12. डेरा गुचावला

इस्राएल मानेय मिस्रले निकरून खुबेय हरीक होऊ रहत। हुन एभे दास ईरह्त, अर हूनी वायदा चा देशे जाते रहत! जे घला इस्राएलिया मांगला, मिस्रीया हूनाग हुन सपाक दिला, एथा तक कि सोना अर चाँदी अर खुबेय कीमत वस्तुया। दुसरा देशांग चा आधा मानेय परमेश्वर के विशवास करला अर जब इस्रायली मानेय मिस्रले निकरला तब हूनि बल हूनांग चा संग होला।

दिन चा दौरान बादर चा एक विशाल खम्भा हूनाचा पुरहे-पुरहे जाय। अर राती चा समयें हुन आगी चो खम्भा बनलो। परमेश्वर जो हुन बादर चा खम्बायें अर आगी चा खम्बायें रेहेय, रोझेय हूनाचा संग रेहेय अर हुन यात्रा करता दायं हूनांगचो अगवाई करलो। हूनांग बस ईतलोय करतो रेहेय कि हूनाचा पाटतेंव जातो।

थोड़े समय चा पासे, फिरौन अर हूनाचा मानेय आपला मन के बदल ला। हूनी इस्राएलियांग फेरेय आपला दास बनाऊक होऊ रहत। याहायकरता हूनिइता इस्राएलियांग पाठसी हींडावला। हुन परमेश्वर आया जो हूनांगचा मन के बदलू रेहेय। हूनितो इसे याहायकरता करलो कांयकि हुन चाहेय कि हर कोंहू यो जानोत कि फिरौन ले अर मिस्रयांग चा सपा देवांगले हुन, यहोवा, सबले शक्तिशाली आय।

जब इस्रायलीया मिस्र चा सेनांग एताक देखला तब हूनिइता जानला कि हूनि फिरौन चा सेना अर लाल समुद्र चा मंझते फंस्ला। हूनि खुबेय भय होला अर गागुक होला, “हमी मिस्र के कांयेक सांडलू? हमी मरिया ईता आवं!”

मूसा इस्राएलियांग बल्लो, “भय होताक बंद करा! परमेश्वर आज तुमचा करता लड़ीद अर तुमक वांचाईद। ”तब परमेश्वर मूसा क बल्लो, “इहीं मानेयांग लाल समुद्र चा पुरहे बड़ता करता बल।”

तब परमेश्वर हुन बादर चा खम्बाक नेउन इस्राएलियांग अर मिस्रियांग चा मंझते मांडाव दिलो ताकि मिस्री मानेय इस्राएलियांग देखुक ईपावो।

परमेश्वर मुसाक समुंद्रे आपला हाथ के लाम्बाऊक बल्लो। फेर परमेश्वर हूनाक समुद्र चा पानिक उजातेंव अर डेबरातेंव काराव दिलो, जिसे कि समुद्र ले होउन एक ठान वाट बनावलो।

इस्राएली मानेय आपला दुयेय पाट पानी चा दिवाल संग सुकला भुयें ले होउन गेला।

तब परमेश्वर हुन वाटे ले बादर के उठावलो ताकि मिस्री मानेय इस्राएलियांग चा वाचुन जाता ईताक देखो। मिस्रीया हूनांग धरता करता हूनांग चो पीछा करता चो उपाय करला।

मतलब हूनी समुद्र चा मध्य हुन वाटे इस्राएलियांग चो पीछा करला, तबले परमेश्वर मिस्रीयांग घबराव दिलो हूनांग अटकाव दिलो। हूनी चिच्यावला, “परावा! इसराएलियांग तेवले परमेश्वर लडीदा हेय!”

सपा इस्राएली समुद्र चा दुसरा पाट अम्बरला। तब परमेश्वर मूसा क बल्लो कि हुन फेरेय पानीये हाथ बड़ाउन। तब मूसा हूसेय करलो, तब पानी मिस्री सेनांग लग पड़लो अर आपला बराबर स्थितिय होलो। सपा मिस्री सेना डूबला।

जब इस्राएलिया देखला कि मिस्री मरू रहत हूनिइता परमेश्वर के विशवास करला। हूनिइता विशवास करला कि मूसा परमेश्वर चा तेवले भविष्यहकता आय।

इस्राएलि मानेय याहायकरता खुबेय हरीक रहत कायंकी परमेश्वर हूनांग मरता येले अर दास होता येले वांचाव रेहेय। एभे हुन परमेश्वर चो आराधना करुक अर हूनाचा आज्ञा चो पालन करता करता आजाद रहत। इस्राएलियांग आपला आजाद होता चो ख़ुशी मानावता करता अर परमेश्वर चा प्रशंसा करता करता कईठान गिथांग नीला कायंकी हूनी हूनांग मिस्रीयांग चा सेनायेले वांचाऊन रेहेय।

परमेश्वर इस्राएलियांग हर साल एक तिहार मनावतो चो आदेश दिलो यो सुरता करता करता कि किसे परमेश्वर मिस्रीयांग पराजित करलो अर हूनांग दास होउक आजाद करलो। हुन फसह चो तिहार बलिया आत। याहायें हुनांग चो उत्सव मानावता करता एक अच्छा भेडाक बलि करतो रेहेय, हुनाक भुन्जतो रेहेय, अर हुनाक बिना खमीर इता पोरी संग खातो रेहेय।