21. २१. परमेश्वरं मसिहया बारे बाचा यानादीगु
फुक्क चिजया शुरु जूगु दिंनिसें परमेश्वरं मसिहयात छ्वयाहयादीगु ग्वसा ग्वयादीगु खः। मसिह झायादीगु बारे दकलय् न्हापांगु बाचा हादम व हव्वा याथाय् वल। परमेश्वर बाचा यानादिल हव्वाया वंशपाखें छम्ह सन्तात वइ गुम्हसय्सिनं ताहाया छ्यं तछ्याइ। हव्वायात छल याःम्ह व ताहा शैतान खः। व बाचाया अर्थ मसिह झायादीबलय् शैतानयात भज्यंक नाश यानादी।
परमेश्वरं अब्राहामयात बाचा यानादिल व पाखें फुक्क हलिंमय् च्वंपिं जातिया मनूतय्सं आशिष काइ। व आशिष मसिह झायादीगुनापं पूवनिगु खः। वय्कलं हलिंमय् फुक्क जातिया मनूतय्त उद्धारया लँ बियादीगु खः।
परमेश्वरं मोशायात वइगु लिपाया ईलय् मोशा थज्याःम्ह मेम्ह छम्ह अगमवक्ता बियादीगु धकाः बाचा यानादिल। थ्व मसिह झायादीगु बारे मेगू बाचा खः।
परमेश्वरं दाऊद जुजुनापं बाचा यानादिल वयागु वंशया सन्तानपाखें परमेश्वर मनूतय्के सदां सदां राज्य यानादी। उकिया अर्थ मसिह दाऊदया हे वंशपाखें याःम्ह छम्ह खः।
यर्मिया अगवक्तापाखें परमेश्वरं बाचा यानादिल वय्कलं छगू न्हूगु बाचा थापं यानादी गुगु वय्कलं सिनै पर्वतय् थापं यानादीगु थें मखु। थ्व न्हूगु बाचायात परमेश्वरं थःगु व्यवस्थात मनूतय्गु नुगलय् च्वयादी। अले मनूतय्सं पमरेश्वरयात थःम्ह हे प्रभु खः धकाः म्हसिकी। इपिं वय्कःया मनूत जुइ अले परमेश्वरं इमिगु पापत क्षमा यानादी। मसिहं न्हूगु बाचायात शुरू यानादी।
परमेश्वरया अगवक्तां थथे नं धाःगु दु, मसिह छम्ह अगमवक्त, छम्ह पुजाहारी व छम्ह जुजु नं जुइतिनि। अगमवक्ता व मनू खः गुम्हय्सिनं परमेश्वरया वचन न्यनी अले परमेश्वरया वचनत मनूतय्गु दथुइ घोषणा याइ। परमेश्वरं छ्वयाहयादी धकाः बाचा यानादीम्ह मसिह छम्ह जक सिद्धम्ह अगमवक्ता खः।
इस्राएली पुजाहारीतय्सं मनूतय्गु पाखें इमिगु पापया हुनिं दण्डया पलेसा क्षमाया निंतिं बलित छाइगु खः। पुजाहारीतय्सं मनूतय्गु निंतिं प्रार्थना यानाबीगु खः। मसिह छम्ह जक सिद्ध दकलय् तःधंम्ह पुजाहारि खः गुम्हसय्सिनं थःत हे छम्ह सिद्ध बलिकथं परमेश्वरयात लःल्हानाबिल।
जुजु व खः गुम्हसय्सिनं छुं राज्यय् शासन याइ अले मनूतय्गु न्याय याइ। मसिह छम्ह जक सिद्ध जुजु खः गुम्ह थः पुर्खा दाऊदया सिंहसनय् च्वनादीगु खः। वय्कलं सदां सदांया निंतिं फुक्क हलिंमय् राज्य यानादी अले न्ह्याबलें इमान्दार जुया व खःकथं न्याय यानादी।
परमेश्वरया अगमवक्तातय्सं मसिहया बारे मेगू यक्व हे खँत भविष्यवाण नवागु दु। मलाकी अगमवक्तां मसिह वये न्ह्यः छम्ह तःधंम्ह अगमवक्ता झायादीतिनि धकाः भविष्य वाणी यात। यशैया अगमवक्तां मसिह कन्यापाखें जन्म जुइ धकाः भविष्यवाणी यात। मीका अगमवक्तां वय्कः बेथलेहेम गामय् जन्म जुइ धकाः धाल।
यशैया अगमवक्तां धाल, मसिह गालीलय् च्वनादी, नुगः क्वतुंवंपिन्त लाय्काः बीत, चिनातःपिन्त त्वःताबीत व कुनातःपिन्त छुत्कारा बीत। मसिहं ल्वचं कःपिं म्हंमफुपिं व न्ह्याय्पनं मताःपिं, मिखां मखंपिं, खँ ल्हाय्मफुपिं व न्यासे वने मफुपिन्त लाय्कदी धकाः भविष्यवाण यात।
यशैया अगमवक्तां थ्व नं भविष्यवाणी यात मसिहयात छुं दोष मदय्कः घृणा व हेला याइ। मेपिं अगमवक्तातय्सं मसिहयात स्यापिन्सं वय्कःयागु वसःयात चिठ्ठा तइ अले छम्ह पासां वय्कःयात धोका बी धकाः भविष्यवाणी यात। जकरिया अगमवक्तां व पासायात मसिहयात धोका ब्यूगुया पलेसा स्विगू वहःया कुचा ज्याला कथं बी धकाः भविष्यवाणी यात।
अगमवक्तातय्सं मसिहया मृत्युया बारे नं भविष्यवाणी यात। यशैयां थुकथं भविष्यवाणी यात, मनूतय्सं मसिहयात थुकलं बी, गिजय् याइ, दायाबी। इमिसं वय्कः यात भाला सुयाबी अले यक्व हे कष्ट व सास्ति बिया वय्कःयात स्याइ, अय्नं वय्कःया छुं नं दोष मदु।
अगमवक्तातय्सं थथे नं धाल, वय्कः छुं नं पाप मदुम्ह सिद्धम्ह खः। वय्कः मेपिं मनूतय्गु पापया दण्ड क्वबियेत सिनादीगु खः। वय्कःया दण्डं मनूत व परमेश्वरया दथुइ शान्ति हयादिल। अथे जुयाः मसिहयात क्वह्यंकेगु परमेश्वरयागु हे इच्छा खः।
अगमवक्ततय्सं थुकथं नं भविष्यवाणी यात, मसिह सीनादी अले परमेश्वरं हे वय्कःयात सीपाखें हाकनं म्वाकादी। मसिहया मृत्यु व पुनरूत्थानपाखें परमेश्वरं मनूतय्त बचय् यायेत व न्हूगु बाचा शुरू यायेगु वय्कःया आजु पूवंकादी।
परमेश्वरं मसिहया बारे अगमवक्तातय्सं यक्व हे खँत क्यनाबिल। अय्नं मसिह उपिं फुक्क अगमवक्तातय्गु ईलय् झायामदी। थुपिं लिपांगु ईया भविष्यवाणीत याःगु पेसःदँ (४००) लिपाया ईलय् तिनिं परमेश्वरं मसिहयात थ्व हलिंमय् छ्वयाहयादिल। थ्व बाइबलया बाखं थुपिं सफूतपाखें काःगु ख:
उत्पत्ति ३:१५; १२:१-३; व्यवस्था १८:१५; २ शामुएल ७; यर्मिया ३१; यशैया ५९:१६; दानिएल ७; मलाकी ४:५; यशैया ७:१४; मीका ५:२; यशैया ९:१-७; ३५:३-५; ६१; ५३; भजनसंग्रह २२:१८; ३५:१९; ६९:४; ४१:९; जकरिया ११:१२-१३; यशैया ५०:६; भजनसंग्रह १६:१०-११
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।