोअतो. यीसुय तील होद्या, तुमहाय लाजरसाल केसे थोवला हेय? त्याहाय त्याल आख्या, कबरीमाय. येअ आन ऐयी लेअ. तोवे यीसू रोअडा लाग्यो.

तीअ कबर योक गोडदो आतो ज्या बाअनाही योक दगडो थोवलो आतो. जोवे यीसू कबरीही पोअचो तोवे त्याय त्याल आख्या, दगडाल हरकाडी दाअ. पेन मार्थाय आख्या, ऐलाल मोयीन चार दिही ओय गोयला हेय. ऐला माने वास येतो ओरी.

यीसुय उतर देना, काय मां तुमहाल नाय आखला आता का जर तुमा मावोय बोरसो कोहा तर देवा शक्तील ऐहा? याहाठी त्याहाय दगडाल हरकाडी देना.

तोवे यीसूय उचे होरगा ऐहे ऐयीन आख्या, ओ आबा, मा वोनाय लाहाठी आंय तोअ धन्यवाद कोहू. आंय जांअतो हेतो का तूअ मा बारीमास वोनातो हो, पेन मां ई ईही उबला या बादा माअहा मदत कोरा हाठी आख्या काहाका या बोरसो कोए का तूयें मान दोवाडला हेय. तोवे यीसूय आवाज देनो, ओ लाजरस, बारे निगी ये!

सेले लाजरस बारे निगी येनो! तोअ आमी बी मोअलाहा फाडकाके वेटाळला आता. यीसूय त्याल आख्या, याअ मोअलाहा फाडकाल काडाअ ऐला मदत कोआ आन ऐलाल सुटो कोआ. याअ चमत्कारे कोय खूब यहुदियाहाय यीसू वोय बोरसो कोयो.

पेन यहुदियाहा सेवा कोयनारा आगेवान यीसूवे कुहुदाता लाग्या, याहाठी त्या योजना बोनाडा हाठी आरीज योकठा ओया का केहेके यीसू आन लाजरसाल माई टाकता यी.