35. ३५. तसकं दयामाया दुम्ह अबुया बाखं
छन्हु येशूं यक्व कर काइपिं व मेपिं पापी मनूतय्त स्यनेकने यानादिल। उपिं मनूत वय्कःया खँ न्यनेत मुंवल।
अन वयाच्वंपिं धार्मिक नायःतय्सं येशूं पापीतय्त थः पासापिन्त थें व्यवहार यानादीगु खन अले इमि थःथवय् खँल्हाना वय्कःया निन्दा यात। अथे जुया येशूं इमित थ्व बाखं धयादिल।
“छम्ह मनूया निम्ह काय्पिं दु। कान्छाम्हं थः अबुयात धाल, ‘बाः, जितः जिगु भागया अंश बियादिसँ।’
“अले याकनं हे कान्छाम्ह काय्नं थःगु दक्व सम्पत्ति मियाः परदेशय् वन। अन वनाः वं थःगु धिबा मोजमज्जा यानाः फुक्का छ्वत।”
छुं ईलिपा कान्छाम्ह काय् वंगु देशय् अनिकाल जुल अले वयात नयेगु नसा न्यायेगु निंतिं वयाके ध्याबा मन्त। अथे जुयाः व अन देशय् ज्या मावन। अले वयात फातय्त नकेत्वंके यायेगु ज्या बिल। तसकं नये पित्याना च्वंगुलिं फातय्सं नइगु नसा हे वं नयेमाल।”
“लिपतय् व कान्छाम्ह काय्नं बिचाः यात, ‘जिमि बाःयाथाय् ज्या याइपिं मनूतय्सं प्वाः जाय्क नयाः नं थयेत दु, जि धाःसा थन नये हे मखनाः सिना वनिन। आः मजिल, जि थः बाःयाथाय् हे वनाः इनाप यावने, जितः छिथाय् ज्या याइम्ह छम्ह च्यः थें भाःपिया तयादिसँ।’”
“अथे जुयाः वया कान्छाम्ह काय् थः बाःयागु छेँय् लिहां वन। वया कान्छाम्ह काय् लँय् वयाच्वंगु वया अबुं तापाकंनिसें हे खन। वयात खनाः तसकं माया वन। अले ब्वाँय् वनाः थः काय्यात घय्पुयाः चुप्पा नल।
“अले व कान्छाम्ह काय् नं धाल, ‘बाः, जिं परमेश्वरयागु विरोधय् व छिगु विरोधय् पाप याये लात। आः ला जितः छिकपिनि काय् धकाः धाये हे मल्वय् धुंकल।’”
“तर अबुम्हय्सिनं च्यःतय्त सःताः थथे धाल – ‘याकनं हे दकलय् बांलाःगु वसः हयाः वयात पुंकि। वयागु पतिनय् अंगू नं न्ह्याका ब्यु। अले तुतिइ लाकां नं न्ह्याका ब्यु। अले दकलय् तःधिकःम्ह भ्याःचा स्याना भ्वय् ज्वरय् या। थौं झीसं लय्ताः भ्वय् न्याय्के माः, छाय्धाःसा थ्व जिमि काय् सी धुकूम्ह हानं म्वाना वल, तने धुंकूम्ह हानं लुल।’”
“अले मनूतय्सं भ्वय् नयाः न्ह्याइपुकल। छुं ईलिपा वया तःधिकःम्ह काय् बुँइ वनाच्वंगु जुयाच्वन। बुं लिहां वयाः छेँ लिक्क थ्यंबलय् वं छेँय् म्ये हालाच्वंगु व प्याखं ल्हुयाच्वंगु सः ताल। अले छेँय् छु जुयाच्वंगु खः धकाः छक्क जुल।”
“अले व तःधिकःम्ह काय् वया किजा लिहां वःगुलिं मनूतय्सं भ्वय् नयाः न्ह्याइपुकाच्वंगु खँ सिया व तसकं तंम्वय्काः छेँय् नं वने मास्ति मवय्कल। अय्जूगुलिं अबुम्हं हे पिने वयाः वयात ह्यय्कल। काय् छ नं दुने वयाः इपिं नापं न्ह्याइपुकेत वा धकाः धाल, तर वं अबुम्हय्सिगु खँ मानय् मजुल।
“तःधिकःम्ह काय् नं अबुम्हसित धाल, ‘स्वयादिसँ, थुलिमछि दँ दये धुंकल जिं बिश्वासयायेबहःम्ह जुया छिगु सेवा यानाच्वनागु। जिं छिगु छुं नं खँ मानय् मयानागु मदु। अय्नं छिं जितः पासापिंलिसे न्ह्याइपुकेत दुगुचा छम्ह हे गुब्सं बियादीगु मदु। वेश्यायाथाय् जुयाः छिगु सम्पत्ति दक्वं फुक्का वःम्ह काय् वयेवं धाःसा थपाय्सकं तःधंक भ्वय् न्याय्कादिल।’”
अले अबुम्हय्सिनं वयात धाल – ‘स्व बाबु, छ ला जि नाप हे च्वनाच्वंगु दु नि। अले जिगु धयागु हे छंगु मखु ला? थौं ला भ्वय् न्याय्काः लय्ताय् माःगु दिन खः, छाय्धाःसा छं किजा सी धुंकूम्ह हानं म्वाना वल, तने धुंकूम्ह हानं लुल।’”
थ्व बाखं बाइबलया थुपिं खण्डपाखें काःगु खः लूका १५:११-३२
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।