19. परमेश्वर री ओर हुं बोलवा वालां लोग
परमेश्वर हमेशां इस्राएलियां रे कोडे आपणीं ओर हुं बोलवा वालां लोगां ने भेजतो रेतो हो। और वा लोग परमेश्वर हूं संदेशां ने हुणंता हा पसे वणां इस्राएलियां ने वताता हा।
जेरां अहाब इस्राएल राज्य पे राजा हो, तो वणां समय एलिया परमेश्वर री ओर हुं बोलवा वालों व्यक्ति हो। और अहाब एक बुरो आदमी हो। और वणीं एक झूठा बाल देवता री उपासना करावणां रे लिए लोगां ने विवश किदा हा। अणीं वाते एलियो अहाब हुं केयूं के परमेश्वर वणां लोगां ने दंडित करवे जाई रेयो है। पसे वणीं वणाहुं केयूं के, "जेरां तक मुं पासो सांटां वेवा रे लिए नी केऊँ जेरां तक इस्राएल रा राज्य मे सांटां नी वरेगा और नी ठार पड़ेगा।" पसे अणीं वातीं अहाब ने अतरो क्रोधित करी दिदो, के वणीं एलिया ने मारी देवा रो निर्णय किदो।
अणीं वाते परमेश्वरे एलिया हुं केयूं, के वो मंगरां मे जाईन अहाब हूं हपी जाए। पसे एलियो मंगरां मे वणां सोता रे कोडे ग्यो, जटे जावा रे लिए परमेश्वरे वणांने वतायो हो। पसे रोज हांजे, कागलां एलिया रे लिए रोटियां और माँस ने लेईन आवता हा। और अणां पुरा समय, अहाब और वणांरी सेना एलिया री खोज करता रेया, पण वा वणांने होजी नी सक्या।
सांटां नी वेवा रे कारण वो सोतो भी थोडाक समय रे बाद मे हुकाई ग्यो। अणीं वाते एलियो पास रास एक देश मे परो ग्यो। और वणां देश मे एक गरीब विधवा महिला ही जणींरो एक बेटो हो। और वणां कोडे भोजन लगभग समाप्त वेई चुक्यो हो, क्योंकि वटे भी कोई फसल नी वेयी ही। पण तौभी वणीं महिलाएं एलिया री देखभाल किदी ही अणीं वाते परमेश्वरे वणींरी और वणींरे बेटा री जरुरतां ने पुरी किदी ही अणीं कारण हुं वणींरे आटा रो पीपो और वणींरे तेल री पीपी केदी खाली नी वेयी। और वणां पुरा अकाल रे दौरान वणां कोडे पर्याप्त भोजन हो। पसे एलियो बोत सालां तक वटेस रेयो।
साढ़ा तीन साल रे बाद, परमेश्वरे एलिया हुं केयूं, के वो फेर हुं सांटां वरावेगा। पसे एलिया हुं पासो इस्राएल रा राज्य मे जाईन अहाब हूं वात करवा रे लिए केयूं। और अणीं वाते एलियो अहाब कोडे पासो ग्यो। और जेरां अहाबे वणांने देख्यो तो वणीं केयूं के, "अच्छा थूं है अणीं मुसीबत ने पैदा करवा वालों!" पसे एलिये वणांने जवाब दिदो के, "अणीं मुसीबत ने पैदा करवा वालों तो थूं है! क्योंकि तईं यहोवा परमेश्वर ने त्याग दिदो है। और वोईस एक हासो परमेश्वर है, लेकिन थूं बाल देवता री उपासना करी रेयो है। अबार थने इस्राएल राज्य रा सब लोगां ने कर्मेल पर्वत पे लेईन आणां हीं।"
पसे सब लोग कर्मेल पर्वत पे ग्या। और वा पुरूष भी आया ज्या केता हा, के वा बाल देवता रा संदेशां ने बोलीं हीं। और या लोग बाल देवता री ओर हुं बोलवा वालां हा। और या सब 450 लोग हा। पसे एलिये वणां लोगां हुं केयूं के, "थां केरां तक आपणें मनां ने परमेश्वर हुं फिराविन राखोगा? यदि यहोवा हासो परमेश्वर है, तो थां वणांरी आराधना करो! और यदि बाल देवता हासो परमेश्वर है, तो थां वणांरी उपासना करो!"
पसे एलिये बाल देवता री ओर हुं बोलवा वालां लोगां हूं केयूं के, "एक बैल ने बलि करिन वणांरा मांँस ने बलिदान वेवा रे लिए एक वेदी पे रखो, पण आग मत लगाजो। और वणांरे बाद मुं भी वसोस करुंगा, और एक अलग वेदी पे मुं वणां मांँस ने रखूंगा। पसे यदि परमेश्वर वेदी पे आग गिरावे है, तो थां जाणीं जाओगा के वो एक हासो परमेश्वर है।" और पसे बाल देवता री ओर हुं बोलवा वालां लोगां एक बलि ने तैयार किदी पण वणांमे आग नी लगाई।
पसे बाल देवता री ओर हुं बोलवा वालां लोगां बाल देवता हुं प्रार्थना किदी के, "हे बाल देवता, मांरी हुंण!" पसे पुरे दन वणां प्रार्थना किदी और चिल्लाया और अटे तक के वणां खुद ने भी चाकूआं हूं चीरी दिदा, पण बाल देवता वणांने जवाब नी दीदो, और वणीं कोई आग नी गिराई।
बाल देवता री ओर हुं बोलवा वालां लोगां बाल देवता हुं प्रार्थना करवा मे लगभग पुरो दन विताड़ी दिदो। और आखिर वणां प्रार्थना करणी बंद करी दिदी। और पसे एलिये बिजा बैल रा माँस ने परमेश्वर री वेदी पे रखी दिदो। और वणांरे बाद, वणीं लोगां हूं पाणी रा बड़ा बर्तनां ने वणां बलिदान पे जेरां तक उंडेलवा रे लिए केयूं जेरां तक के माँस, लाकडां और अटे तक के वणीं वेदी रे आसपास री जगा पुरी तरह हुं गीली नी वेई ग्यी।
पसे एलिये प्रार्थना किदी के, "हे यहोवा, अब्राहम, इसहाक और याकूब रा परमेश्वर, थूं मांने दिखाई दे के थूंस इस्राएल रो हासो परमेश्वर है और यो के मुं थारोस एक दास हूँ। और मने जवाब दे जणांहु या लोग जाणीं लेईं के थूंस एक हासो परमेश्वर है।"
पसे तुरन्त आकाश हुं आग पड्यी और वणीं माँस, लाकडां, चट्टान, मिट्टी और अटे तक के वेदी रे आसपास रा पाणी ने भी जलावीं दिदो। पसे जेरां लोगां यो देख्यो, तो वा जगा पे पड़िन केवे लागा के, "यहोवा एक हासो परमेश्वर है! और यहोवा एक हासो ईश्वर है!"
पसे एलिये केयूं के, "बाल देवता री ओर हुं बोलवा वालां लोगां मे हुं एक भी व्यक्ति वचिन नी जावा पाए!" अणीं वाते लोगां बाल देवता री ओर हुं बोलवा वालां सब लोगां ने पकड़ी लिदा और पसे वणांने वटे हुं अलग लेईन ग्या पसे वणांने मारी नाख्या।
पसे एलिये अहाब राजा हुं केयूं के, "झठ हुं आपणें घरे ने भाग जा, क्योंकि सांटां आवणां वालां हीं।" पसे बोत ही जल्दी वादलां घेराई ग्या, पसे जोरदार सांटां आवी ग्या। और यहोवा परमेश्वर वणां हुका ने समाप्त करी रेयो हो। और अणांहुं यो प्रकट वेयो के यहोवा एक हासो परमेश्वर है।
पसे जेरां एलिये आपणां काम ने समाप्त कर दिदो, तो परमेश्वरे एलीशा नाम रा एक पुरूष ने आपणीं ओर हुं बोलवा वालों व्यक्ति वेवा रे लिए चुन्यो। और पसे परमेश्वरे एलीशा रे माध्यम हुं बोत सा चिन्ह और चमत्कार किदा। और एक चमत्कार नामान रे हातीं भी वेयो। और वो एक शत्रु री सेना रो सरदार हो, पण वणांने चमड़ी रो एक बुरो रोग वेई ग्यो हो। पण नामाने एलीशा रे बारा मे हुंण्यो हो, अणीं वाते वो एलीशा कोडे आयो और वणांहुं वणीं ठीक करवा रे लिए निवेदन किदो। पसे एलीशाए नामान हुं केयूं के जाईन यरदन नदी रा पाणी मे हात बार डूबकी लगावी ले।
नामान एलीशा पे क्रोधित वेई ग्यो। और वणीं असो करवा रे लिए मना कर दिदो, क्योंकि यो वणांए मूर्खता रो काम लागतो हो। पण बाद मे वणीं आपणों मन बदलीं दिदो और जाईन यरदन नदी मे हात बार डूबकी लगाई। और जेरां वो अंतिम बार डूबकी लगाविन पाणी हुं बाण्णे निकल्यो, तो परमेश्वरे वणांने ठीक कर दिदो।
परमेश्वरे इस्राएल रा लोगां कोडे बिजां और बोत सा लोगां ने भेज्या। और वणां सबां लोगां हूं मूर्तियां री उपासना करणों बंद करी देवा रे लिए केयूं। और अणां रे बजाए, वणांने एक बिजा रे हातीं न्यायपूर्वक व्यवहार करणों चावे और एक दूजां पे दया करणीं चावे। और वणां लोगां ने चेतावनी दिदी के वणांने बुरा कामां ने बंद कर देणां हीं और अणांरे बजाए परमेश्वर री वातां रो पालन करणों है। और यदि वणां लोगां असो नी किदो, तो परमेश्वर वणांने दोषी मानिन वणांरो न्याय करेगा, पसे वणांने दंडित करेगा।
अधिकांश सयम, वणां लोगां परमेश्वर री आज्ञा रो पालन नी किदो। और अक्सर वणां और भी बोत सा लोगां रे हातीं बुरो व्यवहार किदो और अटे तक के कदी कदिक तो वणांने मारी भी नाख्या हा। और एक बार वणां यिर्मयाह ने हुका कुआँ मे डालीं दिदो और वणांए वटेस मरवा रे लिए छोड़ दिदो। और वो कुआँ रा पींदा रा किचड़ मे फसी ग्यो हो। लेकिन पसे राजा ने वणांपे दया आयी और वणीं आपणें सैनिकां ने आदेश दिदो के यिर्मयाह रे मरवा हुं पेले वणांए कुआँ हुं बाण्णे खींची लियो।
लोगां परमेश्वर री ओर हुं बोलनों जारी राख्यो भलेई लोगां वणांहुं नफरत किदी। और वणां लोगां ने चेतावनी दिदी के यदि वणां पश्चाताप नी किदो, तो परमेश्वर वणांने नाश कर देगा। और वणां लोगां ने यो भी याद करायो के परमेश्वरे वणां कोडे मसीह ने भेजवा रो वायदो किदो है।
1 राजा अध्याय 16-18; 2 राजा 5; यिर्मयाह 38 हुं एक बाइबल री कहाणी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।