3. ३. खुसिबाः वःगु
यक्व ई लिपा, संसारय् यक्व अप्वः मनूत दयावल। उपिं तसकं मभिंपिं व स्याये पाले याइपिं जुया वःगु खः। उपिं तसकं हे मभिंना वल, अथे जुयाः परमेश्वरं फुक्क पृथ्वी तःधंगु खुसिबाः छ्वया हयाः इमित नाश यायेगु क्वछिनादिल।
अय्नं नोआयात धाःसा परमेश्वरं कृपा यानादिल। उपिं मभिंपिं मनूतय्गु दथुइ व छम्ह जक धर्मीम्ह मनू दु। परमेश्वरं थःम्हं छ्वयाहयेत्यंगु खुसिबाःया खँ नोआयात धयादिल। वय्कलं नोआयात छगू तःधंगु जहाज दय्केत धयादिल।
परमेश्वरं नोआयात लगभल सच्छि व पीगू मिटर ताहाःगु (१४०), नीस्वंगू (२३) मिटर ब्याः दुगु, व झिंस्वंगू व बागू (१३.५) मिटर तःजागु जहाज दय्केत धयादिल। नोआनं व जहाज यात सिँयागु स्वतं याना उकि यक्वः क्वथात, प्वल व झ्याःत दय्कल। अले व जहाजय् नोआ, वया छेँजः व फुक्ककथंया बँय्च्वनिपिं पशुत खुसिबाःया ईलय् म्वायेमाःगु खः।
नोआं परमेश्वरया आज्ञा मानय् यात। नोआ व वया स्वम्ह काय्पिन्सं परमेश्वरं धाथें हे याना जहाज दय्कल। जहाज तसकं तःधं जूगुलिं उकियात दय्केगु निंतिं यक्व दँ लगय्जुल। नोआं मनूतय्त खुसिबाः वइगु ख्याच्वः बिल अले इमित परमेश्वरयाथाय् लिहांवयेगु निंतिं सुचं बिल, अय्नं इमिसं वयागु खँयात पत्याः मयात।
परमेश्वरं नोआयात, वया छेंजःपिन्त व पशूतय्त माःगु नयेगु नसा मुंके धकाः धयादिल। फुक्क खँ तयार जुइ धुंकाः परमेश्वरं नोआयात आः ई वये धुंकूगु दु धयादिल अले व, वया कलाः, वया स्वम्ह काय्पिं अले इमि कलापिं फुक्कसित जहाज य् दुने दुहां वनेत धयादिल। (इपिं फुक्कंयाना च्याम्ह दुगु खः)।
परमेश्वरं फुक्क कथंया पशुपंछितय् मिजंम्ह व मिसाम्ह छज्वः छज्वः याना नोआयाथाय् छ्वयादिल छाय्धाःसा खुसिबाःया ईलय् जहाज य् इपिं फुक्कं बचय् जुइमा। वय्कलं बलिया निंतिं माःगु फुक्क कथंया पशुपंछिया न्ह्य्ज्वः न्ह्य्ज्वः मिजंम्ह व मिसाम्ह याना छ्वयादिल। इपिं फुक्क जहाज य् दुने दुहां वनेधुंका परमेश्वर थम्हं हे जहाज या ध्वाखा तिनादिल।
अनंलि वा वयेगु शुरू जुल। पीन्हु व पीचातक वा वया हे च्वन। पृथ्वीया बँया तलं नं लः ग्वारा ग्वारां थाहां वल। दक्व हलिंम व ततःजाःगु पर्वतत नापं लखं त्वःपुल।
बँय्च्वनिपिं दक्वं प्राणीत सित, अले जहाज य् च्वंपिं मनूत व पशुपंछित जक म्वात। जहाज लखय् ल्यंय् ल्यंय् हे पुया च्वन अले उकि दुने च्वंपिं दक्व लखं नाश जुइगुपाखें बचय् जुल।
वा वये दीगु न्याला तक नं जहाज लखय् हे ल्यंय् ल्यंय् पुया च्वन अले उगु ईया दथुइ लः म्ह्वः जुया वन अले छन्हु जहाज छगू पहाडया च्वकाय् वना दीत, अय्नं हलिंम उबलय्तक नं लखं त्वःपुया हे च्वन। स्वला लिपा मेमेगू पहाडया च्वकात नं खने दयावल।
पीन्हु लिपा नोआं छम्ह क्वःयात लः म्ह्वः जुल कि मजु धकाः स्वयेत ब्वय्का छ्वत। क्वः ब्वया वना उखें थुखें चाहुला गंगु बँ माजुल अय्नं वं गननं गंगु बँ लुइके मफुत।
लिपा हाकनं नोआं छम्ह सुकुभत्तु ब्वय्का छ्वल। अय्नं वं छुंनं गंगु बँ लुइके मफुत, अथे जुयाः व नोआयाथाय् तुं लिहां वल। उकिया छवाः लिपा वं हाकनं छम्ह सुकुभत्तुयात पिने ब्वय्का छ्वल, अले वं थःगु त्वाथं जैतूनया छगू कचा ज्वनाः वल। लः म्ह्वः जुया वना च्वंगु खः अले वाउँचात व सिमात हाकनं खने दयावल।
मेगू वाः लंच्वने धुंकाः नोआनं स्वक्वः खुसिइ व सुकुभत्तुयात पिने ब्वय्का छ्वल। थुपालय् धाःसा वं च्वनेगुथाय् लुइकल अले व जहाज य् लिहां मवल। लः सुनां वने धुंकूगु खः।
निला लिपा परमेश्वरं नोआयात धयादिल, “छ व छिमि छेँजःपिं, दक्व पशुपछिंत जहाचं पिने पिहां वनेफु। छिमिसं यक्व मचाखाचा दय्काः हाकनं पृथ्वी जया हुँ।” अले नोआ व वया छेँजःपिं जहाचं पिहां वन।
जहाचं पिने पिहां वने धुंकाः नोआं परमेश्वरया निंतिं छगू वेदी दय्कल अले व वेदीइ बलिया निंतिं फ्याना तःपिं पशुत बलि बिल। परमेश्वर व बलिपाखें तसकं लय्तायादिल अले परमेश्वरं नोआ व वया छेँजःपिन्त आशिष बियादिल।
परमेश्वरं बाचा यानादिल, “जिं हाकनं गुबलें नं मनूतय्गु मभिंगु ज्याया निंतिं थ्व पृथ्वीयात सराः बी मखु, वा खुसिबालं पृथ्वीयात नाश याये मखु, अथे जुसां मनूतय्गु नुगः विचाः मचांनिसें हे बांमला।
अले परमेश्वरं बाचा चिनादीगु चिंकथं दकलय्न्हापां इन्द्रेणी दय्कादिल। गुबलय् गुबलय् सर्गय् इन्द्रेणी खनेदइ, परमेश्वरं थः मनूत नापं चिनादीगु बाचायात लुमंकादी।
बाइबलया बाखं : उत्पत्ति ६-८ पाखें
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।