13. इस्राएलियांग संग परमेशवर चो वादा

इस्राएलियांग लाल समुद्र ले पार नेऊक जाता चा पासे, परमेश्वर हूनांग बादोडाक होऊन सिने बलता इता डोगरा तेव धरून गेलो। यो हूनेय डोंगरो आय जहा मूसा डसता ईता झाडिक देखू रेहेय। हुन मानेय हुन डोगरे चा खाले आपला तम्बूयांग स्थापित करलो।

परमेश्वर मूसाक अर इस्राएल चा सपा मानेयांग बल्लो, “तुमंग रोझेय माचा गोठ के माना से अर जो वाचा मैं तुम चा संग भान्दिंदा हूनाक बनाऊन ढोवतो आय। अगर तुमी इसे करासा, तो तुमी माचा इनाम खूबेय कीमतइतो धन, याजकांग चा राज्य, अर एक पवित्रजाति होवासे।”

परमेश्वर दुवारा हूनांग चा लग एता करता मानेय तीन दिन तक खुद के तयार करला। तबले परमेश्वर सिने डोंगरा चा टीपे ले खाले उतरलो। तब हुन इलो तब हवा धुका, होलो बिजलियां चमकला, धुवो उठलो, अर तुरहियांग चो जोरदार शब्द होलो। तब मूसा खुद उपरे डोंगरायें चघलो।

तब परमेश्वर मानेयांग संग एक वाचा बांधलो। हुन बल्लो, “मै तुमचो परमेश्वर, यहोवा आयं। महीचेय आयं जो तुमक मिस्र चा दासत्वे ले सांडावलेय। कोंहू दुसरा देव चो उपासना ईकरासे।”

मुर्ति ईबनावा अर हूनाचा उपास ईकरासे, कायंकी मैं, यहोवा, तुमचो एकलोय परमेश्वर आयं। बिना मतलब चो माचा नाव चो उपयोग ईकरासे। सातवां दिन के पवित्र मानता करता सुरता करासे। दुसरा शब्दे, छा: दिने आपला सपा काम करासे, सातवां दिन तुमचा बसता करता अर मक सुरता करता चो दिन आय।”

“आपला माय अर बाप चो आदर करासे। हत्या ईकरासे। व्याभिचार ईकरासे। चोरी ईकरासे। आपला पड़ोसी ची बायली, हूनेचा कही घला, समान के धरता चो इच्छा ईरखासे।”

तब परमेश्वर हूनी दस आज्ञाक पखना चो दूयठान पटिये लिखून मूसाक देऊन दिलो। परमेश्वर पालन करुक मानेयांग दुसरा खुबेय व्यवस्था दिलो। अगर हूनी हुन व्यवस्था चो पालन करला तब परमेश्वर हुन मानेयांग आशीर्वाद देऊक अर हूनांग चो अच्छा करता चो प्रतिज्ञा करलो। तबले हूनी कहा करता अगर हूनी हूनाचो पालन ईकरदे तब हुन हूनांग दण्ड देईद।

पमेश्वर इस्राएलियांग एकठान मंदिर बनाऊक घला बल्लो-मिलाप इतो मंदिर। हूनितो हूनाक सही सही सांगलो कि या मंदिर के किसे बनावतो आय, अर हूनाचा भीतरे का्य चिजांग ठोवतो आय। हूनी हूनाक हुन मंदिर के दूयठान खोली अलग करुक एकठान विशाल पड़दा बनाऊक घला बल्लो। परमेश्वर हुन पड़दा चा पाटतेव चा खोलियें एइद अर हुन रहीद। जहा परमेश्वर रेहेय हुन खोलिए जाता चो अनुमति केवल महायाजक के रेहेय।

हुन मानेयांग हुन मिलाप इतो मंदिर चा पुरहे एक ठान वेदी बनाऊक होइद। कोंहू बल परमेश्वर चा व्यावस्था चो अवज्ञा करिद हुन वेदियें एकठान जानवर धरून एओत। तब याजक हूनाक बलि करीद अर वेदियें परमेश्वर चा करता बलि चा रुपे डसाइद। परमेश्वर बल्लो कि हून जानवर चा रकत हुन मानेय चा पाप के ढापीद। या रितिये, एभे परमेश्वर हुन पाप के ईदेखीद। हुन मानेय परमेश्वर चा नजरे “शुध्द” ठहरीद। परमेश्वर मूसा चा भाई हारून के अर हारून चा वंशज के आपला याजक होता करता चुनलो।

परमेश्वर हूनी मानेय जो नियम देऊ रेहेय हूना चो पालन करुक तयार होला। हुन केवल परमेश्वर चा मानेय होऊक अर केवल हूनाचो आराधना करुक तयार होला।

कई दिन तक, मूसा सिने डोगरा चा टीपे रेहेय। हुन परमेश्वर के गोठियावते रेहेय। तबले मानेय हूनाचा बाह्डून एता चो इन्तजार करतेय-करतेय थकला। याहायकरता हुन हारून लग सोना धरून इला अर हूनाक एकठान मूर्ति बनाऊक बल्ला ताकि हुन परमेश्वर चा बजाए हूनाचो उपासना करुक सकोत। याहायकरता, हूनी भयंकर रुपे परमेश्वर चा विरुध्द पाप करला।

हारून बछरु चा आकारे सोना चो मूर्ति बनावलो। हूनी मानेय हुन मूर्ति चो उपासना करतो सुरु करला अर बलि चघावला! हूनांगचा पाप चा वजह से परमेश्वर हूनांग खुबेय रीस होऊ रेहेय। हुन हूनांग नाश करू देऊक चाहेय। तबले मूसा हूनांग इमारता चो परमेश्वर के विनती करलो। परमेश्वर हूनाचा विनतीक सुनलो अर हूनांग नाश ईकरेय।

आखिर मूसा सिने डोगरायेले खाले उतरून इलो। हुन हूनी दूयठान पखना चा पटियांग धरून रेहेय जहा परमेश्वर दस आज्ञा लीखलो। हुन ईतलो रीस होला कि हूनितो हुन पटियांग कुच कूचा करून दिलो।

फेर मूसा हुन मुर्तिक पिसुन हूनाक चटनी बनाव दिलो, अर हुन चटनीक पानीये मिलाउन हुन मानेयांग हुन पानी पियाव दिलो। परमेश्वर हूनी मानेयांग एक बीमारी पठावलो अर हूनायें खुबेय मानेय मरला।

जे पटियांग मूसा तोडु देऊ रेहेय हूनांग चा डेराक धरून मूसा हुन दस आज्ञा चा पखना चा नवा पटियांग बनावलो। तब हुन फेर डोंगरे चघलो अर प्राथना करलो कि परमेश्वर हुन मानेयांग माफ करो। परमेश्वर मूसा चो सुनलो अर हूनांग माफ करलो। नवा पटियें दस आज्ञाक धरून मूसा डोंगरे ले खाले उतरलो तब परमेश्वर सिने डोंगर ले प्रतिज्ञा चा देश तक इस्राएलियांग चो अगुवाई करलो।