17. दाउद संग परमेशवर चो वादा

शाऊल इस्राएल चो पहला। राजा रेहेय। हुन ऊँच अर सुन्दर रेहेय, जिसे हूनि मानेय चाहते रहत एक दम हूसोय इस्राएल ले आपला शासन चा पुरहे कई साले शाऊल एक अच्छा राजा रेहेय। तबले पासे हुन एकलो दूष्ट मानेय बनलो जो परमेश्वर चा बात के इमानेंय याहायकरता परमेश्वर एकलो दूसरा मानेय के चुनलो कि एक दिन हूनाचा ‘जघायें राजा बनिद।

परमेश्वर दाऊद नाव चो एकलो जवान इस्राएली मानस के चुनुन एक दिन शाऊल चा जघायें राजा होता करता तयार करुक सुरु करलो दाऊद बैतलहम नगर चो एकलो चरवाहो रेहेय। कई समय दाऊद मुड़ेन्दाक अर भालुक दुयेयटानांग मारू रेहेय कायंकि दाऊद दुवारा रखवाली करता समय हूनाचो बापीता चा भेड़ागयें हूनइतो हमला करू रेहेय। दाऊद एकलो नम्र अर धर्मी मानेय रेहेय। हुन परमेश्वर लग भरोसा करलो अर हूनाचा बात के मानलो।

जब दाऊद एभे जवान मानस रेहेय, हुन ऊँच चोडा गोलियत चा विरुद्द लड़ाई करलो। गोलियत एक दम अच्छा सैनिक रेहेय हुन खूब मजबूत अर लगभग तीन मीटर ऊँच रेहेय तबले परमेश्वर गोलियत के मारुक अर इस्राइल के वांचाउक दाऊद चो साहायता करलो हूनाचा पासे, दाऊद इस्राएल चा शत्रुयांग ले कई बार जीत प्राप्त करलो। दाऊद एक बड़े सैनिक बनलो अर हुन खुबेय युद्धे ले इस्राएली सेना चो अगवाई करलो। मानेय हूनाचो खुबेय प्रशंसा करला।

मानेय दाऊद के इतलो स्नेह करला कि शाऊल हूनाक जलन होलो। आखिर शाऊल हूनाक मारूक चाहते रेहेय, याहायकरता दाऊद हूनाक अर हूनाचा सैनिकांगले लुकुक बादोड़े परावलो। एक दिन, जब शाऊल अर हूनाचा सैनिक दाऊद चा खोजे रहत तब शाऊल एक ठान गुफायें गेलो। यो हूनेय गुफो आय जाहाँ दाऊद लुकुन रेहेय, तबले शाऊल हूनाक इदेखेय। दाऊद शाऊल चा पाटतेंव हूनाचा एक दम लघेय गेलो अर हूनाचा कपड़ायें ले एक कुटको काटलो। पासे, जब शाऊल हुन गुफायें ले निकरलो तब दाऊद हूनाक चिचयाउन हुन कपड़ा चा कुटकाक देखावलो। या रितियें, शाऊल जानलो कि दाऊद राजा बनता करता हूनाक मारुक इन्कार करूं दिलो हाय।

कुछ समय चा पासे, शाऊल युद्धे मरलो, अर दाऊद इस्राएल चो राजा बनलो। हुन एक अच्छा राजा आय, अर मानेय हूनाक मया करलो। परमेश्वर दाऊद के आशिषीत करलो अर हूनाक सफल बनावलो। दाऊद कई युद्धे लड़लो, अर परमेश्वर इस्राएल चा शत्रुयांग हारावता करता साहयता करलो। दाऊद यरूशलेम नगर के जीतुन हूनाक आपलो राजधानी बनावलो, जहा हुन रहून शासन करलो। दाऊद चालीस साल तक राजा रेहेय। या समय चा दौरान, इस्राएल सामर्थी अर धनवान बनलो।

दाऊद एकठान मंदिर बनाऊक चाहेय जहा सपा इस्राएली परमेश्वर चो आराधना करुक सकत। लगभग 400 साल ले, हूनि मानेय मूसा चा बनावला इता मिलाप इता तम्बूयें परमेश्वर चो आराधना करते रहत अर हूनाचा करता बलिदान चघावते रहत।

तबले हूता नातान नाव चो एकलो भविष्यवक्ता रेहेय। परमेश्वर हूनाक दाऊद के यो बलुक पठावलो: “तुयं खुबेय युध्दे लड्लिस, याहायकरता तुयं माचा करता या मंदिर के ईबनावसे। तुचो बेटा बनाईद। तब भी, मय तुक खुबेय आशिषीत करीन। तुचो एकलो वंशज हमेशा करता माचा मानेयांग लग राजा चा रुपे शासन करीद।” सदा करता शासन करीयो यो एक मात्र दाऊद चा वंशज मसीहा रेहेय। मसीहा परमेश्वर चो चुनलो इतो मानेय रेहेय जो संसार चा मानेयांग हूनाचा पापे ले वांचावइद।

जब दाऊद नातान चा संदेश के सुनलो तब हुन परमेश्वर के धन्यवाद करलो अर हूनाचो स्तुति करलो। परमेश्वर हूनाचो प्रतिष्टाक बड़हावेय अर हूनाक खुबेय आशिष देय। बेशक, दाऊद ईजानेय कि परमेश्वर इंही गोठांग केभे करीद। या समय हमी जानुन्दा हु कि इस्राएलियांग एक लम्बा समय तक, लगभग 1,000 साल तक मसीह चा ऐताक प्रतीक्षा करुक पड़ीद।

दाऊद कई साल तक न्याय पूर्वक मानेयांग शासन करलो। हुन बडे निष्ठा ले परमेश्वर चा गोठ के मानलो अर परमेश्वर हूनाक आशिषित करलो। हालाँकि, आपला जीवन चा अन्ते हुन परमेश्वर चा विरूद्ध भयानक पाप करु रेहेय।

एक दिन दाऊद आपला महले ले दुवारे झांकलो अर एकली सुंदर बायलीक आंग धोवताक देखलो। हुन हूनेक इजानेय, लेकिन हुन मालूम करलो कि हूनेचो नाव बेतशेबा आय।

आपला नजरे के फेरता चो बजाए, दाऊद हूनेक आपला लग आनुक कौनाकतो पठावलो। हुन हूनेचा संग सोवलो अर हूनेक वापस घरे पठाव दिलो। थोड़े समय चा पासे बेतशेबा यो बलुन दाऊद लग संदेश पठावली कि हुन आंगे आसेय।

बेतशेबा चो मानस उरिय्याह नाव चो एकलो मानेय रेहेय। हुन दाऊद चा उतम सैनिकांग ले एक रेहेय। हुन समय हुन युध्द करुक बाहर जाऊरेहेय। दाऊद ऊरिय्याह्क युध्द ले वापस कोकुन हूनाक आपली बायली संग रहुक बल्लो। तबले दुसरा सैनिक युध्दे रहत याहायकरता ऊरिय्याह घरे जाऊक मना करु दिलो। मतलब दाऊद ऊरिय्याह्के वापस युध्दे पठाव दिलो अर सेनापतिक हूनाक युध्दे इसा जघायें रहुक बल्लो जहा शत्रु सबले शक्तिशाली आत ताकि हुन मरो। तब इसे होलो कि ऊरिय्याह युध्दे मरलो।

ऊरिय्याह युध्द धे मरला चा पासे दाऊद बतशेबा संग बिहाव करलो। पासे, हुन दाऊद चा कड़हाक जनम दिली। दाऊद जो करलो हूनाये परमेश्वर खुबेय क्रोधित रेहेय, याहायकरता हुन नातान भविष्यवक्ताक दाऊद के यो सांगता करता पठावलो कि हूनाचो पाप कितलो बुरा रेहेय। दाऊद आपला पाप चो पच्छ्ताप करलो अर परमेश्वर हूनाक क्षमा करु दिलो। आपला शेष जीवने, आपला कठिन समयें बल दाऊद परमेश्वर चा पाट-पाट गेलो अर हूनाचा गोठ के मानलो।

तबले दाऊद चो कड़हो मरलो। या रितियें परमेश्वर दाऊद के दण्ड करलो। याह्चो अलावा, दाऊद चा मरते तक, हूनाचा आपला परिवार चा कई मानेय हूनाचा विरुद्ध लड़ाई करला, अर दाऊद चो आपलो शक्ति कम होऊ रेहेय। तबले परमेश्वर विश्वासयोग्य रेहेय अर एभे बल हुन करलो जो हुन दाऊद संग करता चो वादा करु रेहेय कि हुन करीद, भले ही दाऊद हुनेचो अवज्ञा करु रेहेय। पासे, दाऊद अर बतशेबा चो दुसरा संतान जनम होलो, अर हूनी हूनाचो नाव सुलेमान ठोवला।