23. यीशु चो जनम

युसूफ नाव चो एकलो धर्मी मानेय संग मरियम चो मंगनी होउ रेहेय। जब हूनइतो सुनलो कि मरियम आगें आहेय तो हुन जानते रेहेय कि हुन हूनेचो कड़हो नोहोय। तबले, हुन मरियम के बदनाम करुक इचाहेय, याहायकरता हूनितो हुनेक कृपा करलो अर हुनेक खुसखुसाय तलाक देऊ सोचलो। तबले हुनाचोले पुरहे कि हुन इसे करतो, एकलो स्वर्गदूत हूनाचा सपनायें एउन भर हूनाक गोठीयावलो।

हुन स्वर्गदूत बल्लो, “ए युसूफ, मरियम के आपली बायली चा रुपे धरून एउक भय इहोव। हुनेचा भीतरे जो कड़हो आहेय हुन पवित्र आत्मा तेवंले। हुन एकला कड़हाक जनमीद। हुनाचो नाव यीशु ठोवसे (हुनाचो अर्थ आय, ‘यहोवा वांचायदा हेय’), कायंकी हुन मानेयांग हुनांगचा पापले वांचाईद।”

मतलब युसूफ मरियम के बिहाव करलो अर हुनेक आपली बायली चा रुपे घरे निलो, तबले हुनेचा कड़हाक जनम देते तक हुन हुनेचा संग इसोवेय।

जब मरियम जनम देता चो समय लघेय रेहेय, तब हुन अर युसुफ बैतलहम जाऊक एक खुबेय धुर यात्रा करला। हूनांग हूता जातोय रेहेय कायंकी रोमी अधिकारी इस्राएले रहया इता सपा मानेयांग चो गिनती करुक चाहते रेहेय। हुन चाहेय कि सपा मानेय हूता जावोत जाह हूनांग चा पुरखा रहया आत। राजा दाऊद चो जनम बैतलहम होवु रेहेय, अर हुन मरियम अर युसुफ दुयेय झनांग चो पुरखा आय।

मरियम अर युसुफ बैतलहम गेला, तबले हूता जानवर रहता इता जघा चो अलावा हूनांग चो रहता करता कंही जघा ई रेहेय। हूनेय जघा रेहेय जहा मरियम आपला कड़हाक जनम दिली। हुन हूनाक चरनीयें लेपटावला कायंकी हूता हुनाचा करता कंही डसना इरेहेय। हूनीइता हूनाचो नाव यीशु ठोवला।

हुन रात, हूता लघेय चा वेडायें कुछ चरवाहा आपला भेड़ांग चा झुड चो रखवाली करते रहत। उबुकले, एक चमकदार स्वर्ग दूत हुनांग लग प्रघट होलो, अर हूनी भय होला। हुन स्वर्ग दूत बल्लो, ”भय इहोवा, कायंकि माचा लग तुमचा करता शुभ संदेश आसेय। बैतलहमे मसीह, स्वामी चो जनम होलो हाय!”

जाऊन हुन कड़हा चो खोज करा, अर तुमी हूनाक कपड़ायें लिपटा होलो अर चरनीयें सोबला इताक पावांसे।” उबुकले, आकाशेले स्वर्गदूत भरला। हूनी परमेश्वर चो स्तुति करते रहत। हूनीइता बल्ला, ”पुरा महीमा स्वर्गे विराजमान परमेश्वर के मिरो। संसारे हूनी मानेंयांग शान्ति होओं जेचो हुन चिन्ता करीदा हेय!”

तब स्वर्ग दूत गेला। हुनी चरवाहा बल आपला भेड़ांग सांडून कड़हाक देखुक गेला। जल्दी हूनी हुन जघायें अम्बराला जहा यीशु रेहेय अर हूनीइता हूनाक चरनीयें सोवला इताक अम्बरावला, जिसे कि हुन स्वर्गदूत बलु रेहेय। हूनी खुबेय उत्साहित रहत। तब हुनी चरवाहा वापस हुताले बाहडून गेला जहा हुनांगचा भेड़िया रहत। हुनिइता जो कंही बल सुनला अर देखला हुन सब करता हूनी परमेश्वर चो स्तुति करते रहत।

पूर्वे दूरे एक देशे कुछ मानस रहत। हूनिइता सितारांग चो अध्यन करू रहत अर हूनि खुबेय बुद्धिमान रहत हूनिइत एक असामान्य सितारांग आकाशे देखला। हूनिइता बल्ला कि याहचो अर्थ आय कि यूहुदियांग चो एकलो नवो राजा चो जनम होलो हाय। याहायकरता हूनीइता हुन कड़हाक देखता करता आपला देशेले यात्रा करता चो निर्णय करला। एक लम्बा यात्रा चा पासे, हूनि बैतलहम इला अर हुन घर के अंबरावला जहा यीशु अर हूनाचा याया बाबा रुकु रहत।

जब इहीं मानस यीशुक आपली माय संग देखला तब हूनिइता मांडी मोडून हूनाचो आराधना करला। हूनिइता यीशुक कीमती उपहार दिला। फेर घरे वापस बाहडून गेला।