7. परमेश्वर याकूब ने आशीष देवे है

जेरां वा बालक बड़ा वेया तो याकूब ने घर पे रेणो बढ़िया लागो, पण एसाव ने जनावरां रो शिकार करणो बढ़िया लागतो हो। और रिबकाए याकूब हूं लगाव राख्यो, पण इसहाके एसाव हूं प्रीति राख्यी।

एक दन, जेरां एसाव शिकार करिन पासो आयो तो वो बोत ही भूखो हो। अणीं वाते एसावे याकूब हूं केयूं के, "ज्यो तईं पकायो है वणांमे हुं थोडोक भोजन मने भी दे।" लेकिन याकूबे वणाने जवाब दिदो के, "पेले थूं मई हूं यो वायदो कर के पैलोटो वेवा रे कारण हूं हर एक चीज ज्या थने मलनी चावे, वा सब थूं मने देगा।" अणी वाते एसावे वणीं सब चीजां ने याकूबे आलवा रो वायदो करी दिदो। पसे याकूबे वणांने थोडोक भोजन दिदो।

इसहाक एसाव ने आशीष देणों चावतो हो। पण अणा हुं पेले के वणीं असो किदो, रिबका और याकूबे एसाव वेवा रो ढोंग करिन वणांरे हातीं धोखो किदो। क्योंकि इसहाक बोत ही बूढो हो और अबार वो देखी भी नी सकतो हो। अणीं वाते याकूबे एसाव रा कपड़ां पेरिन और बाकरी री खाल ने आपणीं गाबड़ी मे और आपणें हाथां पे लपेटी लिदो।

याकूब इसहाक कोडे आयो और वणांहुं केयूं के, "मुं एसाव हूँ। और मुं अणीं वाते आयो हूं के थूं मने आशीष दे।" जेरां इसहाके बाकरी रा बालां ने मेहसूस किदा और वणारे कपडां ने हुंग्या, तो वणीं होस्यो के वो एसाव है अणीं वाते वणाने आशीष दिदी।

एसावे याकूब हूं ईर्ष्या किदी क्योंकि याकूबे वणांहुं पेले तो पैलोटा रा अधिकार ने और हातीं- हातींस वणारी आशीषां ने भी चुराई लिदी ही। अणीं वाते वणीं इसहाक रे मरवा रे बाद याकूब ने मार डाल्वा री योजना वणांई।

पण रिबकाए एसाव री योजना ने हुण लिदी ही। अणीं वाते वणींए और इसहाके याकूब ने वणांरा रिस्तेदारां रे हातीं रेवा रे लिए बोत ही दूर भेज दिदो।

याकूब बोत सालां तक रिबका रे रिस्तेदारां रे हातींस रेयो। और अणां समय रे दौरान वणीं विवाह भी कर लिदो और वणारे बारह बेटां और एक बेटी जनमयी ही। और परमेश्वरे वणांने बोत ही धनी वणांवी दिदो हो।

बीस सालां तक कनान मे आपणां घर हूं छेटी रेवा रे बाद, याकूब आपणां परिवार, और आपणां दासां ने और आपणें जनावरां रा पुरा झूंड रे हातीं वटे वापस आयो।

याकूब अणीं वाते बोत ही घबरायो हको हो क्योंकि वणीं होस्यूं हूं के एसाव अबार भी वणांए मारी नाखणो सावतो हो। अणीं वाते वणीं उपहार स्वरूप जनावरां रा झूंडा ने एसाव रे कोडे भेज दिदा। और ज्या दास वणां झूंडा ने लेईन ग्या हा वणां केयूं के, "थारो दास याकूब, अणां जनावरां ने थने आले है। और वो बोत ही जल्दी आवी रेयो है।

पण एसाव अबार याकूब ने नुकसान नी पोचाणों चावतो हो। लेकिन अणांरे बजाए, वो वणांने एक बार फेर हूं देखिन बोत ही खुश हो। और वणांरे बाद याकूब कनान देश मे शांति पूर्वक रेयो। पसे इसहाक मरी ग्यो और याकूब और ऐसावे वणांने मिट्टी दिदी। और वाचा री प्रतिज्ञा ज्या परमेश्वरे अब्राहम हूं किदी ही वा अबार इसहाक हूं याकूब पे आवी ग्यी ही।