39. यीसू होदपूस

आमी ई आर्दी राती वेल आती. त्या सैनिक यीसूल माहायाजका गोअ लीअ येना. काहाका तोअ यीसूल प्रश्न होदनारो आतो. पतरस दुरने पाहाला जाय रोयलो आतो. जोवे सैनिक यीसूल गोअमे लीअ गोया, तोवे पतरस बारे रुकायन स्वताहाल आगीकोय तापतो लाग्यो.

गोआ माअजे, यहुदी आग्यावानाहाय यीसू होदपूस कोई. त्ये त्या विरूद खोटी गोठ बोलाहाठी खूब खोटा साक्षीदार लीअ येना. तेबी, त्याहा गोठया योक-बिजा आरी खोर्या नाय आत्या. याहाठी यहुदी आग्यावान ई खोरा नाय ठरवी सक्या का तोअ कोहीबी गोठीम गुनेगार आतो. यीसूय कायज नाय आख्या.

सेंले, माहायाजकाय सिदा यीसूल ऐईन आख्या, आमहाल आख का काय तूअ जीवता देवा पोहो मशीहा हेय?

यीसूय अख्या, आंय हेय, आन तुमा मान देवा आरी बोठलो आन होरगामाने येतो बी देखहा. माहायाजकाय त्या फाडके फाडी लेदे काहाका जी यीसूय आख्या त्याल तीअ गोठीव खूब रअग कोई येनी. तोअ बिहीरा आग्यावानहा वोय बोंबल्यो, आमहाल ई आखा हाठी बिहीरा साक्षीदारा काज गरज नाय हेय का या माअहाय काय कोयाहा! तुमहाय स्वताहा त्याल ई आखता वोनायाहा का तोअ देवा पोहो हेय. त्याबदल तुमे काय निर्नय हेय?

बादा यहूदी आग्यावानहाय माहायाजकाल उतर देना, तोअ मोयना लायक हेय! तोवे त्याहाय यीसू डोळहावोय पट्ठी बांदी, त्यावोय थूप्या, त्याल ठोक्या, आन त्याअ चेहटा कोअयी.

आन पतरस, जोवे तोअ गोआ बारे वाट जोवतो आतो. तोवे योका कामारी पोहीय त्याल देख्या. तीअ त्याल आख्या, तूबी यीसू आरी आतो! पतरसाय नाय आखी देना. पासे, बिहिरी पोहीय ई गोठील आख्या, आन पतरसाय पासी नाय आखी देना. सेंले, आर्दा माअहाय आख्या, आमा जाअतेहे का तूअ यीसू आरी आतो काहाका तुमा बेनी गालील माने हेय.

तोवे पतरसाय आख्या, जर आय या माअहाल जाअतो तर देव माअन हाराप देय! ताबाडूज पतरसा ऐहेके रिते हाराप खायीन पासे,योक कुकडो वाहायो. यीसूय पाहाला फिरीन पतरसाल देख्या.

पतरस ताआने निगी गोयो आन हुकली-हुकलीन रोडयो. त्याज वेले, यीसूल दोई देनारो यहूदाय देख्या का यहुदी आग्यावानाय यीसूल मोरना दंड देनलो हेय. यहूदा खूब दुखी ओय गोयो आन जायीन स्वताहा मोई गोयो.

आमी त्या देशा राज्यपाल पिलातूस आतो. तोअ रोमा हाठी काम कोयतो आतो. यहुदी आग्यावान यीसूल त्या पांय लीन येना. त्याहा विचार आतो का पिलातूस त्याल मोरना दंड देय आन त्याल माई टाके. तोवे पिलातूसाय यीसूल होदयां, काय तूअ यहुदीयहा राजा हेय?

यीसूय उतर देना, तूअ खोराज आखला हेय. पेन मा राज ईहिने दोरतीवोरे नाय हेय. जर रोतो तर मां आवत्या मां हाठी लडाय कोयता. आंय दोरती वोर देवा बदल खोराज आखा येनली हेय. बादेज जाऐ खोरा वोय माया कोहे तीअ मा वोनायेहे. पिलातुसाय आख्या, तोअ खोरा काय हेय?

यीसू आरी गोठ कोयीन पासे, पिलातूस बारे गर्दीही यीन आख्या, आंय ऐहेके काय गोठ नाय देखू का ई माअहु माई टाका हाठी योग्य ओय. पेन यहुदी आग्यावान आन गर्दीय बोंबलीन आख्या, एलाल क्रूसवोय चडवी दाअ! पिलातुसाय उतर देना, तो काअहांबी खोटा कोरा गुनेगार नाय हेय. पेन त्या आजू बी मोठा आवाजाम बोंबला लाग्या. तोवे पिलातुसाय तिसर्यादा आख्या, तो गुनेगार नाय हेय!

पिलातूस गाबराय गोयो का तीअ गर्दी दंगा सुरुवात कोई दिअ, याहाठी तोअ त्याअ सैनिकाहा कोय ईसूल क्रूस वोय चडवा माअनी गोयो. रोमो सैनिकाहाय ईसूल चापकाहा मार देनो, आन त्याल राजा रोके फाडके पोवडये, आन त्याय टोलपाम काटहा बोनावलो टोपो थोव्यो. तोवे त्या ई आखीन त्याय चेहटा कोरा लाग्या ऐरा, यहुदीय हा राजा!