20. २०. ज्वनायंकूगु व लिहां वःगु
इस्राएलया राज्य व यहूदाया राज्य निगूलिं परमेश्वरया विरुद्धय् पाप यात। परमेश्वरं इपिनापं सिनै पर्वतय् चिनादीगु बाचायात इमिसं त्वाःथुल। परमेश्वरं इमित पश्चाताप यायेत व हाकनं वय्कःया आराधना यायेत ख्याच्वः बीगु निंतिं वय्कलं थः अगमवक्तात छ्वयाहयादिल। अय्नं इमिसं आज्ञा मानय् मयात।
अथे जुयाः परमेश्वरं थुपिं निगूलिं राज्यातय्त इमि शत्रुतपाखें नाश याके बिया दण्ड बियादिल। छगू तसकं शक्तिं जाःगु व तसकं मभिंगु राष्ट्र अश्शूरी साम्राज्यं इस्राएल राज्ययात भज्यंक नाश यात। अश्शूरीतय्सं इस्राएल राष्ट्रया यक्व मनूतय्त स्यात। अले इमिगु तसकं मूवंगु सामानत फुक्क इमिसं यंकल अले देशया यक्व भागत मिंछ्वय्काबिल।
अश्शूरितय्सं फुक्क नायःतय्त, धनि मनूतय्त व यक्व ज्या सःपिं मनूतय्त छथाय् मुंकल अले इमित अश्शूरया देशय् ब्वनायंकल। मस्याःपिं व नयेमखंपिं इस्राएलीत जक इस्राएलया राज्यय् ल्यनाच्वन।
अले अश्शूरीतय्सं इस्राएलया राज्यय् विदेशीतय्त हया तल। विदेशीतय्सं स्यंकूगु शहरयात हाकनं दय्कल। इस्राएल राज्य त्वःतातपिं इस्राएलीतनापं यमिसं ब्याहा यात। विदेशीतय्नापं ब्याहा याना दुपिं सन्तानतय्त ‘सामरी धाइगु खः।
यहूदाया मनूतय्सं परमेश्वरयात विश्वास मयागुलिं अले वय्कःया आज्ञानं मानय् मयागुलिं परमेश्वरं गुकथं इस्राएलया राज्ययात दण्ड बियादिल धयागु खँ इमिसं खन। अय्नं इमिसं अझ हे कनानी द्यःतय्त पुजा यात। परमेश्वरं यमित ख्याच्वः बियादीत अगमवक्तात छ्वयाहयादिल, अय्नं इमिसं अगमवक्तातय्गु खँ मन्यन।
अश्शूरीतय्सं इस्राएल नाश याःगु सच्छिदँ (१००) लिपा परमेश्वरं बेबिलोनया जुजु नबुकदनेसरयात यहूदाया राज्यय् हमला याके बियादिल। बेबिलोन छगू तसकं शक्तिं जाःगु साम्राज्य खः। यहूदाया जुजुं नबुकदनेसरया दास जुइत दँय्दसं वयात यक्व हे ध्यबा पुलेगु निंतिं सहमत जुल।
अय्नं छुंदँ लिपा यहूदाया जुजु बेबिलोनया विरुद्धय् विद्रोह यात। अथे जुयाः बेबिलोनीत हाकन वल अले यहूदाया जुजुयात हमला यात। इमिसं यरुशलेम शहरयात थःगु ल्हाःतय् काल अनंलि देगःयात थुनाबिल। अले शहरय् च्वंगु व देगलय् च्वंगु फुक्क सम्पत्तित इमिसं यंकल।
विद्रोह याःगु हुनिं याना यहूदाया जुजुयात दण्डकथं नबूकदनेसरया सिपाइँतय्सं वया काय्यात वयागु हे न्ह्यःने स्यानाबिल अले वयागु नं मिखा कां यानाबिल। अनंलिपा इमिसं जुजुयात झ्यालाखानाय् हे स्यायेगु निंतिं बेबिलोनय् यंकल।
नबुकदनेसर व वया सिपाइँतय्सं बाली पीगु निंतिं तसकं मचामचाःपिंन्त जक त्वःता यहूदाया राज्य् च्वंपिं अप्वः याना मनूतय्त बेबिलोनय् यंकल। ईया कालखण्डय् परमेश्वरया मनूतय्सं बाचा यानातःगु देश त्वःतेमागु करं काल अले थुकियात हे ज्वनायंकूगु धकाः धाइ।
परमेश्वरं मनूतय्त इमिगु पापया हुनिं तापाक्क ज्वनायंकेबिया इमित दण्ड बियादिल, अय्नं परमेश्वरं इमित व थःम्ह यानागु बाचायात धाःसा ल्वमंकामदी। परमेश्वरं धुवांधु अगमवक्तातपाखें थः मनूतय्गु रक्षा यायेगु व इपिं नापं नवायेगु यानातुं च्वनादिल। न्हयेदँ (७०) लिपा इपिं हाकनं बाचा चिनादीगु देशय् तुं लिहां वनितिनी धकाः वय्कलं बाचा यानादिल।
लगभग न्हयेदँ (७०) लिपा फारसीतय् जुजु कोरेसं बेबिलोनयात त्याका काल अथे जुया फारसी साम्राज्यं बेबिलोनी साम्राज्ययात थापं यात। अनंलिं इस्राएलीतय्त यहूदीत धकाः धायेगु यात अले इपिं मध्ये अप्वसिनं थःगु जिवंकाछि बेबिलोनय् इमिगु जीवन हनेमाल। सुं बुह्रा यहूदीतय्सं जक यहूदा देशया बारे स्यूगु खः।
फारसी साम्राज्य छगू तसकं शक्तिं जाःगु साम्राज्य खः अय्नं इमिसं थःपिनिगु ल्हाःतय् काःपिं मनूत तसकं क्वमिलुपिं खः। कोरेस फारसीतय् जुजु जूगु छुं ईलिपा व जुजुं सुं यहूदीत यहूदाय् लिहां वनेगु इच्छा दःसा फारसी साम्राज्य त्वःता यहूदाय् लिहां वनेफु धकाः उजं बिल। वं इमित देगः हाकनं दय्केगु निंतिं ध्याबातकं बिया छ्वल।
मनूत यरुशलेमय् थ्यंबलय् इमिसं देगः व शहरया चाकःछिं च्वंगु पखाःत हाकनं दय्कल। इमिगु दथुइ अझ नं मेगु हे राज्यं शासन यानाच्वंगु जूसां नं छक हाकनं इपिं बाचा यानातःगु देशय् च्वने दत अले अन इमिसं परमेश्वरयात देगलय् हे आराधना यात।
बाइबलया बाखं : २ राजा १७; २४-२५; २ इतिहास ३६; एज्रा १-१०; नेहम्याह १-१३ पाखें
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।