15. प्रतिज्ञार देस

आखरी ने, हाय समय आयला कि इसरायली मन प्रतिज्ञार देस, कनान ने ओलोत। हाय देस ने यारिहो नामर गोटक नगर रेला। हातार सुरक्षा काचे हातार चारो बाटे मजबूत काती मन रेला। यहोशु हाय नगर ने दुई ठन भेदी मन के पोटायला। हाय नगर ने राहाब नामर गोटक वेश्या रेला। हांय हाय भेदी मनके लुकाउ आय, आउरी पाचे हांय आय मनके नगर ले बाची करी निकलबा ने मदद करुआय। हांय असन एकाचे करुआय कि हाय परबु उपरे विश्वास करते रेउआय। जेबे इसरायली मन यरीहो के नास करबाय तेबे हाय मन राहाब आउरी हातार परिवार के रक्षा करबार किरया करी रहुआत।

इसरायली लोक मनके प्रतिज्ञार देस ने ओल्बा काचे यरदन नदी के पार करबाटा रेला। परबु यहोशु के बोलुआय, ’’याजक मनके पोयलेजायके देस।’’जेबे याजक मन यरदन नदी ताने अपना गोड़ के सोंगायलाय तो पानीर बोहड़बाटा ठेबी जाउआय, जोन थानले कि इसरायली मन नदीर दूसरा बाटे सुकला भुई ताने जायके सकोत।

हाय लोक मन यरदन नदी पार करला य तो परबु यहोशु के बोलुआय कि यरीहो ताने हमला करबा काचे तिआर रहा, हाय बहुत मजबूत शहर रहुआय। परबु हाय लोक मन के बोलू आय कि हाय मनर याजक आउरी सैनिक मन के छह दिन तक हाय नगरर चारो बाटे गोटक हार चक्कर लगाय बार आय। याजक आउरी सैनिक मन अमतीच करुआत।

तेबे सातवां दिने, इसरायली मन हाय नगरर चारो बाटे सात बार चक्कर लागाउआत। तिकर नगरर सातवीं बार चक्कर लगायलार बाद, याजक मन अपना तुरही के फुकुआत आउरी सैनिक मन जोरदार शब्द करुआत।

तेबे यरीहोर चारो काति घसरी जाउआय! जसन परबु आज्ञा डी रेउआय इसरायली मन नगरर हर चीज के नसाय देउआत। हाय मन केवल राहाब आउरी हातार परिवार के छाडी देउआत, जोन मन इसरायली मनर भाग बनी जाई रेउआत। जेबे कनानर रेबा लोक मन थानले दूसरा लोक मन सुनुआत कि इसरायली लोक मन यरीहो के नास करी देला आत, तेबे हाय मन डरी जाउआत कि इसरायली मन तिकर ताने बले हमला करबाय।

परबु इसरायली मन के आज्ञा दि रेउआय कि कनानर रेबा बीती कोनी बले जतीर संगे शांतिर वाचा ना करबाराय। मांतरगिबेनियो नामर गोटक कनानी जाति यहोशु के झूट बोलुआय कि हाय मन कनान ले दूर गोटक जगा ने रेबा लोक आत। हाय मन यहोशु ले तिकर संगे शांतिर वाचा करबा काचे अनुरोध करूआत। यहोशु आउरी इसरायली अगुआ मन परबु के ना पचारु आत कि हाय मनके काय करबाराय। एतार बजाय, हाय मन गिबेनियो मन संगे शांति संधि करूआत।

तीन दीनर पाचे, इसरायली मन के मालूम होउ कि गिबोनर लोक मन कनान ने ही रेबा राय। हाय मन रिसा होई जाउआत कायकाचे कि गिबेनि लोक मन हाय मनके धोका दि रेउआत। मांतरहाय मन तिकर संगे करला बीती हाय शांति संधि के बनाय करी सोंगाउआत कायकाचे कि हाय बीती परबुर छोमे करला बीती रेउआय। तेबे खिनिक मा समयर पाचे, कनान ने रेबा बीती गोटक आउरी जाती, एमोरियोर राजा सुनुआय कि गिबेनि मन इसरायली लोक मन संगे शांति संधि करला आचे, एकाचे हाय मन अपना – अपना सेना के गोटक – गोटक करी बड़े सेना बनाउआय आउरी गिबोन ताने हमला करी देउआय। गिबोनी मन तिकर मदद करबा काचे यहोशु लगे गोटक चिठ्ठी पटाउआत।

अतः यहोशु इसरायली सेना के जमा करूआय आउरी गिबोनी मन लगे खेटबा काचे हाय मन पूरा राती हिन्डू आत। सकार पार हाय मन एमोरी मनर सेना के चकित करी देउआत आउरी हाय मन ताने हमला करी देउआत।

हाय दिने परबु इसरायली मन काचे लड़ला। हांय एमोरी मन के घबराय देउआय आउरी हांय बड़े – बड़े ओला घसराय करी खुबे एमोरी मन के मारी देउआय।

परबु बेर के बले बादरी ने गोटक जागा ने ठेबाय दि रहुआय ताकि इसरायली मन के खुबे समय मिलो कि एमोरी मन के पूरा तरह ले हाराय दोत। हाय दिने परबु इस्राएली लोक मन काचे गोटक बड़े विजय प्राप्त करुआय।

जेबे परबु हाय सेना मनके हाराय लार पाचे, खुबे कनानी जातीर लोक मन इस्राएल न हमला करबा काचे रुंडा होउआत। यहोशु आउरी इसरायली मन हमला करी हाय मनर सर्वनाश करी देउआत।

ए लड़ाई मनर पाचे, परबु इस्राएलर सबु गोत्र के प्रतिज्ञार हाय देस ने बाटा देउआय। तेबे परबु इस्राएल के हातार सबु सीमा ने शांति देउआय।

जेबे यहोशु डोकरा होई जाउ आय तो इस्राएलर सबु लोक मन के गोटक संगे हाग देउआय तेबे यहोशु हाय लोक मन के सुरता दिलाउ आय कि हाय लोक मन हाय वाचा के पालन करबार किरया खायला आत जोनटा के परबु तिकर संगे सिनेय डोंगरी ने बाँधी रेला। हाय लोक मन परबुर प्रति विश्वास योग्य रेबा काचे आउरी हातार व्यवस्था मनके पालन करबार किरया खाउआत।