19. भविष्यद्वक्ता

परमेश्वर हमेशा इस्राएलियांग लग भविष्यवक्तांग पठावतेय रहयो आय। भविष्यवक्ता परमेश्वर चा संदेसांग सुनया आत अर फेर हूनाक मानेयांग सांगया आत।

जब आहाब इस्राएल राज्ये राजा रेहेय तब हुन समय एलिय्याह भविष्यवक्ता रेहेय। अहाब एक गलत मानेय आय। हुन झुठो बाल देव चो आराधना करावता करता मानेयांग विवश करू रेहेय। याहायकरता एलिय्याह अहाब के बल्लो कि परमेश्वर हूनि मानेयांग दंडित करुक जाते रेहेय। हुन हूनाक बल्लो, “जब तक मै फेरेय पानी ऐता करता इबलें तब तक इस्राएल चा राज्ये ना पानी ऐयीद अर ना ओस गिरीद।“ यो गोठ अहाब के इतलो रीस करलो कि हुन एलिय्याहके मारता चो निर्णय करलो।

याहायकरता परमेश्वर एलिय्याहके बल्लो कि हुन बादोड़े जाऊन आहाब ले लुकू रहत। एलिय्याह बादोड़े हुन झरन लग गेलो जहाँ जाताकरता परमेश्वर हूनाक सांगुरेहेय। हर बिहाने अर हर सांजे, चेड़ेला एलिय्याह करता पोरी अर मांस धरून ऐवया आत। या सपूर्ण समयें, अहाब अर हूनाचा सेना एलिय्याह चो खोज करते रहत, तबले हूनाक खोजुक एपावंला।

पानी एयेता चा कुछ समय चा पासे हुन झरना सुकलो। याहायकरता एलिय्याह लघेय चा एक देशे गेलो। हुन देशे एकली गरीब रांडी रेहेय जेचो एकलो कड़हो रेहेय। हूनांगचा लग भोजन लगभग उरकुरेहेय कायंकि हूता कहीं फसल इहोऊ रेहेय। तबले फेर, हुन बायली एलिय्यह चो देखभाल करली, याहायकरता परमेश्वर हूनेचो अर हूनेचा कड़हा चो जरूरत के पुरा करलो, या कारने हूनेचो आटा चो पात्र अर हूनेचो तेल चो कुप्पी केभेय खाली इहोलो। हुन पुरा आकाल चा दोरान हूनांगचा लग भोजन रेहेय। एलिय्याह कुछ साल तक हूता रेहेय।

साढ़े तीन साल चा पासे, परमेश्वर एलिय्याहके बल्लो कि हुन फेरेय पानी एतले करीद। हुन एलिय्याहके वापस इस्राएल चा राज्य जाऊन अहाब के गोठियाऊक बल्लो। याहायकरता एलिय्याह अहाब लग गेलो। जब अहाब हूनाक देखलो तो हूनाक बल्लो, “ अच्छा तुयं आस, मुसीबत पैदा करीयो इतो! “एलिय्याह जवाब दिलो, “मुसीबत पैदा करीयो इतो तो तुयं आस! तुयं यहोवाक त्याग लिसा। हूनेय सच्चा परमेश्वर आय, तबले तुयं बाल चो आराधना करसा एभे तुयं इस्राएल राज्य चा सपा मानेयांग कार्मेल पर्वते धरून ऐसे।”

मतलब सपा मानेय कार्मेल डोंगरायें गेला। हूनी मानस बल इला जो बलिया आत कि हूनी बाल चा संदेश के बलिया आत। यो बाल चो भविष्यवक्ता आय। हूनि सपा 450 रहत। एलिय्याह मानेयांग बल्लो, “कब तक तुमी आपला मनांग फिराव राहासे? अगर यहोवा परमेश्वर आय तो हूनाचो आराधना करा! अगर बाल परमेश्वर आय तो हूनाचो आराधना करा!”

तब एलिय्याह बाल चा भविष्यवक्तांग बल्लो, ”एक ठान बैयलाक बलि करूँन हूनाचा मांस के बलिदान देऊक एक वेदिये माडावा, तबले आगी ईधरावा। हूनाचा पासे मै बल हूसेय करिन, अर एक अलग वेदियें हुन मांस के माडायीन। तब यदि परमेश्वर वेदियें आगी गिरायदा हेय तो जानासे कि हुन सच्चा परमेश्वर आय।” तब बाल चा भविष्यवक्तांग एक बलि तैयार करला तबले आगी इलगावेय।

तब बाल चा भविष्यवक्ता बाल के प्रार्थना करला, “हे बाल, हमचो सुन!“ पूरा दिन हूनिइता प्रार्थना करला अर चिचयावला अर एथा तक कि खुद के चाकुयें काटला, तबले बाल जवाब ईदेय, अर हुन कहीं आगी इगी रावेय।

बाल चा भविष्यवक्ता बाल चो प्रार्थना करूँक लगभग पूरा दिन बितावला। अंतत: हूनिइता प्रार्थना करुक बंद करला। तब एलिय्याह दुसरा बैला चा मांस के परमेश्वर चा वेदियें मंडाव दिलो। हूनाचा पासे, हुन मानेयांग पानी चो विशाल बरतनांग हुन बलिदाने तब तक रिकोऊक बल्लो जब तक कि मांस, लकड़ीयें, अर एथा तक कि वेदी चा आस पास भूये पूरी तरह ले फिजो।

तब एलिय्याह प्रार्थना करलो, “ए यहोवा, अब्राहम, ईसाहक, अर याकुब चो परमेश्वर, हमक दिखाव कि तुयं इस्राएल चो परमेश्वर आस अर यो कि मै तुचो दास आयं। मक जवाब दे जिसे कि एहिं मानेय जानदे कि तुयं सच्चा परमेश्वर आस।”

जल्दी आकाशे ले आगी गिरलो अर हुन मांस, लकड़ीयांग, पखना, माटी, अर एथा तक कि वेदी चा आस पास चा पानीक बल डसाव दिलो। जब मानेय यो देखला कि, हूनि भूये घुड़ला अर बल्ला, “यहोवा ही परमेश्वर आय! यहोवा ही परमेश्वर आय!”

तब एलिय्याह बल्लो, ”बाल चा एकलो बल भविष्यवक्ता वाचुन जाऊक इपाओत!” याहायकरता मानेय बाल चा भविष्यवक्तांग धरला अर हूनांग हुता ले अलग नीला अर हूनांग मारू दिला।

तब एलिय्याह अहाब राजाक बल्लो, “जल्दी तुचा घरे पराव, कायंकी पानी एवयो इतो आय।” जल्दी बादर घने होलो, अर खुबेय पानी सुरु होलो। यहोवा हुन सुकलाक उरकावलो करते रेहेय। याहायेय प्रघट होलो कि यहोवा सच्चा परमेश्वर आय।

जब एलिय्याह आपला कामके उरकावलो, तब परमेश्वर एलिशा नाव चा एकला मानस के आपलो भविष्यवक्ता होता करता चुनलो। परमेश्वर एलिशा चा माध्यमे खुबेय चमत्कार करलो। एक चमत्कार नामान संग होलो। हुन एक शत्रु चा सेना चो सरदार रेहेय, तबले हूनाक मुहें एक बुरा रोग होऊ रेहेय। नामान एलिशा चा बारेयें सुनु रेहेय, याहायकरता हुन एलिशा लग इलो अर हूनाक हुन अच्छा करुक निवेदन करलो। एलिशा नामान के बल्लो कि जाऊन यरदन नदी चा पानीयें सात बार डूबकि लगाव।

नामान रीस होलो। हुन हूसे करुक मना करु दिलो, कायंकी यो हूनाक मुर्ख चो काम लागिदा हेय। तबले पासे हुन आपला मन के बदल्लो अर जाऊन यरदन नदियें चा पानीयें सात बार डूबकि लगावलो। जब आखरी बार हुन पानीयें ले बाहिर निकरलो तब परमेश्वर हूनाक अच्छा करू दिलो।

परमेश्वर इस्राएल मानेयांग लग दुसरा खुबेय झन भविष्यवक्तांग पठावलो। हूनी सपा मानेयांग मुर्तियांग चो आराधना करतो बंद करुक बल्लो। हूनाचो बजाए, हूनांग एक दुसरे चा संग न्यायपूर्वक व्यवहार करतो आय अर एक दुसरा संग दया करतो आय। हूनी भविष्यवक्ता मानेयांग चेतावनी दिला कि हूनांग गलत काम के बंद करतो आय अर हूनाचो बजाए परमेश्वर चा गोठ के पालन करतो आय। अगर हूनी मानेय इसे ईकरदे तो परमेश्वर हूनांग दोषी मानून हूनांग चो न्याय करीद, अर हूनांग दण्ड देयीद।

अधिकांश समय, हूनि मानेय परमेश्वर चो आज्ञा चो पालन ईकरत। अक्सर हूनिइता भाविश्य्वातांग संग गलत व्यवहार करला अर एथा तक कि केभेय-केभेय हूनांग मारु देत। एक बार, हूनिइता यिर्मयाह भविष्यवक्ताक सुकला चुवायें भरु दिला अर हूनाक मरुक सांडून दिला। हुन चुवां चा खाले चिखले धसलो। तबले राजाक हूनाचा लग दया इलो अर हून आपला सैनिकांग आदेश दिलो कि यिर्मयाहके मरता चा पुरहेय हूनाक चुवेंले बाहीर झींका।

भविष्यवक्ता परमेश्वर तेवंले बलतो जारी रखला भले ही मानेय हूनाक नफरत करला। हूनिइता मानेयांग चेतावनी दिला कि अगर हूनिइता पश्चताप ईकरदे तब परमेश्वर हूनांग नाश करुदेयीद। हूनिइता मानेयांग यो बल याद करावला कि परमेश्वर हूनांग चा लग मसिहाक पठावता चो प्रतिज्ञा करलो हाय।