17. दाऊद रे हातीं परमेश्वर री वाचा

शाऊल इस्राएल रो पेलो राजा हो। और वो लम्बो और बोत ही सुन्दर हो, और जसो लोग चावता हा बिल्कुल वसोस हो। और इस्राएल पे आपणां शासन रा पेलां थोडाक सालां मे शाऊल एक अच्छो राजा हो। पण बाद मे वो एक दुष्ट व्यक्ति वणीं ग्यो, जणीं परमेश्वर री वातां ने नी मान्यी। अणीं वाते परमेश्वरे एक बिजा व्यक्ति ने चुन्यो ज्यो के एक दन वणांरे स्थान पे राजा वणेगा।

परमेश्वरे एक दाऊद नाम रा एक जवान इस्राएली पुरुष ने चुनिन एक दन शाऊल रा स्थान पे राजा वेवा रे लिए तैयार करणों आरम्भ किदो। और दाऊद बेतलेहेम नगर रो एक चरवाहों हो। और बोत सी बार, तो दाऊदे शेर और भालू दोयां ने मार दिदा हा। क्योंकि दाऊद रे द्वारा रखवालीं करतां सयम वणांरे पिता री भेड़ां पे वणां हमलो किदो हो। और दाऊद एक नम्र और धर्मी व्यक्ति हो। और वणीं परमेश्वर पे पुरो भरोसो किदो हो और वणांरी वातां ने मान्यी ही।

जेरां दाऊद अबार जवान पुरुष हो, जेरां वणीं लम्बा-चौड़ा गोलियत रे विरुद्ध लड़ाई लड्यी। और गोलियत एक बोत ही अच्छो सैनिक हो। और वो बोत ही मजबूत और लगभग तीन मीटर लम्बो हो! पण परमेश्वरे गोलियत ने मारवा और इस्राएल ने वचाडवा मे दाऊद री मदद किदी। और अणांरे बाद, दाऊदे इस्राएल रा शत्रुआं पे बोत बार विजय प्राप्त किदी। और पसे दाऊद एक बड़ो सैनिक वणीं ग्यो, और वणीं बोत सा युद्धां मे इस्राएल रे सेना री अगुवाई किदी। और लोगां वणांरी बोत तारीफ किदी।

लोगां दाऊद हुं अतरो प्रेम किदो, के शाऊल वणांहुं चिढवे लागो। और आखिर मे शाऊल वणांने मारी नाखणो चावतो हो, अणीं वाते दाऊद वणांहुं और वणांरे सैनिकां हुं हपणां रे लिए मंगरां मे भाग ग्यो। और एक दन जेरां शाऊल और वणांरा सैनिक दाऊद री खोज मे हा, तो शाऊल एक गुफा मे ग्यो। और या वाईस गुफा ही जणींमे दाऊद हपियो हको हो, पण शाऊले वणांने नी देख्यो। और दाऊद शाऊल रे पाछे वणांरे बोत ही निकट पोंछी ग्यो और वणांरे कपडां मे हुं एक टुकड़ों काटी लिदो। और बाद मे जेरां शाऊल वणीं गुफा हुं बाण्णे निकल्यो, तो दाऊदे वणांने उँची आवाज हुं पुकारतां हकां वणां कपडां रा टुकड़ा ने दिखायो। और अणीं रीति हुं, शाऊल जाणीं ग्यो के दाऊदे राजा वणवा रे लिए वणांए मारी देवा हुं इनकार करी दिदो है।

थोडाक समय रे बाद, शाऊल युद्ध मे मरी ग्यो, और दाऊद इस्राएल रो राजा वणीं ग्यो। और वो एक बढ़िया राजा हो, और सब लोगां हुं प्रेम राखतो हो। और परमेश्वरे दाऊद ने आशीषित किदो और वणांने सफल वणांयो। और दाऊदे बोत सा युद्ध लड्या और परमेश्वरे इस्राएल रा शत्रुआं ने पराजित करवा मे वणांरी मदद किदी। और दाऊदे यरूशलेम नगर ने जीतिन वणांए आपणीं राजधानी वणायो, जटे वो रेयो और शासन किदो। और दाऊद चालीस सालां तक राजा रेयो। और अणां समय रे दौरान, इस्राएल बोत ही सामर्थी और धनी वणीं ग्यो हो।

दाऊद एक मंदिर वणांवणों चावतो हो जटे सब इस्राएली परमेश्वर री आराधना कर सकीं और वणांरे लिए बलिदान चढ़ावी सकीं और लगभग 400 सालां हुं, वा लोग मूसा रा वणांया हका मिलाप वालां तम्बू मे परमेश्वर री आराधना करी रेया हा और वणांरे लिए बलिदान चढ़ावी रेया हा।

पण वटे नातान नाम रो एक परमेश्वर री ओर हुं बोलवा वालों व्यक्ति हो। और परमेश्वरे वणांए दाऊद हुं यो केवा रे लिए भेज्यो के, "तईं बोत सा युद्ध लड्या हीं, अणीं वाते थूं मारे लिए अणां मंदिर ने नी वणावेगा। पण थारे बेटो अणांने वणावेगा। तौभी मुं थने बोत ही आशीषित करूँगा। और थारे वंश सदा रे लिए मारे लोगां पे राजा रे रूप मे शासन करेगा।" और सदा रे लिए शासन करवा वालां वणां दाऊद रो एकमात्र वंशज प्रभु यीशु मसीह हो। और यो मसीह परमेश्वर रो चुन्यो हको जन हो ज्यो अणां जगत रा लोगां ने वणांरे पापां हूं वचाड़ेगा।

जेरां दाऊदे नातान रा संदेश ने हुंण्यो, तो वणीं परमेश्वर रो धन्यवाद किदो और वणांरी स्तुति और महिमा किदी। और परमेश्वर वणांरी प्रतिष्ठा ने बढ़ावी रेयो हो और वणांने बोत सी आशीषां देई रेयो हो। और बेशक, दाऊद नी जाणतो हो के परमेश्वर अणीं वातां ने कदी करेगा। और अणां समय आपां जाणां हां के इस्राएलियां ने एक लम्बा समय तक, लगभग 1,000 सालां तक मसीह यीशु रे आवणां री प्रतिक्षा करणीं वेगा।

दाऊदे बोत सालां तक न्यायपूर्वक आपणें लोगां पे शासन किदो। और वणीं बड़ी निष्ठा हुं परमेश्वर री वातां ने मान्यी और परमेश्वरे वणांने आशीषित किदो। हालांकि, आपणां जीवन रे अंत मे वणीं परमेश्वर रे विरुद्ध भयानक पाप किदो हो।

एक दन दाऊदे आपणें मेहल हुं बाण्णे देख्यो और एक सुन्दर महिला ने हांपड़ती हकी देख्यी। और वो वणींने नी जाणतो हो, पण वणीं पतो कर लिदो के वणींरो नाम बैतशेबा हो।

आपणीं नजर फेर लेवा रे बजाए, दाऊदे वणींने आपणें कोडे लावणां रे लिए कणांक ने भेज्यो। पसे वो वणीं हातीं हुतो और वणींने पासी वणींरे घर भेज दिदी। और थोडाक समय रे बाद बैतशेबाए यो केईन दाऊद कोडे संदेश भेज्यो के वा गर्भवती है।

बैतशेबा रो पति ऊरिय्याह नाम रो एक व्यक्ति हो। और वो दाऊद रे उत्तम सैनिकां मे हुं एक हो। और अणां समय वो युद्ध करवा रे लिए बाण्णे ग्यो हको हो। पसे दाऊदे ऊरिय्याह ने युद्ध हुं पासो बुलाविन वणांने आपणीं लाडी रे हातीं रेवा रे लिए केयूं। पण बिजा सैनिक युद्ध मे हा अणीं वाते ऊरिय्याए आपणें घर जावा हुं मना करी दिदो। अणीं वाते दाऊदे ऊरिय्याह ने पासो युद्ध मे भेज दिदो और सेनापति हुं वणांने युद्ध मे असा स्थान पे रखवा रे लिए केयूं जटे शत्रु सबहुं शक्तिशाली वे, ताकि वो मारयो जावे। पसे असो वियो के ऊरिय्याह युद्ध मे मारयो ग्यो।

ऊरिय्याह रे युद्ध मे मरी जावा रे बाद दाऊदे बैतशेबा हुं विवाह कर लिदो। और बाद मे वणींए दाऊद रा बेटा ने जनम दिदो। और दाऊदे ज्यो किदो हो वणांहुं परमेश्वर बोत ही क्रोधित हो, अणीं वाते वणीं नातान ने दाऊद कोडे यो केवा रे लिए भेज्यो के वणांरो पाप कतरो बुरो हो। पसे दाऊदे आपणें पाप रो पश्चाताप किदो और परमेश्वरे वणांने माफ कर दिदो। और आपणें बाकी रा जीवन मे और आपणां कठिन समय मे भी दाऊद परमेश्वर रे पाछे-पाछे चाल्यो और वणांरी वातां ने मान्यी।

पण दाऊद रे वो बच्चो मरी ग्यो। और अणीं रीति हुं परमेश्वरे दाऊद ने दंडित किदो। और अणांरे अलावा, दाऊद रे मरवा तक, वणांरे आपणें परिवार रा थोडाक लोगां वणांरे विरुद्ध लड़ाई किदी, और दाऊद रे आपणीं शक्ति कम वेई ग्यी ही। पण परमेश्वर विश्वासयोग्य हो और अबार भी वणीं वो किदो ज्यो वणीं दाऊद हूं करवा रो वायदो किदो हो के वो करेगा, भलेई दाऊदे वणांरी आज्ञा ने तोड्यी ही। और बाद मे दाऊद और बैतशेबा रे दूसरी संतान उत्पन्न वेयी, और वणां वणांरो नाम सुलेमान राख्यो।