16. सोड़ावणां वालों

यहोशू रे मरवा रे बाद इस्राएलियां परमेश्वर री आज्ञाओं ने नी मान्यी। और वणां परमेश्वर रा नियमां रो पालन नी किदो, और वणां वायदा रा देश कनान हुं, वसया हकां कनानियां ने भी बाण्णे नी निकाल्या। और इस्राएलियां आपणें हासा परमेश्वर, यहोवा ने छोडिन कनानियां रे देवी-देवताओं री उपासना करणों आरम्भ कर दिदो हो। और इस्राएलियां कोडे कोई राजा नी हो, अणीं वाते जणांए ज्यो सई लागो वणां वो किदो।

परमेश्वर री आज्ञा नी मानवा रे द्वारा इस्राएलियां एक पद्धति ने आरम्भ करी दिदी ही, जणींने बोत बार दोहरायो ग्यो हो। और ये पद्धति अणीं प्रकार हुं चाल्यी के इस्राएली बोत समय तक परमेश्वर री आज्ञा नी मानेगा, पसे वो वणांने वणांरे शत्रुआं हूं पराजित करावणा रे द्वारा दंडित करेगा। और या शत्रु वणांरी सब चीजां ने लूटी लेगा, और वणांरी धन सम्पत्ति ने नाश करी देगा, और वणांमे हुं बोत सा लोगां ने मारी नाखेगा। पसे जेरां इस्राएलियां रा शत्रु वणांपे बोत सा सालां तक अत्याचार करेगा, और वणांरे बाद इस्राएली आपणें पापां रो पश्चाताप करेगा और परमेश्वर हुं वणांने वचाडवा रे लिए प्रार्थना करेगा।

हर बार जेरां इस्राएली पश्चाताप करेगा तो परमेश्वर वणांने वचाड़ेगा। और वो एक छुड़ावा वाला रे द्वारा असो करेगा - और एक असो व्यक्ति ज्यो वणांरे शत्रुआं रे विरुद्ध लड़ेगा और वणांने पराजित करेगा। पसे देश मे शान्ति वेगा और वो छुड़ावा वालों वणांपे अच्छी तरह हूं शासन करेगा। और परमेश्वरे वणां लोगां ने वचाडवा रे लिए बोत सा छोड़ावा वालां ने भेज्या। पसे परमेश्वरे नजदीक रीस एक शत्रु जाति, मिद्यानियां रे द्वारा इस्राएलियां ने पराजित करावणा रे द्वारा फेर हुं असो किदो।

मिद्यानियां हात सालां तक इस्राएलियां री फसलां ने लूट्यी। पसे इस्राएली लोग बोत ही समकी ग्या हा। अणीं वाते वा मंगरां री गुफाओं मे जाईन हपी ग्या हा ताकि मिद्यानी लोग वणांने होजी नी सकीं। और आखिरकार, वणांने वचाडवा रे लिए वणां परमेश्वर ने पुकारयो।

गिदोन नाम रो एक इस्राएली पुरुष हो। और एक दन, वो गुप्त जगा मे गऊँ खटुकी रेयो हो, ताकि मिद्यानी लोग वणांए चुरावी नी सके। और जेरां यहोवा परमेश्वर रा स्वर्गदूते गिदोन रे कोडे आविन पसे वणांहुं केयूं के, "हे शूरवीर सूरमा, परमेश्वर थारे हातीं है। अणीं वाते थूं जा और इस्राएलियां ने मिद्यानियां हुं वचाड़।"

गिदोन रा पिता कोडे मूर्ति ने समर्पित एक वेदी ही। और सबहूं पेली वात ज्या परमेश्वरे गिदोन ने करवा रे लिए केयी ही वा वणीं वेदी ने तोड़णीं ही। पण गिदोन लोगां हूं समकतो हो, अणीं वाते वणीं रात वेवा रो इन्तजार किदो। पसे वणीं वेदी ने तोड़िन टुकड़ा-टुकड़ा कर दिदा। और वणीं परमेश्वर रे लिए एक नवी वेदी वणांई और वणींपे परमेश्वर रे लिए बलि चढ़ाई।

बिजे दन सुबे लोगां देख्यो के कणींक वेदी ने तोडिन टुकड़ा-टुकड़ा कर दिदा हीं, अणीं वाते वा बोत ही क्रोधित वेया। पसे वा गिदोन ने मारी नाखवा रे लिए वणांरे घरे ग्या, पण गिदोन रा पिताए केयूं के, "थां क्यूँ आपणें देवता री सहायता करवा रो प्रयास करी रेया हो? यदि वो एक हासो देवता है, तो वणांने आपणीं सुरक्षा खुद करवे दियो!" क्योंकि वणीं असूं केयूं हूं अणीं वाते लोगां गिदोन ने नी मारयो।

पसे इस्राएलियां ने लूटवा रे लिए मिद्यानी लोग पासा आया। और वा अतरा हा के वणांरी गणतीं भी नी किदी जाई हकती ही। पसे गिदोने वणांरे विरुद्ध लड़वा रे लिए इस्राएलियां ने एक हातीं बुलाया। पसे गिदोने परमेश्वर हुं दो चिन्हां री मांँग किदी, ताकि वणाए यो विश्वास वेई जाए के परमेश्वर सई मे वणाने इस्राएल ने वचाडवा रे लिए केई रेयो है।

पेला चिन्ह रे लिए, गिदोने भेड़ां री ऊन ने जगा पे रखिन परमेश्वर हुं केयूं के सुबे रो ठार केवल भेड़ां री ऊन पेईस पडे और जगापे नी पडे। पसे परमेश्वरे असोस किदो। पसे बिजी रात, वणीं परमेश्वर हुं केयूं के आज जगा तो ठार हुं गिली वेई जाए पण भेड़ां री ऊन हुकी रिए। पसे परमेश्वरे वणी रात भी वसोस किदो। और अणां दो चिन्हां रे कारण, गिदोने विश्वास किदो के परमेश्वर सई मे चावे है, के वो इस्राएलियां ने मिद्यानियां हूं वचाडे।

पसे गिदोने सैनिकां ने आपणें कोडे बुलाया और 32,000 पुरुष आया। पण परमेश्वरे वणांहुं केयूं, के या बोत ही ज्यादा हीं। अणीं वाते गिदोने वणां सब 22,000 पुरुषां ने घरे पासा भेज दिदा ज्या लड़वा हुं समकता हा। पसे परमेश्वरे गिदोन हूं केयूं के या पुरुष अबार भी ज्यादा हीं। अणीं वाते गिदोने 300 सैनिकां ने छोडिन वणां सबने घरे भेज दिदा।

वणीं रात परमेश्वरे गिदोन हुं केयूं के, "मिद्यानियां री छावनी मे जा और वणांने वातां करतां हकां हुंण और जेरां थूं हुणे के वा कई वातां करी हीं, तो थूं वणांपे हमलो करवा हूं नी समकेगा।" अणीं वाते वणीं रात, गिदोन नीचे वणांरी छावनी मे ग्यो और वणीं एक मिद्यानी सैनिक ने आपणां मित्र ने वा वात वतातां हकां हुण्यो ज्यो वणीं आपणें हपना मे देख्यो हो। और वणां पुरूष रा मित्रे केयूं के, "अणां हपना रो अर्थ है, के गिदोन री सेना आपां मिद्यानियां री सेना ने पराजित करी देगा!" और जेरां गिदोने यो हुण्यो, तो वणीं परमेश्वर री स्तुति और महिमा किदी।

पसे गिदोन आपणें सैनिकां रे कोडे पासो परो ग्यो और वणांमे हुं प्रत्येक ने एक-एक नरसिंगो, और एक मिट्टी रो बर्तन और एक मशाल दिदी। पसे वणां छावनी ने घेर लिदी जटे मिद्यानी सैनिक हुई रेया हा। और गिदोन रे 300 सैनिकां आपणीं मशालां ने कणांक हुं ढक्यी हकी ही अणीं वाते मिद्यानी लोग वणीं मशालां रा उजालां ने नी देखी हक्या हा।

पसे गिदोन रे सब सैनिकां आपणें पात्रां ने एकुस समय पे तोडिन अचानक हुं मशालां री आग ने प्रकट कर दिदी। पसे वणां आपणें नरसिंगा ने फुँकिन ऊँची आवाज हुं चिल्लाया के, "यहोवा परमेश्वर और गिदोन री तलवार!"

परमेश्वरे मिद्यानियां ने घबरावी दिदा, अणीं वाते वा एक दूजा ने मारवे - काटवे लागा। पसे तुरन्तुस गिदोने संदेशवाहकां ने बोत सा बिजां इस्राएलियां ने मिद्यानियां रो पीछो करवा मे। वणांरी मदद करवा रे लिए बुलावा भेज्या। पसे वणां बोत सा मिद्यानियां ने मारी दिदा और ज्या वची ग्या हा वणांरो पीछो करिन वणांने इस्राएल देश हुं बाण्णे निकाल दिदा। और वणें दन 1,20,000 मिद्यानी मारया ग्या। और अणीं तरह परमेश्वरे इस्राएलियां ने वचाया।

पसे इस्राएली लोग गिदोन ने आपणों राजा वणावणां चावता हा, पण गिदोने वणांने असो करवा नी दिदो, लेकिन वणीं वणांहुं वा होना रा जेवर माँग्या ज्या वणां मिद्यानियां हुं लूट्या हा। पसे वणां लोगां बड़ी मात्रा मे गिदोन ने होना रा वा जेवर देई दिदा।

पसे गिदोने वणां होना हुं एक विशेष वस्त्र वस्त्र ने वणांयो जसो के महायाजक लोग पेरता हा। पण वणां लोगां वणांरी उपासना करणों आरम्भ करी दिदो हो, जिस्तर के वो एक मूर्ति वो। पसे परमेश्वरे फेर हुं इस्राएल ने दंडित किदो, क्योंकि वणां मूर्ति री उपासना किदी ही। और परमेश्वरे वणांरे शत्रुआं ने वणांने पराजित करवा मे सक्षम किदा। और आखिरकार वणां फेर हुं परमेश्वर हूं मदद करवा रे लिए प्रार्थना किदी, और परमेश्वरे वणां कोडे वणांने वचाडवा रे लिए एक बिजा छोड़ावणा वालां ने भेज्यो।

येईस वात बोत बार घटित वीः इस्राएली लोग पाप करेगा, और परमेश्वर वणांने दंडित करेगा, पसे वा पश्चाताप करेगा, पसे परमेश्वर वणांने छोड़ावणा रे लिए कणाक ने भेजेगा, और बोत सा सालां तक, परमेश्वरे बोत सा छोड़ावणा वालां ने भेज्या जणां इस्राएलियां ने वणांरे शत्रुआं हुं वचाया।

आखिरकार, वणां लोगां बिजा देशां री तरह परमेश्वर हुं आपणें लिए एक राजा री माँग किदी। और वा एक असो राजा चावता हा ज्यो लम्बो और शक्तिशाली वे, और ज्यो युद्ध मे वणांरी अगुवाई कर सके। पण परमेश्वर ने यो निवेदन पसंद नी आयो, तौभी वणीं वणांने असो राजा दिदो जसा राजा री वणां माँग किदी ही।