42. ४२. येशू स्वर्गय् थाहांझायादीगु
येशू सीनाम्वाना झयादीगु दिं खुन्हु वय्कःया निम्ह चेलात लिक्क लाःगु गामय् वना च्वंगु खः। इमिसं लँय् ववं येशूयात छुयात जुइ धकाः खँ ल्हाःल्हां वना च्वंगु खः। इमिसं आशा यानाच्वंम्ह वय्कः मसिह खः अय्नं वय्कःयात स्यानाबिल। उपिं मिसातय्सं धाल, वयय्कः हाकनं म्वानाझायादी दु। इमिसं छुकि विश्वास यायेगु खः व इमिसं मसिल।
येशू उपिं निम्ह चेलातय्थाय् खनेदय्कः झायादिल अले इपिं नापं तुं झायादिल अय्नं उपिं चेलातय्सं वय्कःयात म्हसिके मफुत। वय्कलं इमित छुकिया बारे खँ ल्हानाच्वनागु धकाम न्यनादिल, अले इमिसं वय्कःयात छुं दिं न्ह्यः जूगू येशूया बारेया खँ कनाबिल। इमिसं छम्ह परदेशीनापं खँ ल्हानाच्वनागु दु धकाः बिचाः याना च्वन अले यरूशलेमय् छु छु घटना जूगु खः वं मस्या धकाः अले धयाच्वंगु खः।
अनंलि येशूं इमित परमेश्वरया वचनं मसिहया बारे छु धाइ धकाः व्याख्या यानादिल। वय्कलं इमित अगमवक्ततय्सं धया थकूगु खँ लुमंकादिल, मसिहं कष्ट नयेमालि, स्यानाबि अले स्वन्हु दय्कः हाकनं म्वानाझायादी। इपिं व गामय् थ्यनेवं छथाय् फयेतुइगु इच्छा यात उबलय् खिउँ खिउँ धायेधुंकूगु खः।
उपिं निम्ह चेलातय्सं येशूयात थःपिंनापं हे बाय् च्वनेत यनाप यात। अथे जुयाः वय्कः इपिं नापं हे च्वनादिल। इपिं बहनिया नसा नयेत तयार जूबलय् येशूं मरियात कयाः परमेश्वरयात सुभाय् बिया मरि कुचा थलादिल। अनंलिं उपिं चेलातय्सं वय्कः येशू हे खः धकाः म्हसिल। अय्नं थथें हे वय्कः इपिंपाखें अलप जुयादिल।
उपिं निम्ह मनूतय्सं थःथवय् धाल, “वय्कः ला येशू जुया च्वन! अथे जुयाः वय्कलं झीतः परमेश्वरया वचन व्याख्या यानादिल अले झीपिं गुलि लय्लय् ताया। थत्थें हे इपिं व थाय् त्वःता यरुशलेमय् तुं लिहां वन। इपिं अन थ्यनेवं हे इमिसं चेलातय्त धाल, “येशू म्वानाझायादीगु दु! जिमिसं वय्कःयात खनागु खः!”
चेलात खँल्हानाच्वंबलय् आकांझाकां येशू इपिं च्वनाच्वंगु क्वथाय् खनेदय्कः झायादिल अले येशूं धयादिल, “छिमित शान्ति!” चेलातय्सं वय्कःयात भुत धकाः च्वन। अय्नं येशूं धयादिल, “छिपिं छाय् ग्यानागु? छिमिसं जि येशू हे खः धकाः छाय् पत्याः याये मफुगु? जिगु ल्हाः व तुति स्व। भुततय्के जिके थें म्ह दइमखु।” थः भुत मखु धकाः क्यनादीत वय्कलं छुं नयेत हजि धकाः धयादिल। इमिसं छम्ह न्या हयाबिल अले वय्कलं व नयादिल।
येशूं धयादिल, “जिं छन्त धयागु खः जिगु बारे परमेश्वरया वचनय् च्वयातःगु फुक्क खँ पूवनेमाः।” अले वय्कलं इमित परमेश्वरया वचन बांलाक ध्वाथुइके फयेमा धकाः शक्ति बियादिल। वय्कलं धयादिल, “थ्व वचन यक्व न्हापा हे च्वयातःगु खः, मसिहं दुःख सीया सीमानि अले स्वन्हु दय्का हाकन म्वाना वइतिनि।”
“धर्मशास्त्रय् थथे नं च्वयातःगु दु, जिमि चेलातय्सं घोषणा याइ, सकलें मनूतय्सं थथःगु पाप क्षमाया निंतिं पश्चाताप यायेमा। इमिसं थ्व खँ यरुशलेमपाखें शुरू याइ अले लिपा फुक्क जातिया मनूतय्थाय् न्यंक वनि। छिपिं थुपिं हे खँया साक्षीत खः।”
अले पीन्हुतक येशू चेलातय्थाय् खनेदय्कः झायादिल। छक्व वय्कः न्यासः (५००) स्वया अप्वः मनूत दुथाय् खनेदय्कः झायादिल। वय्कलं थः चेलातय्त तक्वःमछि थः म्वाःम्ह खः धयागु दसि बियादिल। अले वय्कलं इमित परमेश्वरया राज्यया बारे स्यनेकने यानादिल।
येशूं वय्कःया थः चेलातय्त धयादिल, “स्वर्ग व पृथ्वीया दक्व अधिकार जितः बियातःगु दु। अय्जूगुलिं छिपिं वनाः फुक्क जातियपिं मनूतय्त चेला दय्की अले इमित बाःयाग नामं काय्यागु नामं व पवित्र आत्मायागु नामं बप्तिस्मा ब्यु। अले जिं स्यनाथें छिमिसं इमित स्यनेकने याना फुक्क खँ मानय् याकि। लुमंकी, जि न्ह्याबलें छिपिं नापं हे दइ।
येशू सीम्वाना वःगु पीन्हु लिपा, वय्कलं थः चेलातय्त धयादिल, “जिमि बाःनं छिमित पवित्र आत्मा बियादी धुंकाः छिमित शक्ति दइ, उबलय् तक छिपिं यरुशलेमय् पिया च्वँ।” अले येशू स्वर्गय् थाहां झायादिल नापं वय्कःयात सुपाँचं त्वःपुयाबिल अले इपिंपाखें खनेमन्त। येशू फुक्क खँय् राज्य यानादीत परमेश्वरया जवः ल्हाःपाखे च्वनादीगु दु।
थ्व सत्य घटनात बाइबलया थुपिं अध्यायतपाखें काःगु खः मत्ती २८:१६-२०; मर्कूस १६:१२-२०; लूका २४:१३-५३; यूहन्ना २०:१९-२३; प्रेरित १:१-११ बाट
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।