17. १७. दाऊदनापं परमेश्वरया बाचा
शाऊल इस्राएलया न्हापांम्ह जुजु खः। व मनूतय्त यःकथं हे तःधिकःम्ह व बांलाम्ह मनू खः। न्हापांया छुं दँतक शाऊल इस्राएलतय्त शासन याइम्ह तसकं भिंम्ह जुजु खः। अय्नं लिपा व छम्ह मभिंम्ह मनू जुल अले वं परमेश्वरया आज्ञा मानय् मयात। अथे जुयाः शऊलया पलेसा जुजु जुयेत परमेश्वरं मेम्ह हे मनूयात ल्यायादिल।
परमेश्वरं दाऊद नांयाम्ह छम्ह ल्याय्मम्ह इस्राएलीयात शाऊलयालिपा जुजु जुयेगु निंतिं ल्ययादिल। दाऊद बेथलेहेम गामय् च्वनिम्ह छम्ह फैजवाः खः। वं थः अबुया फैतय्गु बिचाः यानाच्वंबलय् फैतय्त हमला यायेत स्वःपिं सिंह व भालु थें ज्याःपिं जन्तुतय्त तक्वःमछि स्याये धुंकूगु खः। दाऊद क्वमिलु व धर्मीम्ह मनू खः। वं परमेश्वरयात भलसा तइम्ह व वय्कःया आज्ञा मानय् याइम्ह खः।
दाऊद छम्ह तःधंम्ह सिपाइँ व नायः जुल। दाऊद ल्याय्मम्हबलय् वं गोल्यात नांयाम्ह छम्ह राक्षस थें ज्याम्ह मनूनापं लडाइँ यात। गोल्यात छम्ह तालिम कयातःम्ह, तसकं बल्लाःम्ह व लगभल स्वगू मिटर ति तःधिकःम्ह मनू खः।
दाऊद यात मनूतय्सं मायायाःगु खनाः शाऊलं दाऊद प्रति तसकं डाहा यात। तक्वःमछि शाऊलं दाऊदयात स्यायेगु कुतः यानाच्वन, अथे जुयाः व शाऊलपाखें सुचुला च्वन। छन्हु शाऊल दाऊयात स्यायेत माला जुयाच्वन। शाऊल छगू गुफाय् दुहां वन व गुफाय् दाऊद सुलाच्वंगु खः, अय्नं शाऊलं वयात खंके मफुत। उबलय् दाऊद शाऊलया लिक्क हे दुगु खः अले दाऊदं शाऊलयात स्यायेफुगु खः, अय्नं वं अथे मयात। बरू दाऊदं वयात स्याना थः जुजु जुइगु इच्छा याःगु मदु धयागु खँ पक्का याना क्यनेगु नितिं वं शाऊलया लं छकुचा चानाबिल।
लिपतय्, शाऊल लडाइँखय् सित, अले दाऊद इस्राएलया जुजु जुल। व छम्ह भिंम्ह जुजु खः अले मनूतय्सं वयात तसकं माया याइगु खः। परमेश्वरं दाऊयात आशिष बियादिल अले वयात तालाकादिल। दाऊदं यक्व हे लडाइँ ल्वाये माल। अले परमेश्वरं वयात इस्राएलीतय् शत्रुतय्त बुकेगु निंतिं ग्वाहालि यानादिल। दाऊदं येरुशलेम थःगु ल्हातय् काल अले उकियात थःगु राजधानी (जथा) दय्कल। दाऊया शासनया ईलय् इस्राएल छगू तसकं शक्तिं जाःगु व फुक्क खँय् पूवंगु राष्ट्र जुल।
दाऊदं छगू देगः दय्केगु इच्छा याःगु खः उकि फुक्क इस्राएलीतय्सं परमेश्वरयात आराधना याये दयेमा अले वय्कःयात बलि छाये दयेमा। लगभग पेसः (४००) दँतक मनूतय्सं परमेश्वरयात आराधना यायेगु व बलि छायेगु ज्या नापलायेगु पालयह हे याना वया च्वंगु खः, व नापलायेगु पाल मोशायागु पालय् दय्कूगु खः।
अय्नं परमेश्वरं नातान नांयाःम्ह छम्ह अगमवक्तापाखे दाऊदयाथाय् थथे बुखँ छ्वयादिल, “छ लडाइँ याइम्ह मनू जुगूलिं जिगु निंतिं छं थ्व देगः दय्के फइ मखु। छिमि काय् नं थ्व देगः दय्की। अय्नं जिं छन्त यक्व आशिष बी। छिमि सन्तानत मध्य छम्हय्सिनं सदांया निंतिं जुजुकथं मनूतय्त राज्य याइ।
गुबलय् दाऊदं थ्व खँ न्यन, वं थत्थें हे परमेश्वरया सुभाय् बिल अले वय्कःया प्रशंसा यात छायधाःसा वय्कलं दाऊद यात तःधंगु हनाःबनाः व यक्व आशिष बीगु बाचा यानादीगु खः। दाऊदं थुपिं खँ गुबलय् जुइ धकाः मस्यु। अय्नं थुपिं खँत जुइ धुंकाः इस्राएलीतय्सं मसिह वये न्ह्यः द्वछिदँ (१,०००) ई लंच्वने माःगु खः।
दाऊदं यक्व दँतक न्याय व विश्वासयायेबहःम्ह जुया राज्या यात, अले परमेश्वरं वयात आशिष बियादिल। अय्नं थःगु जिवनया लिपतय्यागु ईलय् वं परमेश्वरया विरुद्धय् ग्यानापुगु पाप यात।
छन्हु, दाऊदया फुक्क सिपाइँत लडाइँया निंतिं थःगु छेँय्नं तापाक्क वना च्वंगु खः, वं थः दरबारपाखें पिने स्वल अले छम्ह तसकं हिसी दुम्ह मिसा म्वल्हुया च्वंगु खन। वयागु नां बेतशेबा खः।
मेथाय् स्वयेगु पलेसा दाऊदं सुं छम्ह मिसायात म्वल्हुयाच्वंम्ह मिसयाथाय् काय्के छ्वत। दाऊद वनापं द्यन अले वयात थःगु छेँय् छ्वयाबिल। छुं ईलिपा बेतशेबां दाऊयात थः प्वाथय् दत धकाः धाय्के छ्वल।
बेतशेबाया भाःत उरियाह नां याम्ह मनू दाऊदया तसकं ल्वाय्सःम्ह सिपाइँतय् कप्तान मध्य छम्ह खः। दाऊदं उरियाहयात लडाइँपाखें सःतल अले वयात थः कलाःयाथाय् वनेत इनाप यात। अय्नं उरियाहं लडाइँलय् थः सिपाइँतय्त त्वःत थः छेँय् वने मखु धाल। अथे जुया दाऊदं उरियाहयात लडाइँ यायेत तुं लितछ्वल अले तःधंपिं कप्तानतय्सं वयात बल्लाःपिं शत्रुतनापं लडाइँ यायेत छ्वल छाय्धाःसा व लडाइँलय् सीमा धकाः अथे याःगु खः।
उरियाह सिधुंका दाऊदं बेतशेबायात ब्याहा यात। लिपतय्, वं दाऊदया निंतिं काय् बुइकल। दाऊदं याःगु ज्या खनाः परमेश्वर तसकं तंम्वयादिल, अथे जुया वय्कलं नातन अगमवक्तायात वं याःगु पाप गुलि तःधं धकाः क्यनाबीत दाऊद याथाय् छ्वयादिल। दाऊदं थम्हं याःगु पापया निंतिं पश्चातापा यात अले परमेश्वरं वयात क्षमा यानादिल। थःगु ल्यंदनिगु जीवंकाछि दाऊदं तसकं दुःख कष्ट फयेमासानं वं परमेश्वरयात मत्वःतू अले वय्कःया आज्ञा मानय् याना हे च्वन।
अय्नं दाऊदं याःगु पापया दण्डकथं वया मचाम्ह काय् सित। दाऊदया ल्यं दनिगु जीवंकाछि वयागु परिवारय् कचकच जुया हे च्वन अले दाऊदया बल नं मदया वन गुकिं याना व तसकं हे कमजोर जुल। दाऊद परमेश्वरप्रति विश्वासयायेबहःम्ह मजूसां नं परमेश्वरं थम्हं यानादीगु बाचय् बिश्वास योग्य जुयादिल। लिपा दाऊद व बेतशेबाया मेम्ह छम्ह काय् दत अले इमिसं वयागु नां सोलोमन तल।
बाइबलया बाखं : १ शमुएल १०; १५-१९; २४; ३१; २ शमुएल ५; ७; ११-१२ बाट
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।