18. दूय भाग होलो राज

दाऊद राजा चालीस साल तक शासन करलो। तब हुन मरलो, अर हूनाचो बेटा सुलैमान इस्राएले शासन करुक सुरु करलो। परमेश्वर सुलैमान के गोठियालो अर हूनाक समजावलो कि हुन सबले ज्यादा का्यं चाहिदा कि परमेश्वर हूनाचा करता करे। सुलेमान परमेश्वर के मांगलो कि हुन हूनाक खुबेय बुध्दिमान बनावो। यो गोठ परमेश्वर के प्रसन्न करलो, याहायकरता परमेश्वर सुलेमान के संसार चो सबले बुध्दिमान मानस बनाव दिलो। सुलेमान खुबेय गोठांग सिखलो अर हुन एक बुध्दिमान साशक रेहेय। परमेश्वर हूनाक खुबेय धनवान बल बनाव देऊ रेहेय।

यरूशलेमे सुलेमान हुन मंदिर के बनावलो जेचा करता हूनाचो बापीतो योजना बनाव रेहेय अर सामान के एकेय लग करू रेहेय। अब मानेय मिलाप इतो तम्बू चा बजाए मन्दिरे परमेश्वर चो आराधना करते रहत अर हूनाचा करता बलि चघावते रहत। परमेश्वर एऊन मंदिरे मौजूद रहयो आय, अर हूता हुन आपला मानेयांग संग वास करयो आय।

तबले सुलेमान दुसरा देशे चा बायलीयांग संग प्रेम करलो। हुन खुबेय झन लग भग 1,000 बायलीयांग संग बिहाव करुन परमेश्वर चो अवज्ञा करलो! हूनाये ले खुबेय झन बायलीया पराये देशे ले इला अर आपला संग आपला देवांग आनला अर हूनांग चो आराधना करतो जारी रखला। जब सुलेमान डोकरो होलो तब हून बल हूनांग चा देवांग चो आराधना करला।

या करता परमेश्वर सुलेमान के रीस होऊ रेहेय। हुन बल्लो कि हुन इस्राएल देश के दूय ठान राज्ये विभाजित करता चा दुवारा हूनाक दण्ड देइद। हुन सुलेमान चा मरला चा पासे इसे करीद।

सुलेमान चा मरला चा पासे, रहबाम राजा बनलो। इस्राएल देश चा सपा मानेय हूनाक आपलो राजा चा रुपे स्वीकार करुक एकेय लग होला। हूनिइता रहबाम के शिकायत करला कि सुलेमान हूनांग खुबेय कठिन परिश्रम कराव रेहेय अर खुबेय कर वसुलू रेहेय। हूनिइता रहबाम के विनती करला कि हूनांग कम काम करावो।

तबले रहबाम हूनांग पकी मुर्खता ले जवाब दिलो, “ तुमी बलासा कि माचो बाबा सुलेमान तुमक कठिन परिश्रम करावलो। तबले में तुमक हूनाचो ले बल खुबेय कठिन परिश्रम कराईन, अर मै तुमक हूनाचो ले बल खुबेय पीड़ित करीन।”

जब मानेय हूनाक इसे बल ताक सुनला तब हूनियांग लगले कई झन हूनाचो विरुध्द बलवा करला। दस गोत्र हूनाक सांडून दिला; हूनाचा संग दूय गोत्र ही माचला। इंही दूय गोत्र खुद के यहूदा चो राज्य बल्ला।

बाकी दस गोत्र यारोबाम नाव चा मानस के आपलो राजा बनावला। इंही गोत्र देश चा उत्तर-पूर्वी भागे रहत। हुन खुद के इस्राएल चो राज्य बल्ला।

तबले यारोबाम परमेश्वर चा विरुध्द बलवा करलो अर मानेयांग पाप करावलो। हुन आपला मानेयांग चो दुवारा आराधना करुक दूय ठान मूर्ति बनावलो। हूनी एभे यहुदा चा राज्ये यरूशलेम परमेश्वर चा मंदिरे आराधना करुक इजात।

यहुदा अर इस्राएल चा राज्य शत्रु बनला अर अक्सर एक दुसरे चा विरुध्द लडुक लगला।

इस्राएल चा नवा राज्ये, सपा राजा दुष्ट रहत। हूनांग लगले कई राजा हूनांग या जघायें राजा बनुक चाहया इता दुसरा इस्राएलियांग चा दुवारा मरु रहत।

इस्राएल राज्य चा सपा राजा अर अधिकतर मानेय मूर्तियांग चो आराधना करला। जब हूनिइता इसे करला, तो हूनि अक्सर वेश्यांग संग सोवला अर एथा तक कि कई बार मूर्तियांग चा पुरहे कड़हांग बलि बल करला।

यहुदा राज्य चो राजा, दाउद चो वंशज आत। इंही राजांग ले कई भले मानेय रहत हूनि इता न्याय पूर्वक शासन करला अर परमेश्वर चो आराधना करला। तबले यहुदा चा अधिकांश राजा दुष्ट रहत। हूनि इता दुष्टतायें शासन करला, अर मूर्तियांग चो आराधना करला। एथा तक कि हूनियांग लगले कुछ राजा झूठा देवांग चा पुरहे आपला कड़हांग बल बलि करु दिला। यहुदा चा अधिकतर मानेय बल परमेश्वर चा विरुध्द बलवा करला अर दुसरा देवांग चो आराधना करला।