36. बदलबाटा

गोटक दिने, यीशु निजर तीन चेला, पतरस,याकूब,आउरी युहन्ना के निजर संगे नेउआय। ( ए यहुन्ना नामर चेला हाय माने रेउआय जोन यीशु के बपतिस्मा दि रेउआय।) हाय मन पारतना करबा काचे गोटक डेंग पहाड़ी ने जाउ आत।

जेबे यीशु पारतना करते रेउआय तो हातार मु बेरर समान उजर होई जाउ आय। हातार फोटी उजर समान पोंडरा होई जाउ आय, जसन पृथ्वी ताने कोनी करके सकोत हातार ले खुबे पोंडरा।

तेबे मूसा आउरी एलिय्याह भविष्य वक्ता दखा देउआत। ए माने मन ए पृथ्वी ताने ए बेरा ले सैकड़ो बरस पोयलेरेयते रेलाय। हाय मन यीशु के हातार मोरबा विषय ने गोटाउ आत, काय काचे कि हाय झटके यरूशलेम ने मोरी जायसी।

जेबे मूसा आउरी एलिय्याह यीशु ले गोटायते रेउआत तो पतरस यीशु के बोलुआय, ’’हामर काचे ए होयबा टा भला आय। हामी तीन मंडप के बनाउ, गोटक तोर काचे, गोटक मूसा काचे,आउरी गोटक एलिय्याह काचे।’’मांतरपतरस ना जानते रेउआय कि हाय काय बोलसी आचे।

जबे पतरस गोटाय ते रेउआय तो, गोटक चमकदार बादरी तले आई करी तिकर उपरे छाई जाउ आय। तो हाय मन बादरी उपर ले गोटक आवाज के आयबा दाय सुनु आत। हाय बोलुआय, ’’ए मोर बेटा आय जाके मुई मोया करुआय। मुई हातार ले हरिक आची। हातार सुना।’’ हाय तीनो चेला मन डरी जाउ आत आउरी भुई ताने सोई देउआत।

तेबे यीशु हाय मनके छिंउ आय आउरी बोलुआय, ’’ना डरा। ठिया उठा।’’जेबे हाय मन चारो बाटे दखुआत, तो यीशु के छाड़ी करी निजर संगे काकी बले ना दखुआत।

यीशु आउरी हाय तीनो चेला मन हाय पहाड़ी ने लेवटी करी ताले उतरु आत। तेबे यीशु हाय मनके बोलुआय, ’’एबे जोनटा ए लगे होयला हातार बारे ने कारी संगे चर्चा ना करा। मुई झोपके मोरी जीबी आउरी पाचे जिन्दा होई जीबी। हातार पाचे, तोमी लोक मनके सांगके सकास।’’