22. यूहन्ना चो जनम

अतिते, परमेश्वर आपला भविष्यद्वतांग गोठयाव रेहेय याहयकरता हुन मानेयांग गोठयाऊक सकता तबले हुन समय से लेकर फेर 400 साल चा बीतते तक हुन हूनांग इगोठीयावे। तब परमेश्वर जकर्याह नाव चा भविष्वद्वक्ता लग एक स्वर्ग दूत के पठावलो। जकर्याह अर हूनाची बायली एलीशिबा परमेश्वर चो आदर करया आत। हुन खुबेय डोकरा होऊ रहत, अर हूनांग चा कोंहू कड़हा जनम ईहोउ रहत।

हुन स्वर्ग दूत जकर्याह के बल्लो, “ तुची बायली एकलो कड़हो जनमीद। तुयं हूनाचो नाव यूहन्ना ठोवसे। परमेश्वर हूनाक पवित्र आत्मायें परिपूर्ण करीद, अर यूहन्ना मानेयांग मसीक अपनावता करता तयार करीद।” जकर्याह जवाब दिलो, मै अर माची बायली कड़हा जनम करुक खुबेय डोकरा आवं! मै किसे जानीन कि तुयं सतेय बलसा?”

हुन स्वर्ग दूत जकर्याह के जवाब दिलो, “तुचा लग या शुभ संदेश के आनता करता मै परमेश्वर चा दुवारा इले हाय। कायंकी तुयं माचा लग विश्वास ईकरास, याहायकरता कड़हा चा जनम होते तक तुयं गोठयाऊक सक्षम इहोसे।” जल्दी, जकर्याह गोठयाऊक ईसकते रेहेय। तब हुन स्वर्ग दूत जकर्याह लगले गेलो। याहचो पासे, जकर्याह घरे बाहडून इलो अर हूनाची बायली आंगे रेहेय।

जब एलिशिबा छ: महिना आंगे रेहेय, तब हूनेय स्वर्ग दूत अचानक एलिशिबा ची रिश्तेदारांग लग प्रघट होलो, हूनेचो नाव मरियम रेहेय। मरियम कूँआरी रेहेय अर बिहाव होता करता युसुफ नाव चो मानस संग हूनेचो मंगनी होऊ रेहेय। स्वर्ग दूत बल्लो, “तुयं आंगे रसे अर एकला लेकाक जनम देसे। तुक हूनाचो नाव यीशु ठोवतो आय। हुन सर्व शक्तिमान परमेश्वर चो बेटा होयीद अर हमेशा करता शासन करीद।”

मरियम जवाब दिली, “यो किसे होयीद, कायंकी मै तो कुँवारी आयं?” हुन स्वर्ग दूत समजावलो, “पवित्र आत्मा तुचा लग एयीद अर परमेश्वर चो सामर्थ तुचा लग छाया करीद। याहायकरता हुन शिशु पवित्र होयीद, अर हुन परमेश्वर चो बेटा होइद।” जो हुन स्वर्ग दूत बल्लो हूनाचा लग मरियम विश्वास करली।

यो होता चो तुरन्त पासे, मरियम जाऊन एलिशिबा संग भेंट करली। जिसे मरियम हूनेक नमस्कार करली, एलिशिबा चो शिशु हूनेचा भीतरे चुलबुल्लो। हूनाचा करता परमेश्वर जो करू रेहेय हूनाचा बारेयें हूनी बायलीया एक साथ हरीक होला। एलिशिबा संग तीन महिना रहला चा पासे, मरियम घरे बाहडून इली।

हूनाचा पासे, एलिशिबा आपला कड़हाक जनमली। जकर्याह अर एलिशिबा हुन कड़हा चो नाव यूहन्ना ठोवला, जिसे कि हुन स्वर्ग दूत आदेश देऊ रेहेय। तब पमेश्वर जकर्याहके गोठीयाउक सक्षम करलो। जकर्याह बल्लो, “ परमेश्वर चो स्तुति होवो, कायंकी हुन आपला मानेयांग चो सहायता करुक सुरता करू रेहेय! ए माचा बेटा, तुयं सर्व शक्तिमान परमेश्वर चो भविष्यद्वक्ता होसे। तुयं मानेयांग सांगसे कि हूनी किसे आपला पाप करता क्षमा प्राप्त करुक सकधात!”