16. छाड़ायबा बीता

यहोशुर मोरला र पाचे इस्राइएलि मन परबुर अवज्ञा करला य। हाय मन परबुर नियमर पालन ना करलाय, आउरी हाय मन हाई वाचार देस ने बाची रेलाय कनानी मन के बाहरे ना निकलाय लाय। इस्राएली मन निजर सते परबु, यहोवा के छाड़ी करी कनानी मनर देवता के उपासना करबार सुरु करी देलाय। इस्राएली मन लगे कोनी राजा ना रेला, एकाचे जाके जोन टा सही लागला हाईटा करेला।

परबुर आज्ञा ना मानला कारण दुबारा इस्राएली मन गोटक पद्धति के चालू करुआत जाके खुबे हार दोहराय रेउआत। ए पद्धति अमता ले चलुआय खिनिक मा बोरस तक इसरायली मन परबुर आज्ञा के ना मान बाय, तेबे हांय हाय मनके दुसमन थानले हाराय बार द्वारा सजा देयसी। ए दुसमन मन इसरायली मनले तिकर सम्पति के नास करी देबाय, आउरी हाय थानले खूबे झन के मारी देबाय। पाचे जेबे इसरायली मनर दुसमन मन तिकर उपरे कई बोरस तक अत्याचर करबाय, हातार पाचे इसरायली मन अपना पाप ले पश्चताप करबाय आउरी परबु के हाय मन के बाचायबा काचे परताना करबाय।

सबु हार जेबे इसरायली लोक मन पश्चताप करबाय तो परबु हाय मनके बाचायसी। हाय गोटक छाड़ायबा बीतार द्वारा अमता करसी - गोटक अमता माने जोन तिकर दुसमनर विरुद्ध लड़सी आउरी हायमन के हारायसी। तेबे देस ने शांति होयसी आउरी हाय छाड़ायबा बीता तिकर उपरे अच्छा ले शासन करसी। परबु हाय मन के बाचायबा काचे खुबे छाड़ायबा बीता मनके पटायला। परबु लगर गोटक दुसमन जाति, मिद्यानि मनर द्वरा इसरायली मनके हारायबार द्वरा अमता करला।

मिदयानी मन सात बोरस तक इसरायली मनर फसल के झिकलाय। इसरायली लोक मन खुबे डरी जाई रेलाय, आउरी हाय मन गुपा भीतरे लुकी रेलाय कि मिदयानी लोक मन हाय मन के डगर के ना सकोत। आखरी ने, हाय मनके बाचायबा काचे हाय मन परबु के हागदेलाय।

गिदोन नामर गोटक इसरायली माने रेला। गोटक दिने, हाय गोटक गुप्त जागा ने गेहू झाड़ते रेला कि मिदयानी लोक हाके चोरके ना सकोत। परबुर सरगदूत गिदोन लगे आई करी बोलुआय ,’’हे सूरबीर सुरमा, परबु तोर संगे आचे। जा आउरी इसरायली मनके दिद्यानी लोक मन ले बाचाव।’’

गिदोनर बुआ लगे मूर्ति के समर्पित करला बीती गोटक बेदी रेला। सबु ले पहला गोट जोन कि परबु गिदोन के करबा काचे बोलला हाय बेदी के टुटायबार रेला। मांतरगिदोन लोक मन ले डरबाराय, एकाचे हाय राती होत ले टाकला। तेबे हाय हाय बेदी के टुटाय करी गोंदा – गोंदा करी देला। हाय परबु काचे गोटक नुआ बेदी के बनायला आउरी हाय ताने परबु काचे बली चेगाय ला।

आयबा सकारे लोक मन दखलाय कि कोन आय आले बेदी के टुटाय करी गोंदा – गोंदा करी देला आचे, एकाचे हाय मन खुबे रिसा होयलाय। हाय मन गिदोन के मारबा काचे हातार घरे जाउ आत, मांतरगिदोनर बुआ बोलुआय, ‘’तोमी काय काचे अपना देवतार मदद करबार कोसीस करबा आस? अगर हाय देवता आय तो अपना सुरक्षा खुद करके दियास!’’ काय काचे कि हाय अमता बोलला एकाचे लोक मन गिदोन के ना मरुआत।

तेबे इसरायली मनके लुटबा काचे मिदयानी लोक मन फिर ले आउआत। हाय मन अतक खुबे रेउआत कि तिकर गिनती बले करी ना होये। गिदोन तिकर विरुद्ध लड़बा काचे इसरायली मन के गोटक संगे हागदेउआय। गिदोन परबु ले दुई ठन चिना मांगूआय कि हाके विश्वास होई जाओ कि परबु सच ने हाके इसरायली मनके बचायबा काचे बोलसी आचे।

पयला चिना काचे, गिदोन मेंडार उन के भुई ने सोंगाय करी परबु के बोलुआय कि सकार के ओस केवल मेंडार हाय उन ताने पड़ो आउरी भुई ताने ना पड़ो। परबु अम्तिच करूआय। दूसरा राती ने, हाय परबु के बोलू आय कि भुई भीजी जाओ मांतरमेंडार उन सुकी रओ। परबु अमता बले करुआय। ए दुईटा चिनार कारण, गिदोन परबुर उपरे विश्वास करूआय कि परबु सते चाहसी आचे कि हाय इसरायली मन के मिदयानी मनले बाचाओ।

तेबे गिदोन सैनिक मन के अपना लगे हागदेउआय आउरी 32,000 माने मन आसूआत। मांतरपरबु हाके बोलुआय कि ए मन खुबे आत। तेबे गिदोन हाय सबु 22,000 के घरे वापिस पटाय देउआय जोन मन लड़बा ले डरते रेउआत। परबु गिदोन के बोलुआय कि ए माने मन एबे बले खुबे आचेत। एकाचे गिदोन 300 सैनिक मन के छाड़ी करी सबु के घरे पटाय देउआय।

हाय राति ने परबु गिदोन के बोलुआय, ’’मिदयानी मनर लाड़ी ने जा आउरी हाय मनके गोटायबा दाय सुन। जेबे तुई सुनबीस कि हाय मन काय गोटायबा आत तो तुई तिकर उपरे हमला करबा ने ना डरबीस।’’ एकाचे हाय राती, गिदोन तले तिकर लाड़ी ने जाउ आय आउरी हाय गोटक मिदयानी सैनिक के अपना मित के ए गोट सांगबा दाय सुनु आय जोन टा के हाय सपना ने दकी रे। हाय मानेर मित बोलुआय, ’’ए सपनार अर्थ आय कि गिदोनर सेना हामी मिदयानी मन के हाराय देबाय!’’जबे गिदोन एटा के सुनु आय तो हाय परबुर स्तुति करूआय।

तेबे गिदोन अपना सैनिक मन लगे लेवटी आउ आय आउरी हाय मन सबु के गोटक – गोटक नर्सिंगा, गोटक भुईर बर्तन, आउरी गोटक मसाल देउआय। हाय मन हाय लाड़ी के घेरी देउआत जोन ताने मिदयानी सैनिक मन सोयते रहुआत। गिदोनर 300 सैनिक मन अपना मसाल के बरतन ले ढाकी रेउआत एकाचे हाय मिदयानी मन हाय मसालर उजर के ना दखके पारुआत।

तेबे गिदोनर सबु सैनिक मन अपना बरतन के गोटकि समय ने टुटाय करी अचानक ले मसालर जोय के दखाउ आत। हाय मन अपना नर्सिंगा के फुंकु आत आउरी चीचाउआत,’’परबुर आउरी गिदोनर तलबार!’’

परबु मिदयानी मन के घबराय देउआय, हाय मन एक दूसरा के मारके – काटके मुराउआत। हड़कीच दाय, गिदोन संदेसवाहक मन के इसरायली मन के मिद्यानि मनर पीछा करबा ने तिकर मदद करबा काचे हागदेबा काचे पटाउ आय। हाय मन हाय थानले खुबे के मारी देउआत आउरी बाकी के पीछा करी हाय मन के इस्राएल ले बाहरे निकलाय देउआत। हाय दिने 1,20,000 मिदयानी मन मोरी जाउआत। ए तरह ले परबु इसरायली मन के बाचाउ आय।

हाय लोक मन अपना राज बानाय बार चाहते रेउआत, मांतरगिदोन हाय मन के अमता ना करके देउआय, मांतरहाय हायबीती सोनार आभूषण मांगूआय जोनटा के हाय मन थानले सबु लोक मन मिदयानी मन थानले लुटी रेउआत। हाय मन खुबे मात्रा ने गिदोन के सोना देउआत।

तेबे गिदोन हाय सोना ले विशेष फोटी बनाउ आय जमता कि महायाजक पिन्दते रेलाय। मांतरलोक मन हातार उपसना करबार आरम्भ करी देलाय जसन कि हाय कोनी मुरती हो। तेबे परबु इसरायली मन के आउरी दंडित करूआय कायकाचे कि हाय मन मुरतीर उपसना करी रेउआत। परबु तिकर दुसमन के हाय मनके हाराय बा ने सक्छम करूआय। आखरी ने हाय मन परबु के मदद करबा काचे पारतना करुआत, आउरी परबु तिकर लगे हाय मन करे बाचायबा काचे दूसरा छाड़ायबा बीता के पोटाउआय।

ए बीती गोट खुबे हार होयला: इसरायली लोक पाप करबाय, परबु हाय मनके दंडित करसी, हाय मन पश्चाताप करबाय, आउरी परबु हाय मनके छाड़ायबा काचे काकी पुनि पटाय सी। कई बोरस तक, परबु खुबे छाड़ाय बा बीता मनके पटाउ आय जोन इसरायली मन के तिकर सत्रु ले बाचाउ आत।

आखरी ने, हाय लोक मन दूसरा देसर असन अपना काचे गोटक राजार मांग करुआत। हाय मन गोटक राजा चाहते रेउआत जोन डेंगा आउरी त्ताकतबर हो, आउरी जोन युद्ध ने तिकर अगुआई करके सको। परबु के ये निवेदन पसंद ना आउ आय, मांतरहाय मनके अमता राजा देउआय जमता हाय मन मांगी रेउआत।