40. ईसूल क्रुसा वोय चडवी देतहे.

ईसू चेहटा कोईन पासे, सैनिक त्याल क्रुसा वोय चडवा हाठी ली गोयो. त्याहाय त्याल क्रूस उसलाड्यो ज्यावोय त्याल मोअनारा आता.

त्या सैनिक ईसुल त्या जागवोय ली येना त्याल “खोपडी” आखवाम येहे आन त्या आथा पागहाल क्रुसा वोय खिला ठोकी देना. पेन ईसुंय आख्यां, “ओ आबा, याहाल माफ कोओ, काहाका या नाय जांएत का या काय कोई रोयला हेय.” त्याहाय योक पाटी बी त्याअ डोलपीहीं टांअगी देनी. त्यावोय लेखला आता, “यहुद्याहा राजा.” पिलातांय ओ लेख लेखां आखलो आतो.

तोवे सैनिकाहाय ईसू फाडकाहा हाठी चिट्ठी टाकी. जोवे त्याहाय ऐहेके कोया तोवे त्याहाय ई भविष्योवानील पुरा कोअया जी आखती आती, “त्याहाय मा फाडकें त्याहामाय वाटी लेदें, आन मा फाडकाहा हाठी चिट्ठी टाकी.”

तांअ बेन डाखू बी आता. त्या सैनिकाहाल त्या वेळे क्रुसा वोय चड्वूला आता. त्याहाल ईसू चामखी कानी चोडावला आता. त्यामाने योका डाखवांय ईसू चेहटा कोअयी, पेन बिहीराय आख्या, “काय तूं नाय बियां का पोरमेहेर तुल डोंड दी? आपा खूब खोटां काम कोअना लीदे गुनेगारी हेता, पेन इं मांअहुं निरदोस हेय.” पासे त्यांय ईसूल आख्यां, “जोवे तूं तो राज्याम येहे तोवे दया कोईन मान ईत राखजे. ईसुंय उतर देना, “आजेज तूं मांआरी होरगामाय रोहे.”

यहूदी आगेवानहाय आन गर्दी माने बिहीरा लोकहांय बी ईसू चेहटा कोअयी. त्याहाय त्याल आख्या, “जर तूं पोरमेहेरा पोहो हेय, ते क्रूसा वोने नीचे उती ये आन सोवताहाल वाचाडी ले! तोवे आमा तोवोय बोरसो कोअहूं.”

तोवे त्या बादा देशा वादळा पुरां काळां ओई गोया, जरी तो दिहया समय आतो. इं बोपरी वेळे काळां ओअलां आतां, आन तीन तास हुदी ऐहेकेज रोयला आता.

तोवे ईसूय बोंबलीन आख्या, “पुरा जायां! ओ आबा, आंय मांअ आत्मा तो आथाम होपहूं.” तोवे त्याय त्या टोलपा नीचे कोअया आन त्या जीव सोडी देनो. जोवे तो मोअयो तोवे योक भूकंप येनो. तो मोठो पोडदो जो पोरमेहेरा हजरी हीने मांअहाल अलग कोए, तो उचेने ते नीचे हुद बेन भाग ओय गोयो.

त्या मोअना कोय, ईसूय मांअहा हाठी पोरमेहेराहीं येयना वाट उगाडी देनी. ईसू राखवाळी कोअनारा योका सैनिकाय जीं काय ओअलां आता तीं बादां देख्या तोवे त्याय आख्या, “खोरांज, ई मांअहू निरदोस आतां .ओ पोरमेहेरा पोहो हेय.”

तोवे योसेफ आन निकेदम नावा बेन यहूदी आगेवान येना. त्या बोरसो कोएत का ईसू ओज मशीहा आतो. त्याहाय पिलाता वोय ईसू कुडी मागी. त्याहाय त्या कुडील फाडकामाय वेटाळ्यां. आने त्या त्याल योका दगडामाने कातरीन बोनाडली कबरीमाय ली गोया आन त्येमाय थोवी देना. तोवे त्याहाय कबरी बाअना बंद कोराहाठी योक मोठो दोगाड ठोलाडीन थोवी देनो.