35. दयालु बुआर कहानी

गोटक दिने यीशु हाय खुबे लोक मनके शिक्षा देयते रेउआय जोन मन हातार सुनबा काचे रुंडा होई रेउआत। ए लोक मन चुंगी धरबा लोक मन आउरी साथ ने दूसरा लोक मन बले रेउआत जोन मन मूसार व्यवस्था के मानबार प्रयास ना करी रेउआत।

खिनिक मा धार्मिक अगुआ मन द्खुआत कि यीशु ए लोक मन संगे गोटक मित्र जसन गोटायसी आचे। एकाचे हाय मन गोटक दूसरा ले ए बोलबा टा शुरू करूआत कि हाय गलत करसी आचे। यीशु हाय मनके बात करबा दाय सुनुआय, एकाचे हाय हाय मनके ए कहानी सांगूआय।

‘’गोटक माने रेउआय जार दुई ठन बेटा रेउआत। छोटे बेटा निजर बुआ के बोलुआय, ’’हे बुआ, मोके एबे मोर संपत्तिर हिस्सा चाहिये!’’अतः बुआ निजर दुनो बेटार बिच ने निजर सम्पति के बांटा करी देउआय।’’

‘’झटके छोटे बेटा निजर सबु क रुंडा करी दूर देस ने चले जाउ आय आउरी पापी जीवन जिबा ताने निजर सबु धन के बर्बाद करी देउआय।’’

‘’एतार पाचे, जोन ताने छोटे बेटा रेउआय हाय देस ने अकाल पडूआय आउरी हातार लगे भात घेनबा काचे पोयसा ना रेउआय। एकाचे हाके जोन काम मिलुआय हायटा सूअर मनके चरायबा टा रेउआय। हाय अतक दुखी रेउआय आउरी भूके रेउआय कि हाय सूअर मनर भात खायबा काचे चाहते रेउआय।“

‘’आखरी ने, हाय छोटे बेटा खुद के बोलुआय, ’’मुई एताने काय करबी आची? मोर बूआर सबु सेवक मन लगे खायबा काचे खुबे आचे, मांतर मुई ए ताने भूके मोर बी आची। मुई निजर बुआ लगे लेवटी करी जीबी आउरी निजर बुआ ले विनती करबी की निजर गोटक सेवक जसन मोके सोंगाव।’’

‘’अतः हाय छोटे बेटा लेवटी करी निजर बुआर घरे बाटे जीबाटा शुरू करूआय। जेबे हाय एबे दूर ही रेउआय कि हातार बुआ हाके दखु आय आउरी हातार उपरे तरस खाउ आय। हाय पोराय करी निजर बेटा लगे जाउ आय आउरी हाके गले लगाय करी चुमूआय।’’

‘’हाय बेटा बोलुआय, ’हे बुआ,मुई परबु आउरी तोर विरुद्ध ने पाप करली आची। मुई तोर बेटा बोलाय होयबार लायक बले नुआय।’’

‘’मांतर बुआ निजर गोटक सेवक के बोलुआय, झटके जाईकरी सबुले अच्छा फोटी दरी करी आव आउरी मोर बेटा के पिन्दाव! हातार आन्डकी ने अंगूठी आउरी हातार गोड़ ताने जूता के पिन्दा। पाचे सबु ले अच्छा बाचा के मारा कि हामी खाउ आउरी परब बनाउ, काय काचे कि मोर बेटा मोरी जाई रेला, मांतर एबे हाय जीव आचे! हाय हाजी जाई रेला, मांतरएबे हामी हाके मिलायलु आचू!’’’

‘’एकाचे लोक मन परब बानाय बा टा शुरु करूआत। खिनिक मा बेरार पाचे, बड़े बेटा बेड़ा थानले काम करी घरे आउआय। हाय संगीत आउरी नाचबाटार आवाज सुनुआय आउरी अचंभित होउ आय कि काय होयसी आचे।’’

‘’जेबे बड़े बेटा के पता चलु आय कि हाय मन ए काचे परब बनायबा आत काय काचे कि हातार छोटे भाई घरे आई रहुआय,तो हाय खुबे रिस होउ आय आउरी घरे ना ओलुआय। हातार बुआ बाहरे आई करी हाके तिकर संगे परब बनायबा काचे निवेदन करूआय, मांतरहाय मना करी देउआय।’’

‘’हाय बड़े बेटा हातार बुआ के बोलुआय, ’ए सबु बरस ने मुई तोर काचे निष्ठा ले काम करली! केबी बले तोर बात के ना टालली, मांतर तुई केबी बले मोके गोटक छोटे बकरी बले ना देलीस कि मुई निजर मित्र मन संगे दावत करके सकबी। मांतरतोर ए बेटा धन के पापी काम कारबा ने बर्बाद करी देला। आउरी अबर जेबे हाय आयला तो हातार काचे परब बनायबा काचे तुई सबु ले अच्छा बाचा के मारी देलीस!’’

‘’बुआ जवाब देउआय,’हे मोर बेटा, तुई सबुदाय मोर संगे आचीस, आउरी जोन बले मोर आय हाय सबु तोर आय। मांतरहामर काचे परब बनायबा टा सही आय कायकाचे कि तोर भाई मोरी जाई रे अबर हाय जिन्दा आचे। हाय हाजी जाई रे, मांतरअबर हामी हाके मिलायलु आचू।’’