37. ३७. येशूं लाजरसयात म्वाकादीगु
छन्हु, येशूं लाजरस तसकं मफय्का च्वन धयागु खँ न्यन। लाजरस व वया निम्ह ततापिं, मरियम व मार्था येशूया लिक्क च्वपिं पासापिं खः। येशूं थ्व खँ न्यनादी धुंकाः वय्कलं धयादिल, “थ्व ल्वचं लाजरस सी मखु। परमेश्वरयागु महिमाया निंतिं व परमेश्वरया काय् यात तःधंकेत व म्हंमफुगु खः।” येशूं मार्था, वया केहेँ व लाजरसयात माया यानादि। लाजरस म्हंमफय्का च्वन धयागु खँ न्यनादी धुंकाः नं निन्हु तक वय्कः थःच्वनादीगु थासय् हे च्वनादिल।
निन्हु लिपा येशूं चेलातय्त थथे धयादिल, “नु झीपिं हाकनं यहूदियाय् लिहां वनेनु।” अले चेलातय्सं, “गुरूजु, उखुन्हु तिनि ला मनूतय्सं छितः ल्वहँतं कयेका स्यायेत्यंगु खः।”
येशूया चेलातय्सं लिसः बिल, “प्रभु, व द्यनाच्वंगु जूसा दँ हे दनी नी।” उकि येशूं इमित ध्वाथुइक धयादिल, लाजरस सी धुंकल। छमिसं विश्वास याये फयेमा धकाः हे जि अन मवनागु खः उकिं जि लय्ताः। छाय्धाःसा आः छिमिसं अजुचाइपुगु ज्या खनितिनि उकिं याना छिमिसं जितः विश्वास याये फइ।”
येशू लाजरया छेँय् थ्यंबलय् लाजरसयात सीनाः नं थुनातःगु हे प्यन्हु दय्धुंकल। येशू झायाच्वन धयागु सियाः मार्था वय्कःयात नापलाः वन। अले मार्थां वय्कःयात धाल, “प्रभु, छि थन दीगुजूसा जिमि किजा सी मखुगु। आः तक नं छिं परमेश्वरयाके न्ह्यागु हे फ्वंसां छितः बियादी धकाः जिं स्यू।”
येशूं लिसः बियादील, “सीम्ह म्वाकीम्ह व जीवन बीम्ह जि हे खः। सुनां सुनां जित विश्वास याइ, इपिं गुबलें सी मखु। छु छिं थ्व खँय् विश्वास यानादिया ला?” मार्थां लिसः बिल, “खः प्रभु! छि परमेश्वरया काय् मसिह खः धकाः जिं विश्वास याये।
अले मरियम थ्यंकवल। अले, मरियमं येशूया पालिइ भ्वपुयाः थथे धाल, “प्रभु, छि थन दीगु जूसा जिमि किजा सी मखुगु।” येशूं इमित न्यनादिल, “छिमिसं वयात गन तया: तया?” इमिसं वय्कःयात धाल, “चिहानय। छि झाया स्वयादिसँ।” अले येशू ख्वयादिल।
थ्व चिहान छगू गुफा खः, थुकियागु प्वाः ल्वहं छगलं तिनातःगु खः। वय्कः चिहानय् झायादिल, वय्कलं इमित धयादिल, “ल्वहं चीकि।” लाजरसया तता मार्थां धाल, “प्रभु, आः ला नवये नं धुंकल जुइ, सीगु हे प्यन्हु मछि दये धुंकल।”
येशूं वयात धयादिल, “छिं विश्वास यानादिसा, परमेश्वरयागु तःधंगु महिमा स्वये खनि धकाः जिं मधया ला?” अथे जुयाः इमिसं ल्वहं चीकल।
अले येशूं स्वर्गय् स्वयाः धयादिल, “बाः जिं छित: सुभाय् बी। जिगु खँ छिं न्यनादिगु दु। छिं जिगु खँ न्हाबलें न्यनादी धकाः जिं स्यू। थन दना च्वंपिन्सं जितः छ्वया हयादीम्ह छि हे खः धकाः विश्वास याये फयेमा धकाः जिं थथे धयागु खः। थुलि धयाः वय्कलं तस्सलं सःतादिल, अय् लाजरस, पिहां वा।”
अले, सीम्ह लाजरस पिहां वल।
उकिं यहूदीतय् तःधंपिं पुजाहारीत तंम्वल, अले, इमिसं गथे याना येशू व लाजरसयात स्यायेगु धकाः मुना सल्लाह यात।
थ्व घटना बाइबलया थुपिं अध्यायपाखें काःगु खः यूहन्ना ११:१-४६
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।