4. अब्राहामा आरे देवा वोचन .

रेली वार वोरहा पासे, दुनियामाय खूब माअहे रोत, आन त्यांहाय पासी देवा आन योक-बिजा विरूद पाप कोअयो. काहाका त्ये बादे योकूज भाषा बोले, त्याहाठी योकूज जागे योखठे जाये आन दोरती बोयदेअना देवा आज्ञाल मानीन योक शहर बोनाव्या.

त्या खूब घोमंडी आता, आन त्याहाल कोहोडा जीवन जीवा जोजे त्या त्याकोय त्याहाल देवा आज्ञा पालन कोयना नाय आता. ओलहाज नाय पेन त्याहाय योक घड बोनावा सुरुवात कोयी जो होरगा हुदी पोचे. देवा देख्या का जर ये योखटे मिळीन खाराब कोअते रोये, ते त्ये खूब पापी कामहाल कोरी.

त्याहाठी देवाय त्यांहा भाषाल खूब जुदिजुदी भाषांम बदल कोय देनो आन त्या माहाल बादी दोरतीवोय फेलावी देना. ज्या शहराल त्याहाय बोनावा सुरुवात कोयली त्याल बाबेल आखी, त्या अर्थ हेय ‘’गडबड.’’

वार होव वोरहा पासे, देवाय अब्राम नावा माअहा आरे गोठ कोयी. देवाय त्याल आख्यां, ‘’तोअ देश आन कुटुंबाल सोडीन त्या देशांम निगी जो जी आय तुल देखाडीही. आय तुल बोरकत दिही आन तोहीने योक मोठी जाती बोनावीही. आय तो नाव मोठो कोही. जो तुल बोरकत दी त्याल आय बोरकत दीही, आन जो तुल हाराप दि त्याल आय हाराप दिही. तोकोय दोरतीवोरे बदी जातीहील बोरकत मिळी,’’

सेंले अब्राहामाय देवा गोठ मानी. त्याय आपे बादा नोकराहाल आन आपे बादी मिळकत आपे दोनारी साराल लेदा आन त्या देशाम,कनान देशांम निगी गोयो जीअ देवाय त्याल देखाडला.

जोवे अब्राहाम कनानाम पोचो तोवे देवाय त्याल आख्या, ‘’आपे चारीचमखी ऐअ. आय तुल ओ बादो देश दिही आन तोअ पोहे सदा यावोय राज कोरी.’’ तोवे अब्राहाम त्या देशामाय रोय गोयो.

मलीकीसीदक नावा योक माअहू आता जी उचामउचा देवा याजक आतो. योक दिही अब्राहाम लोडाय कोयन पासे ये रोयलो आतो तोवे तो आन अब्राहाम मिळ्या. मलीकीसीदीकाय अब्राहामाल बोरकत देनी आन आख्या ‘’ उचामउचो देव जो होरगा आन दोरती मालिक हेय तो तुल बोरकत देय.’’ पासे अब्राहामाय लोडाई जीकल्यो बादी वस्तूहू दशाश मलीकीसीदीकाल देना.

वार वोरहे निगी गोये, पेन आमी बी अब्राहाम आन साराल कायज पोहे नाय आते. देवाय अब्राहामा आरे गोठ कोयी आन पासे करार कोअयो का त्याहाल योक पोहो ओरी आन जेहेके वादळाम चांदाले हेय तेहेकेज त्याल खूब पोहे ओरी. अब्राहामाय देवा करारावोय बोरसो थोव्य. देवाय आख्या का अब्राहाम योक भक्ती कोनारा माअहू हेय काहाका त्याय देवा करारावोय बोरसो कोअलो आतो.

तोवे देवाय अब्राहामाआरे योक गोठ कोयी. खोरा रुपमाय, योक गोठ बेन गटा विसमे योक-बिजा हाठी काम कोरा होमजुना आता. देवाय अब्राहामा आरे तो करार कोअयो जोवे अब्राहाम हूवी गोयो, पेन तोअ तोवेबी देवा वोनाये. देवाय आख्या, ‘’आय तो आंगामाने उचबाडीन तुल तोअ योक होरो पोहो दिही. आय तोअ पोहोहाल ओ कनान देश दाहू. ‘’ पेन आमी बी अब्राहामा पोहे नाय आते.