38. ३८. येशूयात धोखा ब्यूगु
दँय्दसं, यहूदीतय्सं छुत्कारायागु नखः हनिगु खः। थ्व छगू नखः जुगँजुग न्ह्यःनिसें गुकथं पसमेश्वरं इमि पुर्खातय्त मिश्रदेशया दासत्वपाखें बचययागु खः धकाः लुमंकेगु नितिं हनिगु खः। येशूं दकलय् न्हापां मनूतय् दुथुइ प्रचार व स्यनेकने यानादीगु स्वदँ लिपा, वय्कलं थःचेलतनापं येरूशलेमय् छुत्काराया नखः हनेगु खँ कनादिल, अले वय्कः अन सीगु खँ नं धयादिल।
येशूया चेलात मध्ये यहूदा नांयाम्ह छम्ह मनू दु। यहूदा चेलातय्गु ध्यबाया जिम्मा काइम्ह खः तर व ध्यबाय् लोभ याइम्ह खः अले न्ह्याबलें म्हीचायागु ध्यबा खुयाकाइगु खः। येशू व चेलात येरूशलेमय् थ्यंने धुंकाः, यहूदा यहूदीतय् तःधंपिंपुजाहारी तयेथाय् वन अले ध्यबा कया येशूयात ज्वंका छ्वयेगु धकाः सल्लाह यावन। यहूदीतय् नायः तय्सं येशू महसिह धकाः स्वीकार मयाः। अले वय्कःयात गथे यानाः स्यायेत सनांच्वंगु दु धयागु खँ येशूं स्यू।
तःधंपिंपुजाहारीतय्गु न्ह्यलुवाय्, यहूदी नायः तय्सं येशूयात विश्वासघात यायेगु नितिं यहूदायात स्विग: वहः यागु म्वहः बिल। अगमवक्तातय्सं भविष्यवाणी याथें हे थ्व खँ जुवल। यहूदा थ्व खँय् सहमत जुया ध्यबा कयाः व अनं वन। यहूदां उबलय् निसें येशूयात गुकथं ज्वंकेगु धकाः मौका स्वयाच्वन।
येरूशलेमय्, येशूं थःचेलातनापं छुत्कारायागु नखः हनादिल। छुत्कारायागु भ्वय्या ईलय येशूं छुं मरि कया कुचा थालादिल। वय्कलं धयादिल, “थ्व का: अले न। थ्व जिगु म्ह खः, गुगु छिमिगु निंतिं बियागु दु। थ्व जिगु लुमंतिइ यायेगु या।” थुकथं वय्कलं थःगु म्ह इमिगु निंतिं बलिदान जुइ धकाः धयादिल।
अले येशूं ख्वला कयाः धयादिल, “थ्व त्वं। थ्व न्हूगु बाचायागु जिगु हि खः। थ्व हि यक्वसिगु पाप क्षमाया निंतिं जिं हाय्कागु खः। आवंनिसें छिमिसं थ्व त्वनेबलय् जितः लुमंकेगु या।”
अनंलि येशूं चेलातयत धयादिल, “छिपिं मध्ये जि नापं नयाच्वंम्ह छम्हय्सिनं जित धोखा बी। चेलात छक्क जुयाः सुनां थज्याःगु ज्या याइ धका वय्कःयाके न्यन। अले येशूं धयादिल, “सुयात जिं मरि कुचा थला बियाच्वनागु वं हे जित धोखा बी।” अनंलि येशूं मरिया कुचाथला यहूदायात बियादिल।
यहूदां मरि काय् धुंकाः शैतान वयाके दुहांवन। यहूदा अनं पिहां वया येशूयात ज्वंका छ्वयेगु नितिं यहूदी नायःतय्थाय वन। व बहनिया ई खः।
भ्वय् नये सिधय्का येशू व वय्कःया चेलात जैतून डाँडाय् थाहां झाल। अले येशूं धयादिल, “थौं चान्हय् छिपिं फुक्कं जितः त्वः ता बिस्युं वनी। धर्मशास्त्रय् थथे च्वयातः गु दु, ‘जिं फैजवा: यात स्यानाबी, अले फैचात उखेलाः थुखेलाः जुइतिनि।”
पत्रुसं लिसः बिल, “फुक्कसिनं त्वःता वंसां जिं ला छितः गुब्सं हे त्व:ते मखु।” अले प्रभु येशूं पत्रुयात धयादिल, “शैतानं छंके च्वंगु फुक्क चिज कायेगु इच्छा यानाच्वंगु दु। अय्नं छुं विश्वास कम मजुइमा धकाः जिं छंगु निंतिं प्रार्थना यानागु दु। अथेसां नं थौं चान्हय् खा हाले न्ह्यः छं जितः स्वकः तक म्हमस्यू धकाः धाइ।
अले पत्रुसं येशूयात धाल, “जि सी हे माःसां नं गुबलें जिं छित: म्हमस्यू धकाःधाये मखु।” अले मेपिं फुक्क चेलातय्सं नं अथे हे धाल।
अले येशू चेलात नापं गेतसमनी धाःगु थासय् झायादिल। येशूं थः चेलातय्त धयादिल, छिपिं परिक्षाय् मलाय्मा धकाः प्रार्थना याना च्वँ। अनंलि थः याकःचा येशू प्रार्थना यायेत झायादिल।
येशूं स्वकः तक प्रार्थना यानादिल, “हे बाः ज्यूसा थ्व दुःखयागु ख्वला जिथासं चीकादिसँ। अय्नं मनूतय्गु पाप क्षमा जुइगु छुं नं लँपु मदु धइगु खःसा छिगु हे इच्छा पूवनेमा।” उबलय् येशूं तसकं नुगः मछिंकाः दिक्क जुयादिल अले वय्कःया चति हिया फुति थें खः। परमेश्वरं स्वर्गदूतयात वयकःयाथाय् शक्ति बीत छ्वयाहयादिल।
प्रार्थना याये धुंका: येशू वय्कःया चेलातय्थाय् लिहांझायादिबलय् इपिं न्ह्यलं ब्वानाच्वनं। वय्क स्वकः खुसिइ झायादिबलय्, येशूं धयादिल, “दँ, जितः धोखा बीम्ह थन हे दु।
यहूदी नाय:त, सिपाइँत, तरवार व कथि ज्वनाः तःपिं भीडतनापं यहूदा नं वल। वं येशूयाथाय् वया, “गुरूजु, ज्वजलपा” धकाः वय्क: यात चुप्पा नल। थ्व यहूदी नायःतय्त वय्कःपिन्सं सुयाःत ज्वने मागु खःधयागु नितिं छगू चिं खः। अले येशूं धयादिल, “यहूदा, छु चुप्पां छःजितः धोखा बीगु ला?”
गुबले सिपाइँतय्सँ येशूयात ज्वन, पत्रुसं तरवार पिकयाः दकलय् तःधंम्ह पुजाहारीया छम्ह दासयागु न्हाय्पं हे ध्यना बिल। येशूं धयादिल, तरवार तापाक्क हे ती।
थ्व घटना बाइबलया थुपिं अध्यायपाखें काःगु खः मत्ती २६:१४-५६; मर्कूस १४:१०-५०; लूका २२:१-५३; यूहन्ना १२:६; १८:१-११
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।