9. ९. परमेश्वरं मोशायात सःतादीगु
योसेफ सीधुंका, वया फुक्क थथितित मिश्र देशय् च्वनेगु यात। वया सन्तानत नं यक्व दँतक अन हे च्वनेगु यात अले इमि यक्व सन्तान दत। इमित ‘इस्राएली’ धकाः धायेगु यात।
यक्व दँलिपा इस्राएलीत ल्याखय् तसकं अप्वया वनेधुंकूगु खः। मिश्रीतय्सं योसेफ व वं इमिगु निंतिं याःगु फुक्क बांलाःगु ज्यात ल्वमने धुंकूगु खम। इपिं इस्राएलीत खनाः ग्यात छाय्धाःसा इमिगु ल्याखय् तसकं हे अप्वः दया वयेधुंकूगु खः। अथे जुयाः उगु ईलय् मिश्र देशय् राज्य यानाच्वंम्ह फारों इस्राएलीतय्त मिश्रीतय् च्यः यानाबिल।
मिश्रीतय्सं इस्राएलीतय्त यक्व छेँत व शहरत तकं दय्के बिल। तसकं थाकूगु ज्यां याना इमिगु जीवनय् झन अप्वः थाकुका बिल, अय्नं परमेश्वरं इमित आशिष बियादिल, अले इमि सन्तानत झन ल्याखय् अप्वया वन।
इस्राएलीतय्सं यक्व हे मस्त बुइका च्वंगु फारों खन, अथे जुयाः वं थः मनूतय्त फुक्क इस्राएलीतय् नकतिनी बूपिं काय्पिन्त नील खुसिइ वांछ्वया स्यानाब्यु धकाः उजं बिल।
सुं छम्ह इस्राएली मिसां छम्ह काय् बुइकल। व मिसां व वया भाःतं थपिन्सं फक्व ई व मचायात सुचुका तल।
व मचाया मांबौंन वयात अनंलिपा यक्व ई सुचुके मफुगुलिं वयात स्यायेगु पाखें बचय्यायेत इमिसं छगः पिचा दय्काः मचायात उकि दुने तया नील खुसि सिथय् न्हाय्पंमाया झाया दथुइ लः दुथाय् तयाबिल। मचाया तताम्हय्सिनं वयात छुं जुइला धकाः पिया स्वयाच्वन।
फोरोया म्ह्याय्नं व पिचायात खन अले उकि छु दु धकाः चाय्का स्वल। अले वं मचायात खन वं मचायात थः काय्थें हे भापिया यंकल। फारोया म्ह्याय्नं छम्ह इस्राएली मिसायात व मचाया सुसाःकुसाः यायेगु निंतिं ध्यबा बिया तल अय्नं व मिसां मचाया थः हे मां खः धयागु खँ फोरोया म्ह्याय्नं मस्यु। अले व मचा दुरूं वाये धुंकाः भतिचा तःधिकः जुइ धुंकाः व मिसां मचायात फारोया म्ह्याय्याथाय् छ्वयाबिल अले वं मचायागु नां मोशा तल।
छन्हु, मोशा तःधिकः जुइधुंकूगु खः। छम्ह मिश्रीं छम्ह इस्राएली च्यःयात दाया च्वंगु मोशां खन। मोशां थः इस्राएली मनूयात बचय् यायेत स्वल।
मोशां थःत सुनानं खनि मखु धयागु बिचाः यात अले व मिश्रीयात याना अन हे तुं ल्हाकाबिल। अय्नं मोशां व मिश्रीयात स्याःगु सुं छम्हय्सिनं खंगु खः।
फरों मोशां व मनूयात स्याःगु स्यूबलय् वं मोशायात स्यायेत माला जुल। अथे जुयाः फरोया सेनापाखें बचय् जुइगु निंतिं मोशा मिश्र देशं मरूभूमिइपाखे बिस्युं वन।
मिश्रदेशं तापाक्क व मरूभूमिइ मोशा झवाः जुल। वं व थासाय्च्वंम्ह छम्ह मिसा नापं ब्याहा यात अले वया निम्ह काय्पिं दत।
छम्हु मोशा थः फैत झ्वया च्वंबलय् वं अन छगू च्याना च्वंगु झाःयात खन। अय्नं व च्याना च्वंगु झाः भस्मा जुया मवं। मोशां व च्याना च्वंगु झाया लिक्क वनाः क्वथीक स्वल। मोशा व झाःया लिक्क थ्यंबलय् परमेश्वरं धयादिल, “मोशा, अय् मोशा, छं थःगु लाकां त्वःति। छाय्धाःसा छ दनाः च्वंगु थाय् पवित्रगु खः।”
परमेश्वरं धयादिल, “जिं जिम्ह मनूतय्गु कष्ट खंगु दु। जिं छन्त फारोयाथाय् छ्वये छाय्धाःसा छं इस्राएलीतय्त मिश्रीतय्गु ल्हातं त्वःतकाः हये। जिं इमित कनान देश बी, व देश जिं अब्राहाम, इसहाक व याकूबयात बी धकाः बाचा यनागु खः।”
मोशां न्यन, “मनूतय्सं जितः सुनां छ्वया हःगु धकाः न्यन धाःसा, जिं छु धायेगु?” परमेश्वरं धयादिल, “जि सु खः व हे खः। इमित थथे धा, ‘जि सु खः व हे खः धाःम्हय्सिनं जितः छिमिथाय् छ्वयाहःगु खः।’ इमित थथे नं धा, ‘जि याहोवे, छिमि पुर्खा अब्राहाम, इसहाक, व याकूबया परमेश्वर खः।’ सदांया निंतिं जिगु नां थ्व हे खः।”
मोशा ग्याःगु खः अले व फारोयाथाय् वनेगु इच्छा याना च्वंगु मदु छाय्धाःसा वं बांलाक नवा मस धकाः बिचाः याःगु खः, अथे जुयाः परमेश्वरं मोशाया दाजु हारूनयात मोशायात ग्वाहालि यायेत छ्वयादिल। फारो तसकं नुगः छाम्ह खः धकाः परमेश्वरं मोशा व हारूनयात बांलाक होस या धकाः धयादिल।
बाइबलया बाखं : प्रस्थान १-४ पाखें
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।