20. बंधनेले अर निकला

इस्राएल चो राज्य अर यहुदा चो राज्य दुयेय ठान परमेश्वर चा विरुध्द पाप करला। हूनिइता हुन वांचाक तोडू दिला जो परमेश्वर हूनांग चा संग सिनेयें बांधू रेहेय। परमेश्वर हूनांग पश्चताप करुक अर फेरेय हूनाचो आराधना करुक चेतावनी देऊक आपला भविश्य्वाक्तांग पठावलो, तबले हूनिइता हूनांग चा गोठ के मानुक इंकार करु दिला।

मतलब परमेश्वर हूनांग चा शत्रुयांग हूनांग नाश करुक सक्षम करता चा दुवारा दुयेय ठान राज्ये दंडित करलो। आशूर एक दूसरा देश आय जो खुबेय शक्तिशाली होऊ रेहेय। हूनी दुसरा देश चो प्रति खुबेय निर्दयी बल रहत। हूनिइता ऐऊन इस्राएल चा राज्य के नाश करु दिला। अशुरिया ऐऊन इस्राएल चा राज्ये खुबेय झनांग मारू दिला, जो चाहे हूनाक लुटला, अर देश चा कई हिस्साक डसाव दिला।

अश्शुरिया सपा अगुवांग, धनवान मानेयांग, अर जो कीमती वस्तु बनाऊक सकयात एक लग जमा करा अर हूनी हूनांग अश्शुर देशे निला। इस्राएले केवल दुयेक झन गरीब इस्राएली वांचला।

फेर अश्शुरी मानेय हुन देशे रहता करता विदेशियांग धरून इला। हूनि विदेशिया हुन नगर के फेर बनावला जो इस्राएलियांग हुता वांचु रहत हूनांग हूनिइता बिहाव करला। हूनी मानेयांग चो वंशज सामरी बल्ला।

यहूदा चा राज्य चा मानेय देखला कि किसे परमेश्वर हूनाचा लग विशवास ईकरता अर हूनाचा गोठ के इमानता चो कारन इस्राएल चा राज्य चा मानेयांग दण्ड देऊ रेहेय। तबले बल हूनिइता कनानियांग चा देवांग चा मूर्तियांग चो आराधना करला। परमेश्वर हूनांग चेतावनी देता करता भविष्यवक्तांग पठावलो, तबले हूनिइता सुनुक इंकार करु दिला।

लगभग 100 साल चा पासे अश्शुरिया इस्राएल चा राज्य के नाश करु दिला। परमेश्वर बेबीलोन चा राजा, नबुकदानेस्सर के यहुदा चा राज्ये हमला करता पठावलो। बेबीलोन एक शक्तिशाली देश रेहेय। यहुदा चा राजा नबुकदानेस्सर चो दास बनुक अर हर साल हूनाक खुबेय धन चो भुगतान करुक सहमत होलो।

तबले कुछ साल चा पासे, यहुदा चो राजा बेबीलोन चा विरुध्द बलवा करलो। मतलब बेबिलोनिया वापस ऐऊन यहुदा चा राज्ये हमला करला। हूनिइता यरुशलेम नगर के कब्जा करला, मंदिर के नष्ट करू दिला, अर नगर अर मंदिर चा खजानांग लुटून निला।

बलवा करता चो कारन यहुदा चो राजाक दण्ड देऊक नबूकदनेस्सर चा सैनिक राजा चा बेटाक हूनाचा पुरहे मारु दिला अर फेरेय हूनाक आंधो करु दिला। हूनाचा पासे, हुन राजाक निला ताकि हुन बेबीलोन चा जेल खानायें मरो।

नबूकदनेस्सर अर हूनाचो सेना यहुदा चा राज्य चा लगभग सपा मानेयांग बेबीलोन निला, केवल सबले गरीब मानेयांग पाटतेवं सांडू दिला ताकि हूनी वेडान्गयें फसल जगवता। समय चा या काल के बन्धुआई बल्ला हात जाहाँ परमेश्वर चा मानेयांग प्रतिज्ञा चा देशे ले निकरून जाता करता मजबूर करू रहत।

भले ही परमेश्वर आपला मानेयांग हूनांग चा पाप करता बन्धुआईयें नेता करता दण्ड दिलो, तबले बल हुन हूनांग आपला प्रतिज्ञाक इभुलकू रेहेय। परमेश्वर आपला मानेयांग निगरानी करतो जारी रखलो अर आपला भविष्वक्तांग चो दुवारा हूनांग गोठयावतेय रेहेय। हुन प्रतिज्ञा करलो कि सत्तर साल चा पासे, हूनी फेरेय प्रतिज्ञा चा देशे बाहाड़ादे।

लगभग सत्तर साल चा पासे, फारस चो राजा कुस्रू बेबीलोन के हारावलो, याहायकरता बेबीलोन चा साम्राज्य चा बजाय फारस चा साम्राज्य कई देशे शासन करलो। इस्राएली मानेय एभे यहूदी बलाय आत। हूनांगयेंले खुबेय झन आपला पुरा जीवन बेबिलोने बिताव रेहेय। केवल खुबेय कम डोकरा यहुदियांग केय यहुदा चो देश सुरता रेहेय।

फारसी मानेय खुबेय सामर्थी रहत, तबले हूनिइता आपला जीतला इता मानेयांग लग दया करु रहत। फारसी मानेयांग चो राजा बनला चा कम समय चा पासे, कुस्रू एक आदेश दिलो कि कोंहू बल यहूदी जो यहुदाक बाहाडूक चाहत, हून फारसे ले निकरून वापस यहुदायें जाऊक सकिदा हेय। एथा तक कि हुन हूनाक मंदिर के फेर बनावता करता धन दिलो मतलब बन्धुआई चा सत्तर साल पासे, यहुदियांग चो एक समूह यहुदायें यरुशलेम नगरे बाह्डून एवोत।

जब हूनी मानेय यरुशलेम अम्बरला तब हूनिइता मंदिर चा अर एक भोवर चा दिवाल के फेर बनावला। फारसी मानेय एभे बल हूनांग लग शासन करधात तबले एक बार फेरेय हूनी प्रतिज्ञा चा देशे रहया आत अर मंदिरे आराधना करते रहत।