10. १०. झिगू विपत्तित
मोशा व हारून फारोयाथाय् वन। इमिसं धाल, “इस्राएलया परमेश्वरं थथे धयादीगु दु, ‘जिमि मनूतय्त वने ब्यु
फारों इस्राएलीतय्त वने मब्यु, अथे जुयाः परमेश्वरं मिश्र देशय् ग्यानापुगु झिगू विपत्तित छ्वयाहयादिल। परमेश्वरं उपिं विपत्तित पाखें फारोयात थः फारो व फुक्क मिश्रीतय् द्यःत स्वया तसकं शक्तिदुम्ह खः धकाः क्यनादिल।
परमेश्वरं नील खुसिया लःयात हि यानादिल, अय्नं फारों इस्राएलीतय्त वने मब्यु।
परमेश्वरं मिश्र देय्न्यंकभनं ब्यांचायात छ्वयाहयादिल। फोरों मोशायात ब्यांचात चिकाः छ्वय्त बिन्ति यात। अय्नं फुक्क ब्यांचात सीधुंकाः फारों थःगु नुगः हाकनं तसकं छाकल अले इस्राएलीतय्त वने मबिल।
अथे जुयाः परमेश्वरं भुयुपतितय्गु महामारी छ्वया हल। अनंलिपा वय्कलं भुजिंया पुचःत छ्वयाहायादिल। फारों मोशा व हारूनयात सःतके छ्वत अले फारों इमित धाल, महामारी वयेगु दित धाःसा जिं छिमित वने बी। अले मोशां प्रार्थना यात, परमेश्वरं फुक्क भुजिंत मिश्रदेशं चिकाछ्वयादिल। अय्नं फारों हाकनं थःगु नुगः छाकल अले इस्राएलीतय्त वने मब्यु।
अनंलिपा परमेश्वरं मिश्रीतय् फुक्क पशुतय्के महामारी छ्वयाहया इमित स्यानाबिल। अय्नं फारों नुगः छाका हे च्वन अले वं इस्राएलीतय्त वने मब्यु।
अले परमेश्वरं मोशायात फारोया न्ह्यःने फसय् नउ ह्वलाब्यु धयादिल। अले मोशां अथे हे यात, मिश्रीतय्गु म्हय् तसकं दुःख बीगु कै खनेदत, अय्नं इस्राएलीतय्त धाःसा छुं नं मजु। परमेश्वरं फारोया नुगः अझ छाकादिल, अले फोरों इस्राएलीतय्त वने मब्यु।
थथे जुइ धुंकाः लिपा परमेश्वरं प्वँ गाय्कादिल गुकिं मिश्रदेशया अप्वः थें अन्नबालियात नाश यानबिल अले पिने पिहां वनिपिं न्ह्याम्हय्सित नं प्वँ लना सित। फारों मोशा व हारूनयात सःतके छ्वत अले धाल, “जिं पाप यानागु दु। छिपिं थनं वनेफु।” अनंलि मोशां प्रार्थना यात अले सर्गं प्वँ गाय्गु दीत।
अय्नं फारों हाकनं पाप यात अले थःगु नुगः छाकाः तुं च्वन। वं इस्राएलीतय्त त्वःता मछ्व।
अथे जुयाः परमेश्वरं क्वःबुँइचात मिश्रदेश त्वपुक छ्वयाहयादिल। उपिं क्वःबुँइचातय्सं प्वँपाखें बचय्जूगु बालित नयाबिल।
अले परमेश्वरं खिउँसे च्वंगु छ्वयाहयादिल गुगु स्वन्हुतक दया हे च्वन। व तसकं हे खिउँसे च्वंगु खः। अले मिश्रीत थःपिनिगु छेँ त्वःता पिने पिहां तकं वनेफइ मखु। अय्नं इस्राएलीत च्वनाच्वंगु थासय्धाःसा खिउँसे मच्वं।
थुपिं गुगु विपत्तित दुइधुंका नं फारों इस्राएलीतय्त मिश्रदेशं वने मब्यु। फारों परमेश्वरया खँ मन्यंगु कारण आः वय्कलं दकलय् लिपांगु विपत्ति छ्वया हयेगु ग्वसा ग्वयादिल। थ्व विपत्तिं धाःसा फारोया मनया हिका बिल।
बाइबलया बाखं : प्रस्थान ५-१० पाखें
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।