21. परमेश्वर मसीह चो वादा करिदा हेय

जब परमेश्वर संसार के बनाव रेहेय, हुन जानते रेहेय कि हूनाक पासे कोन्ही दिन मसीक पठाऊक पड़ीद। हुन आदम के अर हव्वा क प्रतिज्ञा करलो कि हुन इसे करीद। हुन बल्लो की हव्वा एक वंशज जनमिद जो साँप चा मुढाक कुचलिद। जे साँप हव्वाक धोका दिलो हुन निसन्देह शैतान आय। परमेश्वर चो अर्थ आयकी मसीह पूरी तरह शैतान के हाराइद।

परमेश्वर आब्रहाम के प्रतिज्ञा करु रेहेय कि हूनाचा दुवारा संसार चा सपा जातियाँ आशिष पांवदे। परमेश्वर पासे कोन्ही समय मसीक पठावता चा दुवारा या प्रतिज्ञाक पुरा करीद। हुन मसीह संसार के हर एक जाति येंले मानेयांग हूनांगचा पापले साड़ाइद।

परमेश्वर मुसाक प्रतिज्ञा करु रेहेय कि भविष्यें हुन मुसा चो समान एक दुसरा भविष्यक्ताक पठाईद। हुन भविष्यक्ताक मसीह होईद। या रीतियें परमेश्वर फेर प्रतिज्ञा करलो की हुन मसीक पठाइद।

परमेश्वर राजा दाऊद के प्रतिज्ञा करू रेहेय की हुनाचो एक वंशज मसीह होइद। हुन राजा होइद अर परमेश्वर चा मानेयांग सदा करता शासन करिद।

परमेश्वर यिर्मयाह भविष्वक्ताक गोठियावलो अर बल्लो कि एक दिन हुन एक नवो वाचा बाँधीद। हुन नवो वाचा इसत्राएलांग संग सीनै बंधु रहेय जुनो वाचाचो इंसा इहोय। जब मानेयांग संग हुन आपला नवा वाचाक बाँधीद, तब हुन हूनांग लग खुदके व्यंक्तिगत रूपे प्रघट करीद। हर एक मानेय हुसेय मया करदे अर हुनाचो व्यवस्था चो पालन करता चो इच्छा रखीद। परमेश्वर बल्लो की यो हुनाचो व्यवस्था चो हुनांग चा दिले लिखलो इसा होइद। हुनी हुनाचा मानेय होदे, अर परमेश्वर हुनांग चा पापके छमा करीद। हुन मसीह होइद जो हुनाचा संग हुन नवा वाचा बाँधीद।

परमेश्वर चा भविष्यद्वक्ता यो बल बल्ला की मसीह एक भविष्यद्वक्ता होइद। एक भविष्यद्वक्ता हुन मानेय जो परमेश्वर चा वचनके सुनिदाहेय अर फेर मानेयांग परमेश्वर चा संदेसाक घोषणा करिदा हेय। जेके पठावता चो परमेश्वर प्रतिज्ञा करू रेहेय हुन मसीह एक सिद्ध भविष्यद्वक्ता होइद। अर्थात् हुन मसीह परमेश्वर चो संदेश के अच्छी तरहा सुनिद, अर हुनी मानेयांग हुन संदेशांग अछासे सिखाइद।

इस्त्राएली याजक मानेयांग करता परमेश्वर चा पुरहे बलिदान चघावतो जारी रखला यो बलिदान मानेयांग चा पाप करता हुनाक परमेश्वर दुवारा दंड करता इता जघायें चघाव रहत। याजक मानेयांग करता प्रार्थना बल करला। तबले हुन मसीह सिद्ध महायाजक होइद जे परमेश्वर के देता करता सिद्ध बली चा रूपे खुदके चघावलो। अर्थात् हुन केभेय पाप इकरीद, अर जब हुन खुदके बली होता करता देइद, तब संसार चो कोंहू बल दुसरा बली जरूरी इहोइद।

मानेयांग चा समुहयें राजा अर प्रधान शासन करधात, अर केभेय-केभेय हूनी गलती करया आत। राजा दाऊद केवल इस्राएलियांग लग शासन करलो, तबले राजा दाऊद चो वंशज मसीह पूरा संसारे शासन करीद, अर हुन सदा करता शासन करीद। याहचो अलावा हुन हमेसा न्यायपूर्ण रीतीयें शासन करीद, अर सही निर्णय नेइद।

परमेश्वर भविष्यद्वक्ता मसीह चा बारे खुबेय गोठांग बल्लो। उदाहरण करता, मलाकी बल्लो कि मसीह चा एताचा पुरहे दुसारा भविष्यद्वक्ता ऐइद। हुन भविष्यद्वक्ता खुबेय महत्वपूर्ण होईद। हूनाचा अलावा, यशायाह भविष्यद्वक्ता लिखलो कि मसीह एकली कुआँरियें ले जनम धरिद। अर मिका भविष्यद्वक्ता बल्लो कि मसीह बैतलहम नगरे जनम धरिद।

यशायाह भविष्यवक्ता बल्लो कि मसीह गलील चा क्षेत्रयें वास करीद। जे मानेय खुबेय दुखी आसत मसीह हूनांग शान्ति देइद। हुन कैदीयांग बल आजाद करीद। मसीह बीमार ईतांग अर जे सुनुक ईसकत, देखुक ईसकत, गोठयाऊक ईसकत, अर ऊठुक ईसकत हूनांग बल अच्छा करिद।

यशायाह भविष्यद्वक्ता यो बल बल्लो कि मानेय मसीहक नफरत करदे अर हूनाक स्वीकार करुक इनकार करदे। दुसरा भविष्वद्वक्ता बल्लो कि मसीह चो एकलो संगवारी हूनाचा विरुद उठीद। जकर्याह भविष्यद्वक्ता बल्लो कि हूनाचो यो संगवारी इसेय करुक दुसरा मानेयांग चाँदी चा तीस सिक्का धरिद। याहचो अलावा, कई भविष्यद्वक्ता बल्ला कि मानेय मसीहक मारून दे दे, अर योकि हूनी हूनाचा कपड़ा करता जुआ खेलदे।

भविष्यद्वक्ता यो बल सांगला कि मसीह किसे मरीद। यशायाह भविष्यवाड़ी करलो कि मानेय मसीहक थूकदे, हूनाचो मजाक उड़ावदे, अर हूनाक पेटदे। हूनी हूनाक ठेचुन दे दे अर हून खुबेय पीड़ा अर यातनायें मरीद, जबकि हुनितो कहीं गलत इकरेय होही।

भविष्यद्वक्ता यो बल सांगला कि मसीह पाप ईकरिद। हुन सिध्द होईद। तबले हुन याहायकरता मरीद परमेश्वर हूनाक दुसरा मानेयांग चा पाप चा कारन दण्ड देइद। हूनाचा मरलायें मानेय परमेश्वर संग मेल करुक सक्षम होदे। याहायकरता परमेश्वर चाहिदा कि मसीह मरो।

भविष्यद्वक्ता यो बल सांगलो की परमेश्वर मसीक मरलायें ले जीवत करीद। यो दर्शायदा हेयकी यो सब नवा वाचाक बांधुक परमेश्वर चो योजना रेहेय, ताकि हुन हूनी मानेयांग वांचाऊक सको जेबल हूनाचा विरुध्द पाप करला हात।

परमेश्वर भविष्यद्वतांग लग मसीह चा बारेयें खुबेय गोठांग प्रघट करलो, तबले मसीह हूनी भविष्यद्वतांग ले काचाय बल जीवनकाले इयेऊ रेहेय। इंही भविष्यवाड़ी करला चा 400 ज्यादा साल चा पासे, सही समयें, परमेश्वर मसीक या संसारे पठाइद।