4. ४. परमेश्वरं अब्राहामनापं बाचा चिनादीगु
खुसिबाः वःगु यक्व दँलिपा, पृथ्वी मनूतय्गु ल्याः हाकनं अप्वः दयावल, अले इपिं सकसिनं छगू हे भासं खँ ल्हाइगु खः। अय्नं परमेश्वरया आज्ञाकथं ज्या याना पृथ्वी जाया वनेगु पलेसा इपिं सकलें मिलय्जुयाः छगू शहर दय्केगु कुतः यात।
इपिं तसकं नुगः छाःपिं जुल, अले परमेश्वरं धयादीगु खँयात इमिसं वास्ता हे मयात। इमिसं स्वर्गय् वनेगु निंतिं छगू तःधंगु धरहरा दय्केगु शुरू यात। थथे इमिसं थुकथं हे छप्पं जुया मभिंगु ज्या याना हे वन धाःसा इमिसं हाकनं अप्व मेगू मभिंगु ज्या याइ थें च्वंगु परमेश्वरं खंकादिल।
अथे जुयाः परमेश्वरं इमिसं ल्हानाच्वंगु भाय्यात मेगू यक्व भाय्लय् हिला ल्वाकबुक यानादिल अले मनूतय्त फुक्क पृथ्वी छ्यालब्याल यानादिल। इमिसं दय्के त्यंगु शहरया नां “बाबेल” खः, गुकिया अर्थ “अलमल जुइगु” खः।
सछिदँ स्वया लिपा, परमेश्वर अब्राम नांयाम्ह छम्ह मनूनापं नवानादिल। परमेवश्वरं वयात धयादिल, “छं थःगु देश व थः छेँजःपिन्त त्वःता जिं क्यनेत्यनागु देशय् हुँ। जिं छन्त आशिष बी अले छन्त बियागु थासय् छगू तःधंगु देश दय्काबी। जिं छन्त फुक्क थासय् नांजाःम्ह यानाबी। जिं छंगू नां तःधं यानाबी। जिं छन्त आशिष ब्यूपिन्त आशिष बी अले छन्त सराः ब्यूपिन्त सराः बी। पृथ्वी च्वंपिं फुक्क छेँजःपिन्स छंगू हुनिं आशिष काय्खनि।
अले अब्रामं परमेश्वरया आज्ञा मानय्यात। वं थः कलाः साराइ, थः फुक्क च्यःत अले थःगु फुक्क चिजत ज्वनाः परमेश्वरं क्यनादिगु देश कनानपाखे वन।
अब्राम कनान देशय् थ्यनबलय् परमेश्वरं धयादिल, “चाकःछिं मिखा ब्वया स्व। छ व छिमि सन्तानतय्त छं मिखां न्ह्याय्दक्व फुक्क देश पुर्खाया सम्पत्तिकथं जिं छन्त बी।” अले अब्राम व हे देशय् च्वन।
छन्हु, अब्रामं दक्वसिबय् तःधंम्ह परमेश्वरया पूजाहारी मल्कीसेदकयात नापलात। मलकीसेदकं अब्रामयात आशिष बिया धाल, “सर्ग व पृथ्वीया थुवाः दक्वसिबय् तःधंम्ह परमेश्वरं छन्त आशिष बियादीमा।” अले अब्रामं मल्कीसेदेकयात थःगु फुक्क सर्बय्या झिब्वय्छब्व बिल।
यक्व दँ फुनावन अय्नं अब्राम व साराइया सुं नं सन्तान मदु। परमेश्वर अब्रामनापं नवाना हाकनं बाचा यानादिल, अब्राम छं छम्ह काय् दइ अले वपाखें छं सन्तानत सर्गया नगुत थें हे दइ। अब्रामं परमेश्वरं यानादीगु बाचायात विश्वास यात। परमेश्वरं अब्रामयात धर्मी यानादिल छाय्धाःसा अब्रामं परमेश्वरं यानादीगु बाचायात विश्वास यात।
अले परमेश्वरं अब्रामनापं छगू बाचा चिनादिल। बाचा निगूपंया दथुइ पक्का यायेगु चिं खः। परमेश्वरं धयादिल, “जिं छंगू हे शरिरपाखें छम्ह काय् बी। कनान देश जिं छिमि सन्तानतय्गु निंतिं बी।” अय्नं अब्रामया आःतक नं छम्ह नं काय्मस्त मदु।
बाइबलया बाखं : उत्पत्ति ११-१५ पाखें
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।