15. वायदा रो देश

अन्त मे, अबार वो समय आवी ग्यो हो के इस्राएली लोग वायदा रा देश, कनान मे प्रवेश करीं। और वणां देश मे यरीहो नाम रो एक नगर हो। और वणांरी सुरक्षा रे लिए वणांरे चारों तरफ एक मजबूत दीवार ही। और यहोशूए वणां नगर मे दो भेदियां ने भेज्या। और वणा नगर मे राहाब नाम री एक वेश्या रेती ही। और वणींए वणां भेदियां ने आपणां घर मे हपाया, और पसे बाद मे वणांने नगर हूं वचीन निकलवा मे मदद किदी, क्योंकि वा परमेश्वर पे विश्वास करती ही। और जणीं समय इस्राएली लोग यरीहो ने नाश करेगा, जेरां वणां राहाब और वणींरे परिवार री रक्षा करवा रो वायदो किदो हो।

इस्राएली लोगां ने वायदा रा देश मे प्रवेश करवा रे लिए यरदन नदी ने पार करणी ही। और परमेश्वरे यहोशू हूं केयूं के, "याजकां ने पेले जावा दे।" और जेरां याजकां यरदन नदी मे आपणें कदमां ने रख्या, तो पाणी री धार रो बेहणो थमी ग्यो। जणांहु के इस्राएली लोग नदी रे बिजी तरफ हुकी जगा पे पार जाई सकीं।

वणां लोगां यरदन नदी ने पार कर लिदी, तो परमेश्वरे यहोशू हुं केयूं के थां यरीहो पे हमलो करवा रे लिए तैयार रियो, और वो नगर बोत ही दृढ़ और मजबूत हो। और पसे परमेश्वरे वणां लोगां हुं केयूं के वणांरे याजकां और सैनिकां ने छः दनां तक वणां नगर रे चारों तरफ चक्कर लगाणों है। अणीं वाते याजकां और सैनिकां असूंस किदूं।

पसे हातवे दन, इस्राएलियां वणां नगर रे चारों तरफ हात बार और चक्कर लगाया। और वणां नगर रे चारों तरफ हातवी बार चक्कर लगावी लेवा रे बाद, याजकां आपणीं तूरहियाँ ने फूंक्यी और सैनिकां उँची आवाज हूं परमेश्वर री जय-जयकार किदी।

पसे यरीहो रे चारों तरफ री दीवार पड़ी ग्यी! और जसी परमेश्वरे आज्ञा दिदी ही इस्राएलियां वणां नगर री हर एक चीजां ने नष्ट कर दिदी ही। पण वणां केवल राहाब और वणींरे परिवार ने छोड़ी दिदो, ज्यो इस्राएलियां रो भाग वणीं ग्यो हो। और जेरां कनान मे रेवा वालां बिजां लोगां हुण्यो के इस्राएलियां यरीहो ने नष्ट करी दिदो है, तो वा सब समकी ग्या के इस्राएली लोग वणांपे भी हमलो करेगा।

परमेश्वरे इस्राएलियां ने आज्ञा दिदी ही के कनान मे रेवा वालीं कणीं भी जाति रे हातीं हमझौतो मत करजो। पण गिबोनिया नामक एक कनानी जातिए यहोशू हूं झूठ केयूं, के वा कनान हुं छेटी एक स्थान रा रेवा वालां हीं। और पसे वणां यहोशू हातीं हमझौतो करवा रो अनुरोध किदो। और यहोशू और इस्राएली अगुवां परमेश्वर हुं नी पुछयूं के वणांने कई करणों चावे है। अणां रे बजाए वणां गिबोनियां रे हातीं हमझौतो करी दिदो।

तीन दन बाद, इस्राएलियां ने पतो चाल्यो के गिबोनी लोग कनान मेईस रेता हा। अणीं वाते वा क्रोधित वेई ग्या क्योंकि गिबोनियां वणांने धोखो दिदो हो। पण वणां वणांरे हातीं किदा ग्या हमझौता ने बणांयो राख्यो, क्योंकि वो हमझौतो परमेश्वर रे हामे किदो हो और पसे थोडाक समय रे बाद, कनान मे रेवा वालीं एक बिजी जाति, एमोरियां रा राजाए हुण्यों के गिबोनियां इस्राएलियां रे हातीं हमझौतो करी लिदो है। अणीं वाते वणां आपणीं-आपणीं सेनाओं ने एक करिन एक बड़ी सेना वणांई और पसे गिबोनियां पे हमलो करी दिदो। पसे गिबोनियां वणांरी मदद करवा रे लिए यहोशू कोडे एक हमिचार भेज्यो।

पसे यहोशूए इस्राएलियां री सेना ने इकट्ठी किदी और गिबोनियां रे कोडे पोंचवा रे लिए वा पुरी रातभर चाल्या। और सुबे भोर मे वणां एमोरियां री सेना ने चकित करी दिदी और वणांपे अचानक हमलो कर दिदो।

वणें दन परमेश्वर इस्राएलियां रे लिए लड्यो। और वणीं एमोरियां ने घबरावी दिदा और वणीं बड़ा-बड़ा कड़ा पाड़िन बोत सा एमोरियां ने मारी नाख्या।

परमेश्वरे सूरज ने भी आकाश मे एक स्थान पे थमावी दिदो ताकि इस्राएलियां ने पर्याप्त समय मलीं जाए ताकि वा एमोरियां ने पुरी तरह हुं हरावी देई। और परमेश्वरे इस्राएलियां रे लिए एक बड़ी विजय प्राप्त किदी।

जेरां परमेश्वरे वणीं सेनाओं ने हरावा रे बाद, बोत सी कनानी, जाति रा लोग इस्राएल पे हमलो करवा रे लिए इकट्ठा वेया। पण यहोशू और इस्राएलियां हमलो करिन वणांरो सर्वनाश करी दिदो।

अणां युद्धां रे बाद, परमेश्वरे इस्राएल रा प्रत्येक गोत्र ने वायदा रा वणां देश मे वणांरो भाग दिदो। पसे परमेश्वरे इस्राएल ने वणांरी सब सीमाओं पे शान्ति प्रदान किदी।

जेरां यहोशू बूढ़ो वेई ग्यो तो वणीं इस्राएल रा सब लोगां ने एक हातीं बुलाया। पसे यहोशूए वणां लोगां ने याद करायो के वणां वणीं वाचा रो पालन करवा रो वायदो किदो है, ज्या परमेश्वरे वणांरे हातीं सीनै पर्वत पे बाँध्यी ही। और वणां लोगां परमेश्वर रे प्रति विश्वासयोग्य रेवा और वणांरी व्यवस्थाओं रो पालन करवा रो वायदो किदो।