5. मानता पोहो.

अब्राहाम आन साराय कनानान माय पोचीन दहा वोरहा पासे, आमी हुदी बी काय पोहे नाय आते. त्याहाठी, अब्राहामा दोनारी साराय त्याल आख्या, काहाका देवाय आमी हुदी मान पोहाल जन्म दाहाठी शक्ती नाय देनही आन आमी आंय पोहाल जन्म दाहाठी खूब डाई हेती,ऐअ मां सेविका हागार ई हेय. यीआरे वोराड कोयले काहाका माहाठी योक पोहां जन्म दी सकी.

सेंले अब्राहामाय हागारा आरे वोराड कोय लेदा. हागारील योक पोहो जायो, आन अब्राहामाय त्या नाव ईश्माएल थोव्या. पेन सारा हागाराल कुहूदाये जोवे ईश्माएल तेरा वोरहा आतो,देवाय पासी अब्राहामा आरे गोठ कोयी .

देवाय आख्या, आंय बादी-शक्तीवाळो देव हेय आंय तोआरे योक वोचन लाहु तोवे अब्राहामाय दोरतीवोय पोडीन पागे पोड्यो.देवाय अब्राहामाल यीबी आख्या, तूअ खूब बादी जाती आबहो ओहे. आंय तुल आन तोअ पोहोहाल हारी दोरती होरा हाठी कनान देश दिही आन आंय बारीमास त्याहा देव ओही.तुल आपे गोअने बादा आदम्याहाल मायअंगा चामडी काडना हेय.

तोअ दोनारी साराय योका पोहाल जन्म दी – तो मानता पोहो ओरी. त्या नाव इसहाक थोवजे. आंय त्याआरे मांअ वोचन इतवी राखही आन तोअ योक मोठी जाती बोनावी.आंय ईश्माएला कोयबी योक मोठी जाती बोनावाही, पेन मां वोचन इसाका आरे रोय, तोवे देवाय अब्राहामा नाव बदलील अब्राहम कोय देना,त्या अर्थ हेय खूबजाहा आबहो. देवाय साराय नाव बदलील सारा कोय देना, त्या अर्थ हेय खोरीआयहो.

त्याअ दीही अब्राह्माय त्या गोअने बादा आदम्याहा मायअंगा वोरे चाबडा काड्या. जोवे योक वोरहा निगी गोया पासे,जोवे अब्राहम १०० वोरहा आतो आन सारा ९० वोरहा आती,तोवे साराय अब्राहमा पोहाल जन्म देनो.जेहेके देवाय त्याहाल आखला आंता त्याहाय त्या नाव इसाक थोव्या.

जोवे इसाक जुवान जायो तोवे देवाय इं आखीन अब्राहमा विश्वासा पारोख कोयी, तोअ योकूलता पोहाल ले, आन त्याल मां सेवाहाठी माय टाक. पासे अब्राह्माय देवा गोठ मानी आन आपे पोहाल देवा सेवेहाठी तीयारी कओयो.

जोवे अब्राहम आन इसाक सेवा कोअना जागा जाए लाग्या तोवे इसाकाय होद्या,ऐ आबा, आपहावोय सेवेहाठी लाकडेते हेय पेन सेवेहाठी बोकडो केस हेय? अब्राह्माय आख्या, ऐ मां पोहा, देव सेवेहाठी बोकडो दी.

जोवे त्या सेवा कोअना जागाव पोची गोया, तोवे अब्राह्माय इसाकाल बांदीन वेदीवोय हुवाडी देना. तोअ आपे पोहाल माअनारोज आतो आन देवाय आख्या, उबोरो! पोहा नुकसान मा कोअहे! आमी आंय होमजी गोयहो का तुयें मां बीख राखली हेय काहाका तुयें योकूलता पोहाल बी मांहाठी वाचाडी नाय थोव्या,

जागेज अब्राह्माय योका मेंडाल देख्या जीअ जाडहाम गुसवालां आंता. इसाका बदले सेवाहाठी मेंडाल वापऱ्या.अब्राह्माय ख़ुशी-ख़ुशी मेंडाल सेवेहाठी चडवी देना.

तोवे देवाय अब्राह्माल आख्या काहाका तूअ मांहाठी बादाज काय दा तीयार आतो, ईही हुदी का आपे योकलुता पोहालबी, त्याहाठी आंय तुल बोरकत दाअ वोचन लाहु. तोअ पोहे बादळामाने चांदूलाहा कोयता बी वोदी रोय. काहाका तूअ मां आज्ञा मानही त्याहाठी आंय तोअ कुटुबाकोय दोरती बादी जातील बोरकत दिही.