13. इस्राएली मन संगे परबुर किरिया

इसरायली मनके लाल समुन्द्र ले नकाय करी नेलार पाचे, परबु हाय मनके झार ले होई करी सीनै बोलाय होयबा बीती डोंगरी बाटे दरी करी जाउआय। एटा हाई डोंगरी रेउआय जोन ताने मूसा पोड़बा बीती झाड़ी के दखी रेउआय। हाय लोक मन हाय डोंगरीर तले निजर लाड़ी के बनाउआत।

परबु मूसा आउरी इसरायलर सबु लोक मनके बोलुआय, ”अगर तोमी मोर आज्ञा के मानबास, आउरी मोर वाचार पालन करबास, तो सबु लोक ताने तोमी मोर निज धन ठहरबास, आउरी तोमी मोर नजर ने याजक मनर समाज आउरी पवित्र जाती ठहरबास।”

परबु द्वारा तीकर लगे आयबा काचे लोक मन तीन दिन तक खुद के तीयार करूआत। तेबे परबु सीनै डोंगरीर टिप ताने तले उतरु आय। जेबे हाय आउआय तो भूकंप होउआय, बिजली चमकुआय, कुमरा उठुआय, आउरी मोरी मनर जोरदार शब्द होउआय। तेबे मूसा खुद उपरे डोंगरी ने चेगुआय।

तेबे परबु लोक मन संगे गोटक वाचा बांधुआय। हाय बोलुआय, ”मुई तोमर परबु, यहोवा आय। मुई आय जोन तोमके मिस्रर गुलामी ले छाड़ायली। कोनी दूसरा देवतार उपासना ना करा।”

“मुरती ना बना आउरी तीकर उपासना ना करा, कायकाचे मुई, तोमर गोटकिच परबु आय। गलत रीती ले मोर नामर उपयोग ना करा। सब्त के दिन के पवित्र मानबा काचे सुरता सोंगा। दूसरा शब्द ने, छय दिन तक निजर सबु काम के करा, सातवाँ दिन तोमर काचे विश्राम करबार आउरी मोके सुरता करबार दिन आय।”

“निजर माँ आउरी बुआर आदर करा। हत्या ना करा। व्यभिचार ना करा। चोरी ना करा। निजर पड़ोसीर बायले, हातार घर, या हातार कोनी बले सामान के धरबार मोन ना करा।”

तेबे परबु ए दस आज्ञा के पोकनार दुई ठन पट्टी ताने लिखी करी मूसा के दी देउआय। परबु पालन करबा काचे लोक मनके दूसरा खुबे व्यवस्था मनके देउआय। अगर हाय मन ए व्यवस्था के पालन करबाय तो परबु हाय लोक मनके आशीष देयसी आउरी तीकर सुरक्षा करबार प्रतिज्ञा करूआय। मांतर हाय बोलुआय की अगर हाय मन एतार पालन ना करेत तो हाय तीके दण्डित करसी।

परबु इसरायली मनके गोटक बड़े बीती लाड़ी बनायबा काचे बले बलुआय – मिलाप बीती तम्बू। हाय हाय मने ठीक ठीक सांगी दी रेउआय कि ए लाड़ी के कमता बनायबार आय, आउरी हातार भितरे कोन चीज मनके सोंगायबार आय। हांय तीके हाय बीती तम्बू के दुई बाकरा ताने बाटबा काचे गोटक बड़े परदा के बनायबा काचे बले बोलुआय। परबु हाय परदार पिटीबाटर बाकरा ने आयसी आउरी हाय ताने रेयसी। जोन लगे परबु रेउआय हाय बाकरा ताने आयबार अनुमति सिर्फ महायाजक के रेउआय।

हाय लोक मनके मिलाप बीती तम्बूर छोमे गोटक बेदी बनाय के पड़सी। जोन बले परबुर व्यवस्था के ना मानसी हांय हाय बेदी लगे गोटक पोसु के दरी करी आनो। तेबे याजक हाके बली करसी आउरी बेदी ताने परबु काचे बली करबा काचे पोड़ायसी। परबु बोलला कि हांय पोसुर लहू हांय मानेर पाप के ढाकसी। ए रीती ले, अबर परबु हाय पाप के ना दखसी। हांय माने परबुर नजर ने शुद्ध ठहरसी। परबु मूसार भाई हारून के आउरी हारूनर वंस के अपना याजक होयबा काचे चुनला।

परबु हांय लोक मनके जोन नियम दिरे हाय मन पालन करबा काचे सहमत होउआत। हाय मन केवल परबुर लोक होयबा काचे आउरी केवल हातार आराधना करबा काचे सहमत होउआत।

कई दिन ले, मुसा सीनै डोंगरीर उपरे रेउआय। हांय परबु ले गोटाय ते रेउआय। मांतरलोक मन तिकर लगे लेवट बाटा के टाकि टाकि थकी जाउआत। एकाचे हाय मन हारून लगे सोना दरी करी अनुआत आउरी हाके गोटक मुरती बनायबा काचे बोलुआत ताकि हाय मन परबु के छाड़ी करी तार उपासना करके सकोत। ए रीती ले, हाय मन भयंकर रुप ले परबुर विरुद्ध ने पाप करुआत।

हारून बाचा पीलार आकार ने सोनार गोटक मूर्ति बनाउआय। हाय लोक मन मुरतीर उपासना कारबार सुरु करी देलाय आउरी हाके बली चड़ाउ आत! तिकर पापर कारण ले परबु तिकर ले खुबे रिस होई रेउआय। हांय हाय मनके नास करी देबार चाहते रहुआय। मांतरमूसा हाय मनके ना मारबा काचे परबु ले निवेदन करूआय। परबु हातार निवेदन के सुनु आय आउरी हाय मनके नास ना करूआय।

आखिरी ने मूसा सीनै डोंगरी ले तले उतरुआय। हांय हाय दुनो पोकनार पट्टी के दरी रेउआय जोन ताने परबु दस आज्ञा के लिखी रेउआय। पाचे हांय हाय मुरती के दखुआय। हांय अतक रिसा होउ आय कि हांय हाय पट्टी मनके टुटाय देउआय।

पाचे मूसा हाय मुरती के पीसी करी हातार बुरादा बनाय देला, आउरी बुरादा के पानी ने मिलायकरी हाय लोक मनके हाय पियाय देला। परबु हाय लोक मन उपरे गोटक विपति पोटाउ आय हाय थानले खुबे लोक मन मोरी जाउआत।

जोन पट्टी मनके मूसा टुटाय रेउआय तिकर जागा धरबा काचे मूसा हाय दस आज्ञा बीती पोकनार पट्टी के बनाउ आय। तेबे हाय आउरी डोंगरी ने चेगुआय आउरी पारतना करूआय कि परबु हाय लोक मनके माफ़ करो। परबु मूसार सुनु आय आउरी हाय मनके माफ़ करी देउ आय। नुआ पट्टी ने दस आज्ञा के दरी करी मूसा डोंगरी ले तले उतरी आउ आय। तेबे परबु सीनै डोंगरी ले दरी करी प्रतिज्ञार देस तक इसरायली मनर अगुआई करूआय।