43. मंडळीही सुरुवात ओहे .

ईसू होरगा माय निंगी जायना पासे, चेला यरुशेलेम माय रुकाया जेहकोय का ईसूय त्याहाल कोरा हुकुम देनलो आतो. तांआने बोरसो कोयनारे मांअहे योकदाज बादे मिळीन प्रार्थना कोरा हाटी योकठें ओअया कोयते आते.

दर वोरही, वोलानडन सणा ५० दिह्या पासे, यहूदी माअहे पेन्तिकोस्टोल नावा योक खूब महत्वा दिही वाळते आते. पेन्तिकोस्टोल ती वेळ आती जोवे यहूदी माअहे गोंवहा वाडनील वाळते आते. बादी दुनिया माने यहूदी माअहे पेन्तिकोस्टोल दिह्याल वाळाहाटी यरुशेलेम माय येने. ये वोरही पेन्तिकोस्टोल वाळना समये ईसू होरगा माय निंगी जायना लगबग योक आठवडा पासे येनलो आतो.

त्ये समये बादे बोरसो कोयनारे माअहे योकदाज योकठे आते, तोवे ज्या गोआमाय त्यें आते योकदाज तीं जोरमे वाराकोय बोराय गोया. तोवे आगी जाळी ऐहकोय देखानारा बादा बोरसो कोयनारा माअहा टोलपा उपे प्रकट ओअया. त्यें बादे पवित्र आत्मा कोय बोराय गोये आने त्याहाय बिहिरी भाषा माय यहोवा पोरमेहेरा स्तुती कोअई. यो त्यो भाषा आत्या ज्याहाल बोलाहाटी त्याहाल पवित्र आत्माय शक्ती देनली आती.

जोवे यरुशेलेम माय रोयनारा माअहाय त्या आवाजा वोनाया, तोवे त्यें गर्दी कोयीन ई एराहाटी येने का काय ओय रोयला आता. त्याहाय बोरसो कोयनारा माअहाल यहोवा पोरमेहेरा कोय कोअय गोयले मोठा-मोठा कामहा गोसना कोयता वोनाये. त्याहाल नोवाय आती काहाका त्यें त्या कामहाल त्याहा भाषेमाय वोनाय रोयले आते.

त्यामाने आरदा माअहाय आख्यां का त्या चेला पिदला हेय. पेन पतरस उबो रोयो आने त्याहाल आख्यां, ‘’मा गोठ वोनाया! यें माअहे पिदले नाय हेय! त्याकोअता, जी काय तुमा देखतेहे ती हेय जी जोएल भविष्यो कोयनाराय आखला आता का ओरी: यहोवा पोरमेहेरांय आख्यां, सेंल्या दिह्यामाय, आंय मा आत्मा रेडही.’’

‘’ओ इस्राएली मांअहा, ईसू योक ओहोडा माअहू आतां ज्याय ई देखाडा हाटी का तो कुंऊ आतो खूब चमत्कारी कामे कोयले आते. त्याय यहोवा पोरमेहेरा शक्ती कोय खूब चमत्कारी कामहाल कोअला आता. तुमा ई जांआतेहे, काहाका तुमहाय या कामहाल देखला हेय. पेन तुमहाय त्याल क्रूसावोय चढवी देनो!’’

‘ईसू मोई गोयो पेन यहोवा पोरमेहेरांय त्याल मोअला माने जीवतो कोय देना. त्याय ई गोठील पुरा कोय देना ज्याकोय योक भविष्यो कोयनाराय लेखला आता: तुं तो पवित्र लोकहाल कबरी माय होडा नाय देहे.’’ आमा साक्षी हेय का ईसूल पासी जीवतो कोय देना.’’

‘’पोरमेहेर आबाय आमी ईसूल त्या हुदा आथा ऐसे बोहाडीन मान देनलो हेय. आने ईसूय आमे हाटी पवित्र आत्मा दोवाडला हेय जेहकोय का त्याय करार कोअलो आतो तो दोवाडी. पवित्र आत्माज त्या कामहाल ओअरा दि रोयलो हेय ज्याहाल तुमा एयी रोयले हेय आने वोनाय रोयले हेय.’’

‘’तुमहाय त्या माअहाल, ईसूल क्रुसावोय चढवी देना. पेन खोरा रुपाकोय जांई ला का यहोवा पोरमेहेरांय ईसूल बादी वस्तूहू वोय पोरमेहेर आने मशीहा बेनी नेमलो हेय!’’

पतरसा गोठ्यो वोनानारे माअहे त्याकोय आखल्या गोठही कोय माजेने बदलाय गोयले आते. याहाटी त्याहाय पतरस आने चेलहाल होद्यां, ‘’ओ बाहाहाय, आमहाय काय कोरा जोजे?’’

पतरसाय त्याहाल आख्यां, ‘’तुमहा माने दरेक सोवताहा पापहा पश्चताप कोए काहाका यहोवा पोरमेहेर तुमे पाप माफ कोए, आने ईसू नावाकोय बाप्तिस्मा लेय. तोवे तो तुमहाल दाना रुपामाय पवित्र आत्मा बी दी.

पतरसाय जी आख्यां त्यावोय लगबग तीन ओजार माअहाय बोरसो कोअयो आने ईसू चेला बोनी गोया. त्याहाय बाप्तिस्मा लेदा आने यरुशेलेमा मंडळी भाग बोनी गोया.

जोवे प्रेषिताहाय त्याहाल हिकाड्या तोवे बोरसो कोयनाराहाय ताबाडूज वोनाया. त्यें कोवेबी मिळते आते आने योखठें येयन खायना खाते आते, आने त्याहाय कोवेबी योक-बिजा हाटी प्रार्थना कोअई. त्याहाय मिळीन यहोवा पोरमेहेरा स्तुती कोईन आने जी काय बी त्याहापांय आतां त्याहाय योक-बीजाल वाटनी कोअया. शेहेरा माने दरेक माअहु हारा विचार राखता आतां. दर दिही, वोदारी आने वोदारी माअहे बोरसो कोअते गोये.