14. झारे भटकबाटा

परबु इस्राएली मन के हाई नियम सागबाटा सरायला जोनटा हाय मनके हातार किरया खायलार कारण पालन करबाटा आय। पाचे हांय सिनेय डोंगरी ले आगे तिकर अगुआई करूआय। हांय हाय मनके प्रतिज्ञार देस ने नेबार चाहते रेउआय। ए देस कनान बले बोलाय होउआय। मोपरु बादरीर खम्बा ने तिकर छोमें – छोमे गला, आउरी हायमन हातार पीटी-पीटी हिंडलाय।

परबु अब्राहम, इसहाक आउरी याकूब ले प्रतिज्ञा करी रेउआय कि प्रतिज्ञार हाय देस तिकर वंशज मनके देयसी, मातर हाय बेरा हाय ताने खुबे जातिर लोक रयते रेउआत। हाई मन कनानी बोलाय होयते रेउआत। हाय कनानी लोक परबुर आराधना ना करते रेउआत आउरी हातार आज्ञा के बले ना मानते रेउआत। हाय मन झुटा देवता मनर उपासना कारबाराय आउरी खुबे असन घिनघिना काम करते रेउआत।

परबु इस्राएली मन ले बोलुआय, जड़कदाय तोमी हाय वाचार देस ने जिबास तेबे हाय थानर सबु कनानी ले छुटकारा पा। तिकर संगे संधि ना करा आउरी तीकर संगे बिया ना करा। तोमके तीकर मूरती मनके पूरा तरह ले नाश करी देबाराय। अगर तोमी मोर आज्ञा के ना मानबास, तो तोमी मोर बजाय तीकर देवता मनर उपासना करके मुरायबास।”

जड़कदाय इस्राएली मन कनानर रेटे खेटलाय, मूसा इस्राएली थानर सबु जाती थानर गोटक गोटक करी बारा माने मन के चुनुआय। हाय तीके जाईकरी हाय देसर भेद धरबार आदेस देउआय कि दखु की हाय कमता देस आय। हाय मन के कनानी मनर भेद के बले धरबार रेउआय कि दखु की हाय मन ताकतबर आत कि कमजोर आत।

हाय बारा माने मन पूरा कनान ले होईकरी चालीस दिनर यात्रा करूआत आउरी पाचे हाय मन लेवटु आत। हाय मन लोक मनके सांगूआत, ”हाय देस खुबे उपजाउ आय आउरी फसल बले खुबे आय!” मांतर दस भेदी मन बोलूआत, ”तीकर नगर मन खुबे मजबूत आचे आउरी हाय लोक मन लम्बा-चौड़ा आचेत! अगर हामी तीकर उपरे हमला करूआव, तो निश्चित रूप ले हाय मन हामके हाराय देबाय आउरी हामके मारी देबाय।”

हड़कीच दाय यहोशु आउरी कालेब आउरी दुई ठन भेदी मन बोलुआत, ’’एटा सच आय कि कनानर लोक मन लम्बा आउरी बलशाली आत, मांतरनिश्चित रुप ले हामी हाय मनके हाराय के सकू! परबु हामर काचे लड़सी!’’

मातर लोक मन कालेब आउरी यहोशूर ना सुनलाय। हाय मन मुसा आउरी हारूनर उपरे रिसा होयलाय आउरी बोललाय। तुई हामके इती भयानक जागा ताने काय काचे आनली आचीस। हामके मिस्र नेच रेबार रेला। यदि हामी हाय देस ने जिबु तो हामी युद्ध ने मोरी जिबु आउरी कनानर लोक हामर बायले आउरी पीला के नौकर बनाय देबाय। ”हाय लोक तीके वापस मिस्र ताने दरी करी नेबा काचे गोटक अलग माने के डगर बार चायते रेउआत।

जड़कदाय हाय लोक मन असन बोललाय तेबे परबु खुबे रीसे होउआय। हाय मिलाप बीती लाड़ी ने आउआय आउरी बोलुआय, तोमी मोर बिरुद गला आचास, एकाचे तोमी सबु के हाय झारे भटक के पड़सी। सबु लोक जोन बीस बोरस या हातार ले आदिक उमरर आय हाय ताने मोरी जायसी आउरी केबी बले हाय देस ने ओलके ना सकसी जोन टा मुई तोमके देउआय। केवल कालेब आउरी यहोशु हाय ताने ओलबाय।”

जेबे लोक मन परबु के अमता बोलबा दाय सुनुआत, तो हाय मन दुखी होउआत काय काचे की हाय मन पाप करी रेउआत। एकाचे हाय मन कनानर लोक उपरे हमला करबार निर्णय करूआत। मूसा हाय मनके ना जिबा काचे चेतावनी देउआय कायकाचे की परबु तीकर संगे ना जाए, मांतर हाय मन हातार ना सुनुआत।

परबु ए युद्ध ने तीकर संगे ना जाई रेउआय, एकाचे कनानी मन हाय मनके हाराय देउआत आउरी हाय थानले खुबे के मारी देउआत। तेबे इसरायली लोक मन कनान ले वापिस लेवटुआत। आयबा चालीस बोरस तक, हाय मन झारे एने-हाने भटकबाय।

इसरायली लोक मनर झारे भटक लार चालीस बरसर पाचे, परबु हाय मनर जरुरत के पूरा करला। हांय हाय मनके सरग ले ‘’मन्ना ‘’बोलाय होयबा बीती रोटी देउआय। हांय बटेरो मनर रासी के बले [ जोन मध्यम आकरर चेड़े होउआत।] तिकर लाड़ी ताने पोटायला कि हाय मन लगे खायबा काचे माउस रओ। हाय सबु समय, परबु तिकर फोटी आउरी पनही के फाटबा ले बाचाय रहुआय।

एथानले बले परबु तिकर पिबा काचे जादू थानले पानी निकराउआय। मांतरए सबुर पाचे बले, इसरायली लोक मन परबुर विरुद्ध आउरी मूसार विरुद्ध सिकायत करुआत आउरी कूड़कुड़ाउआत। तेबले बले, परबु विश्वास योग्य रहुआय। हाय जोन किरया खायी रे कि हाय अब्राहम इशहाक आउरी याकूबर वंसज काचे करसी हाय हाके करुआय।

आउरी गोटक समय जेबे लोक मन लगे पानी ना रहुआय, परबु मूसा के बोलुआय, ’’पोकना ले गोटाव, आउरी हाय थानले पानी निसक्सी। ’’मांतरमूसा पोकना ले ना गोटाउआय। हाय लाठी ले पोकना ताने दुई बार मारुआय। ए रीती ले हाय परबुर निरादर करुआय। सबुर पिबा काचे पोकना थानले पानी तो निकलू आय, मांतरपरबु मूसा ले रिस होउआय। हांय बोलू आय,’’तुई अमता करली आस, एकाचे तुई प्रतिज्ञार देस ने ओलके ना सकबिस।’’

जेबे इसरायली लोक मन चालीस बरस तक झारे भटकि रेउआत, तेबे जोन मन परबुर विरुद्ध ने बलवा करी रेउआत हाय मन सबु मोरी जाई रेउआत। तेबे परबु हाय लोक मन के फिर ले हाय प्रतिज्ञा र देस ने सिवाने तक नेउआय। अबर मुसा खुबे डोकरा होई रेउआय, एकाचे परबु लोक मनर अगुआई करबा काचे हातार मदद करबा काचे यहाशू के चुनु आय। परबु मूसा ले ए किरया बले खायी रेउआय कि गोटक दिन हांय हाय लोक मन लगे मूसार जसन गोटक भाविस्यवक्ता पोटायसी।

तेबे परबु मूसा के गोटक डोंगरीर टिपे जीबा काचे बोलुआय कि हांय हाय प्रतिज्ञार देस के दखके सको। मूसा हाय प्रतिज्ञार देस के दखला मांतरपरबु टेक ओल्बार अनुमति ना देउआय। तेबे मूसा मोरी जाउआय, आउरी इसरायली मन तीस दिन तक दुख बनाउ आत। यहाशु तिकर नुआ अगुआ बनी जाउआय। यहाशु गोटक अच्छा अगुआ रेला कयकाचे कि हांय परबुर उपरे भरोसा करुआय आउरी हातार गोट के मानु आय।