46. पौल ख्रिस्ती बोनी जाहे

शाउल नावा योक माअहू आतां ज्याय ईसू वोय बोरसो नाय कोअलो आतो. जोवे तो जुवान आतो, तोवे त्याय स्तेफनाल माअयनारा माअहा फडकाहा राखवाळी कोअली आती. पासे, त्याय बोरसो कोअनाराहाल तारास देनलो आता. त्याय यरुशेलेमाय गोअ-गोअ जायीन माअहाल आने बाईहील दोईन जेलीमाय टाकला आतां. तोवे माहायाजकाय शाउलाल दमिश्क शेहेरामाय जांअहाटी परवानगी देनी. त्याय तांआने ख्रिस्ती माअहाल दोरा आने त्याहाल पासी यरुशेलेम माय लिया हाटी शाउलाल आख्यां.

सेले शाउलाय दमिश्कोल जांअहाटी मुसाफरील सुरुवात कोअई. त्या शेहेरा माय पोचा वायज पोयला, त्या च्यारी-चोमखी वादळा माने योक उजवाडो चमक्यो, आने तो दोरतीवोय पोडी गोयो. शाउल काल तेबी आखतां वोनायो, ‘’ओ शाउल! ओ शाउल! तुं मान काहा सताडी रोयलो हेय?’’ शाउलाय होद्या, ‘’ओ पोरमेहेरा तुं कुंऊ हेय?’’ ईसूय त्याल उतर देना, ‘’आंय ईसू हेय. तुं मान सताडी रोयलो हेय!’’

जोवे शाउल उठयो तोवे तो देखी नाय सकतो आतो. त्या आऱ्या त्याल दमिश्कमाय लेय गोया. शाउलाय तीन दिही हुदी कायज खादाला- पिदाला नाय आता.

दमिश्कम माय हनन्या नावा योक चेलो आतो. यहोवा पोरमेहेरांय त्याल आख्यां, ‘’त्या गोअ जो जांअ शाउल रोयलो आतो. तो आथहाल त्यावोय थोव काहाका तो पासी एअरा लागे.’’ पेन हनन्याय आख्यां, ‘’ओ पोरमेहेरा, आंय वोनालो हेय का इं माअहू बोरसो कोअनाराहाल केहकोय वोखो देखाडहे.’’ पोरमेहेरांय त्याल उतर देना, ‘’जो! आंय ऐलाल यहुदी लोकहा माने बिहिरी जाती लोकहाल मा नावा कोय प्रचार कोअरा हाटी निवडी लेदला हेय. तो मा नावा हाटी खूब दुख सहन कोरी.’’

सेंले हनन्या शाउला पाहीं गोयो, त्या आथहाल त्यावोय थोव्या, आने आख्यां, ‘’ईसूय, जी ईही येयना तो वाटीमाय तोवोय प्रकट ओअलो आतो, मान तोपांय दोवाडला हेय काहाका तुं पासी एअरा लागहे, आने पवित्र आत्मा तुल बोय दिअ.’’ ताबाडूज शाउल पासी एअरा हाटी हारो ओय गोयो, आने हनन्याय त्याल बाप्तिस्मा देना. तोवे शाउलाय खायना खादा आने पासी शक्तीवाळो ओय गोयो.

तांव हुदी, शाउलाय दमिश्क माय रोनारा यहुदियामाय प्रचार कोरा सुरुवात कोय देनी. त्याय आख्यां, “ईसूज पोरमेहेरा पोहो हेय!’’ यहूदी माअहाल नोवाय लागी, काहाका शाउलाय तर बोरसो कोअनाराहाल माई टाका कोसीत कोअली आती, पेन आमी त्याय ईसूवोय बोरसो कोअलो आतो. शाउलाय यहुदियाहा आरी बोला-बोली कोअई. त्याय देखाड्या का ईसूज मशीहा आतो.

खूब दिहया पासे, यहूदीयहाय शाउलाल माई टाका योजना बोनाडी.त्याहाय त्याल माई टाका हाटी शेहेरा फाटकीवोय माअहाल दोवाडया. का त्यें राखवाळी कोय पेन शाउलाय त्या योजना बदल वोनाय लेदा, आने त्या आरह्याहाय बोचीन निगा मदत कोअयी. योकी राती त्याहाय त्याल सिबलामाय बोहाडीन शेहेरा बितडा वोरे नीचे उताडी देना. दमिश्क माने बोची निगीन पासे शाउलाय ईसू बदल प्रचार कोअना चालू राख्या.

शाउलाय प्रेषिताहाल मिळाहाटी यरुशेलेम माय गोयो, पेन त्या त्याल बीअता आतां. तोवे बोर्नबास नावा योक माअहू शाउलाल प्रेषिताहाही लेय गोयो. त्याय त्याहाल आख्यां का शाउलाय केहकोय हिमात राखीन प्रचार कोअलो आतो. त्या पासे, प्रेषिताहाय त्याल स्वीकार कोय लेदा.

आरदा बोरसो कोअनारा ज्या यरुशेलेमा तारासा हिने नाठले आते त्यें दूर अंताकीया शेहेरामाय निगी गोयले आते आने ईसू बदल प्रचार कोअते आते. अंताकीया माय रोनारे माअहे वोदारी यहूदी नाय आते, पेन पोयलादा त्याहामाने खूबज माअहे ख्रिस्ती बोनी गोये. बोर्नबास आने शाउल या नोवा ख्रिस्ती माअहाल ईसू बदल आने हिकाडा हाटी तांअ गोये आने मंडळील मजबूत कोअया. ईसू वोय बोरसो कोअनाराहाय पोयलेदा अंताकीयामाय ‘’ख्रिती’’ आखाड्या.

योक दिही, अंताकिया ख्रिती माअहे उपवास कोईन प्रार्थना कोय रोयले आते. पवित्र आत्माय त्याहाल आख्यां, ‘’माहाटी बोर्नबास आने शाउलाल त्या कामाल कोरा हाटी जुदो कोय दे ज्याल कोरा हाटी माये त्याहाल हादला हेय.’’ याहाटी अंताकीया मंडळीय बोर्नबास आने शाउला हाटी प्रार्थना कोअयी आने त्यावोय त्या आथ थोव्या. तोवे त्याहाय त्याहाल बिहीरा जागावोय ईसू बदल हारी गोठ प्रचार कोरा हाटी दोवाड्या. बोर्नबास आने शाउलाय जुदी-जुदी जाती माअहाल हिकाडी देना, आने खूब माअहाय ईसू वोय बोरसो कोअयो.