۲۷- خارِ سامِریِ سَر گِذِشت

یِتّا مُعَلِم دینی یهودی ، اَت روز عیسایِ پَلی بِی یَموئِه. وِه خواسّه نِشونْ هَدِه کِه عیسی دَرِه اِشتِباهی دَرس دِنّه. وِه بَپِرسیه «اِستا، اِنسان چِکار وِنِه هَکِنه تا زندگانیِ اَبدی دارِه» عیسی جِواب هِدا: « اینتایِ دَرواره توراتِ دلِه چی‌ بَنویشتِ‌ بَیّه؟»

اونتا مَردی باته: « خِداوِنْد، شِه خِدا رِه تِمومِ جانِ جا، تِمومِ تِوانِ جا و شِه تِموم فِکرِ جا دوس دار. شِه هِمسایه رِمْ شِه واری، دوست دار.» اَی عیسی بِفَرمِسِّه: «دِرِس گِنی! تِئم هَمطی هَکِن تا زندگانیِ اَبِدی داری.»

امّا مُعَلِمِ دینی چونکِه خواسِّه شِه خِدِرِه پَریزگار و پاکِ آدِمْ نِشون هَدِه، اَتِّه کَشِ دیگِه بَپِرسیه: «کي مِه هِمسایوئِه؟»

عیسی اَتّا داستانِ جا اونتا مُعَلِمِ دینیِ جِواب رِه هِدا: « اَتِّه یَهودی مَردی اورشَلیمِ جِه دَر‌ْ شی‌یِه اَریحایِ وَر»

«راه دلِه، راهزِنا وِرِه سَر دَخِتِنه وُ ونِه دار و نِدارِه بَیتِنِه، وِرِه دَروشْتِنِه وَ وِه که کِتارِک زوئه ،جادِة کِنار دِمبِدانه.»

«اینتا کارِ دَکِته په، اَتّا مُعَلِمِ دینی اونجِه جِه دَییِّه رَد بی یِه ، شیه. اونتا مَردی رِه کِه جاده کِنار بَدیِه، شِه راه رِه وَر هِدا وَ اَتوَرِ دیگة جادِة جِه بوردِه و وِرِه نَدید بَیتِه.»

«اَتِّه کَم بوگْذِشتِه پِه اَتّا لاوی سَر بَرِسییِه.(لاویا، اَتّا اسرائیلی طایِفِه بینِه کِه مَعبَدِ پیشوائون رِه کِمِک کِردْ بینه). وِه هِم وَر هدا وُ اَت وَرِ دیگِة جاده بوردِه و اونتا مَردیِ داد نَرِسیه .»

«اونْگِدِر اَتّا مَردی بیَ یَمو کِه سامِری بی‌یِه. ( سامِریا و یهودیا دئی ره بَد داشتِنه). وِه دونِسّه که زَخمی آدِم یَهودی هَسِّه، مُنتا وِنِه دِل مَردیِ‌سِّه بَسوتِه و وِنِه زَخما رِه بَشِسِّه، مَرهَم بِشتِه و دَوِسّه.»

«اونگِدِر سامری مَردی وِرِه شِه خَرِ پِشت سِوارهَکِرده، اَتِّه مهمون‌خِنِه بَوِردِه و اونْجِه هِم وِنِه جِه بَرِسیه»

« فِردایِ هَمون روز سامِری مَردی ، وِسّه که شِه راه پِه بَیره وُ بوُره.هَمینتاسّه مِهمون خِنه دار ره اَتی پول هِدا و باتِه: «اینتا مَردیِ جا بَرِس ، اگِه تِه هَکِردِ کار ویشتِر بَیِّه، مِن دَگِرِسِّه پِه تِه بِدِهی رِه تِره دِمبه.»

اَیْ عیسی مُعَلِمِ دینیِ جِه بَپِرسیه: « اِسا چی شی فِکر کِنّی، اون ِسه تنِ دِله کِمینتا اون زِخمی و دِز بَزِّه مَردیِ هِمسایِه بی یِه؟» مُعَلِم دینی جِوابْ هِدا: «اونتا کِه وِنِه وِسّه دِلْ بَسوزِنیِه.» عیسی وِرِه جِواب هِدا: «تِه هِمْ بورْ هَمینکار رِه هَکِن».