6. देव इसाका हाठी व्यवस्था कोहे .

जोवे अब्राहम खूब डाअयो होय गोयो तोवे त्या पोहो इसाक योक जुवान ओय गोयो. त्याहाठी अब्राहमाय त्याअ योका सेवाकाल त्या पोहो इसाक याहाठी ज्या देशामायने योक दोनारी लाहाठी दोवाड्या जाअ त्या जातुले आते.

जाअ अब्राह्मा जातुले रोय त्या देशांम जाहाठी योक मोठी वाटी पासे देवाय त्या सेवका वोळखात रिबका आरे कोअडी. ती अब्राह्मा बाहा पोहो-पोही.

रिबका आपे कुंटुंबाल सोडीन त्या सेवका आरे पासी जाअहाठी मानी गोयी. जेहेके ती जाय पोची इसाकाय तीअ आरे वोराड कोय लेअदा.

वार वोरहा पासे, अब्राहम मोय गोयो.तोवे देवाय अब्राह्मा पोहो इसाकाल, अब्राह्मा आरे कोअला वोचना लिदे बोरकत देनी. त्या वोचनामाय देवा योक मानता आंता का अब्राह्मा मोजाय नाय ओले पोहे ओरी.पेन इसाका दोनारी रिबकाल पोहे नाय जाअये.

इसाकाय रिबका हाठी पार्थना कोअयी,आन देवाय तीअ डेडीम योकूजदा बेन पोहोहा दीही राअहाठी शक्ती देनी. जोवे त्येअ पोहे रिबका डेडीम आते तोवे त्येअ योक-बिजा आरे जुलाया टेक्ये,त्याहाठी जी काय ओय रोयला आंता रिबकाय ती देवाल आखी देना.

देवाय रिबकाल आख्या, तूअ बेन पोहोहाल जन्म देहे. त्याहा पोहे बेन जुदी-जुदी जात्या बोनी. त्या योक-बिजा आरे जुलायी. पेन मोठा पोहाहीने जन्म ओनारी जात वांहाना पोहाहीने ओनारी जाती आज्ञा मानारी ओरी.

जोवे रिबका पोहोहा जन्म जायो, तोवे मोठो पोहो लाल आन आंगावोय जोट्ये आते,आन त्याहाय त्याय नाव इसाव थोव्या.तोवे वाहानो पोहो एसावा पागाल दोईन जन्माल येनो, आन त्याहाय त्याय नाव याकूब थोव्या.