32. यीशु दुष्टआत्मा ग्रस्त माने के आउरी गोटक बीमार बायले के चंगा करूआय

यीशु आउरी हातार चेला निजर डोंगा ने चेगी करी हाय जागा ने जाउ आत जोन ताने गिरासेनी लोक मन रेउआत। हाय मन हाय जागा ने खेटी करी डोंगा ले उतरुआत।

हाय ताने गोटक माने रेउआय जोन दुष्टआत्मा दरी रेउआय।

ए माने अतक ताकतबर रेउआय कि कोनी बाले हाके नियंत्रित करके ना सकी रेउआत। खुबे बेरा लोक मन हातार हाथ आउरी गोड़ के जंजीर थानले बाँधी रेउआत, मांतरहाय हाय मनके टुटाय देबा राय।

हाय माने हाय जागार मोड़ा भाटी ने रेबा राय। हाय माने सबु दिना आउरी सबु राती कीरकीर बा राय। हाय फोटी ना पिंद बा राय आउरी अक्सर खुद के पोकना थानले घायल करबा राय।

जमता हाय माने यीशु के दखुआय तो हाय पोराय करी हातार लगे आउआय। आउरी हातार छोमे मांडी खुटा देउआय। तेबे यीशु हाय मानेर भितरे जोन दुष्टआत्मा रेउआय हाके बोलुआय, ’’ए माने थानले बाहरे निकली आव!’’

हाय दुष्ट आत्मा जोर ले किरकिरु आय,’’हे यीशु,परम प्रधान परबुर बेटा, तोर मोर संगे काय काम आचे? किरपा करी मोके ना सताव!’’तेबे यीशु हाय दुष्ट आत्मा के पचारू आय, ’’तोर काय नाम आय?’’हाय जवाब देउआय, ’’मोर नाम सेना आय,कायकाचे कि हामी खुबे आंव।’’( रोमी सेना ने खुबे हजारर सैनिक मनर गोटक समूह गोटक ‘’सेना’’ होयते रेला।)

हाय दुष्ट आत्मा मन यीशु के विनती करू आत कि, ’’किरपा करी हामके ए जागा ले बाहरे ना पटाव!’’हायी लगर पहाड़ी ने सुअर मनर रासी चरते रेला। एकाचे हाय दुष्टआत्मा मन यीशु ले विनती करूआत कि,’’कीरपा करी हामके हाय सूअर मन ताने पटाय देस!’’यीशु बोलुआय,’’ठीक आय, तिकर ताने चले जा!’’

अतः हाय दुष्ट आत्मा मन हाय माने थानले निकली करी हाय सूअर मन ताने ओलुआत। हाय सूअर मन पोराय करी गोटक ठीयां टिला थानले झील ताने कुदुआत आउरी सबु डूबी मोरुआत। हाय राशी ताने लगभग 2,000 सूअर मन रहुआत।

हाय ताने हाय सूअर मनर राका करबा लोक मन रहुआत। जोन बले हूई रेउआय जेबे हाय मन दखु आत तो हाय मन नगर ताने पोराउ आत। यीशु जोन टा के करी रेउआय हाय ताने हाय मन सबु के सांगूआत। हाय नगरर लोक मन निकली करी आसूआत आउरी हाय माने के दखु आत जार ताने दुष्टआत्मा रेउआय। हाय शांति ले, फोटी पिंदि करी, आउरी गोटक सामान्य माने असन व्यहवार करी बोसी रेउआय।

हाय लोक मन खुबे डरी जाउ आत आउरी हाय मन यीशु के चले जीबा काचे बोलुआत। अतः यीशु डोंगा ताने चेगुआय। हाय मने जार ताने दुष्ट आत्मा रेउआय हाय यीशु संगे जीबा काचे विनती करूआय।

मांतरयीशु हाके बोलु आय, ’’नाई। मुई चाहबी आची कि तुई घरे जाई करी सबु के सांग कि परबु तोर काचे काय करला आचे। हाय मनके सांग कि कसन परबु तोर उपरे दया करी रेला।’’

एकाचे हाय माने चले जाउ आय आउरी सबु के ए बारे ने सांगूआय जोन टा के यीशु हातार काचे बोली रेउआय। हातार कहानी के सुंनबा बीता सबु लोक मन चकित होउ आत।

यीशु झीलर दूसरा बाटे लेवटी आउआय। हातार हाय लगे खेटलार पाचे, गोटक बड़े भीड़ हातार आसपास रुंडा होउ आय आउरी हाके दबाय के मुराउ आत। हाय भीड़ ने गोटक बायले रेउआय जोन बारा बरस ले लउ बोयबार समस्या ले पीड़ित रेउआय। हाय निजर सबु पयसा के ओसो बीता मन ताने लगाय दी रेउआय कि हाय मन हाके ठीक करके सकोत, मांतरहातार रोग आउरी बले बिगड़ी जाई रेउआय।

हाय सुनी रेउआय कि यीशु कई बीमार लोक मन के ठीक करला आचे आउरी हाय सोचु आय,’’मुई निश्चित आची कि अगर मुई केवल यीशुर फोटी के बले छिंबी, तो मुई ठीक होई जीबी!’’एकाचे हाय यीशुर पीटी बटले आउ आय आउरी हातार फोटी के छिंउ आय। जमता हाय हाके छिंउ आय, हातार लहू बोयबा टा बंद होई जाउ आय।

हड़कीच दाय यीशु जानू आय कि हातार भीतर ले सामर्थ निकलला आचे। एकाचे हाय पिटी बाटे मुड़ी करी पचारू आय कि, ’’मोके कोन छिंला?’’ चेला मन जवाब देउआत कि, ’’ एताने अतक सबु लोक मन तोर चारो बाटे भीड़ लगायला आत, आउरी तोके ठेगलबा आत। तो तुई कायकाचे पचारलीस कि मोके कोन छिं ला आचे?’’

हाय बायले यीशुर छोमे कांपते हुए आउरी डरी करी निजर मांडी खुटा ने बोसू आय। तेबे हाय हाके सांगी देउआय कि हाय काय करला आचे, आउरी ए बले की हाय ठीक होई गला आचे। यीशु हाके बोलुआय, ’’तोर विश्वास तोके चंगा करला आचे। शन्ति ले घरे जा।’’