8. ८. परमेश्वरं योसेफ व वया छेँजःपिन्त बचय्यानादिल
योसेफया दाजुपिन्सं वयात घृणा यात छाय्धाःसा इपिं मध्ये वया थः अबुं योसेफयात तसकं माया याइगु खः अले योसेफं थः इमि शासक जूगु म्हगस खंगु खः। योसेफ वया दाजुपिन्थाय् थ्यंबलय्वयात इमिसं ज्वनाः यंकल अले योसेफयात च्यःतय्गु व्यापार याइपिनिगु ल्हातय् मियाछ्वत।
यक्व दँ लिपा, याकूब बुह्रा जुइ धुंकूगु खः, याकूबं थःत तसकं माया वंम्ह काय् योसेफयात पशुत झ्वयाच्वंपिं थः दाजुपिन्थाय् स्वया वा धकाः छ्वत।
योसेफया दाजुपिन्सं छेँय्लिहां वये न्ह्यः योसेफया लं खुत अले वयात च्वलय्या हिइ बुत्तुबुलाबिल। अले इमिसं भान्तां लं हया थः अबुयात क्यन छाय्धाःसा इमि अबुम्हं योसेफयात गुँ पशुतय्सं स्यात जुइमा धकाः बिचाः यायेमा धकाः अथे याःगु खः। थ्व खनाः याकूब तसकं दुःखी जुल।
उपिं च्यःत व्यापारीतय्सं योसेफयात मिश्र देशय्यंकल। मिश्र देश नील खुसिया लिक्क ला, थ्व तसकं हे तःधंगु व शक्तिं जाःगु देश खः। उपिं व्यापारीतय्सं योसेफयात छम्ह धनिम्ह सरकारी कर्मचारीया ल्हातय् मियाबिल। योसेफं थः मालिकयात बांलाक बिचाःसंचाः यात अले परमेश्वरं वयात आशिष बियादिल।
योसेफया मालिकया कलाः योसेफनापं द्यनेगु इच्छा याःगु खः तर परमेश्वरया विरोधय् थुकथं पाप यायेत इन्कार यात। अथे जुयाः थः मालिकया कलाः तसकं तम्वल अले योसेफया विरोधय् मखुगु दोष लगय्यात, अथे जुयाः योसेफयात ज्वनाः झ्यालखानाय् कुनाबिल। झ्यालखानाय् च्वंबलय्नं योसेफं परमेश्वरयाके भलसा तया हे च्वन अले परमेश्वरं योसेफयात आशिष बियादिल।
निदँलिपा, दोष मदुम्ह जूसां नं योसेफयात उबलय् तक नं झ्यालखानय् तयातल। छन्हु चान्हय् मिश्रीतय् जुजु फारों निगू म्हगस खन अले उकिं वयात तसकं हे दुःख बियाच्वन। जुजुया सुं नं सल्लाहबीपिंन्सं वया म्हगसया अर्थ कने मफुत।
परमेश्वरं योसेफयात म्हगसया अर्थ कनेगु वरदान बियादीगु खः, अथे जुयाः फारों योसेफयात झ्यालखानाय्सःतके छ्वत। योसेफं म्हगसया अर्थ थुकथं कनाबिल, “परमेश्वरं थनि न्हय्दँतक देशय्तसकं अन्न सय्कादी अले अनंलिपा न्हय्दँतक देशय्अनिकाल जुइ।”
योसेफ खनाः परमेश्वर तसकं लय्तायादिल अथे जुयाः वयात फुक्क मिश्र देशयाम्ह जुजु स्वया क्वय् च्वंम्ह तसकं शक्तिं जाःम्ह मनू कथं ल्ययादिल।
योसेफं मनूतय्त न्हय्दँतक यक्व अन्न मुंके धकाः धाल। अले न्हय्दँया अनिकालया ईलय् योसेफं उपिं अन्न मनूतय्गु निंतिं नयेत गाक्व दयेमा।
अनिकाल मिश्र देशय्जक मजुसे कनान देशय्नं जूगु खः अन याकूब व वया छेँजःपिं च्वना च्वंगु खः।
अथे जुयाः याकूबं थः जेठाम्ह काय्यात मिश्र देशय्वनाः अन्न कयाहिं धकाः छ्वत। दाजुपिं मिश्रदेशय् अन्न न्यावंबलय् इमिसं योसेफयात म्हमसिल, अय्नं योसेफं धाःसा इमित म्हस्यु।
अले थः दाजुपिनिगु जीवनय् ह्युपा वःगु दु कि मदु धकाः जाँचय् याये धुंकाः योसेफं धाल, “जि छिकपिनि किजा योसेफ खः, ग्याये मते। छिकपिन्सं जितः च्यःकथं मिया मभिंगु ज्या यायेत स्वल, अय्नं परमेशवरं मभिंगु ज्यायात भिंगु ज्याय् छ्यलादिल। झासँ अले छिकपिं सकलें मिश्र देशय्हे च्वनादिसँ अले जिं छिकपिन्त नयेत गाक्व अन्न बी फयेमा।”
योसेफया दाजुपिं छेँय्लिहां वन अले योसेफ आःतक नं म्वाना हे च्वंगु दु धकाः थःअबु याकूबयात न्यंकल, अले याकूब तसकं लय्ताल।
याकूब बुह्रा जुइधुंकूसां नं थः फुक्क छेँजःपिं ज्वनाः व मिश्र देशय्वन अले अन हे च्वन। सी न्ह्यः याकूबं थः फुक्क काय्पिन्त आशिष बिल।
परमेश्वरं अब्राहामयात बाचा यानादीगु खँत अब्राहामपाखें इसहाकयाके सरय्जुल अले याकूबपाखें वया झिनिम्ह काय्पिं व वया छेँजःपिन्के सरय्जुल। उपिं झिंनिम्ह काय्पिनि सन्तानतपाखें हे इस्राएलय्झिंनिगू (१२) कुल दत।
बाइबलया बाखं : उत्पत्ति ३७-५० पाखें
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।